استاناداعى تورت پىسىرەتىن سەحتا ەدەن جۋىپ، كۇنىن كورگەن ەلۆيرا قادىروۆا ءبىر ايدان بەرى جۇمىسسىز. اتاجۇرتقا وتباسىمەن قونىس اۋدارعان ورالمان ايەلدى مەكەمە باسشىلىعى ءتيىستى قۇجاتتارىن سۇراعانى ءۇشىن جۇمىستان شىعارعان كورىنەدى، - دەپ حابارلايدى «Bnews.kz». ءتىپتى باسشىلار ورىس ءتىلىن بىلمەيسىڭ دەپ مەنسىنبەي، وزگەلەردى ايداپ سالىپ تاياق تا جەدىم دەيدى كەلىنشەك. "ءتورت ادامعا ۇرعىزدى. مەنىڭ ازابىم وزگە ۇلتتاردان، بۇل جەرگە ازاپ كورەم دەپ كوشىپ كەلگەن جوقپىن قازاقستانعا. ديرەكتورىم ورىس، يەسى ارميان. بۇلار ورىس ءتىلىن بىلمەيتىن بولعاسىن مەنسىنبەي ۆاششە. مەنى جۇمىستان قۋعان سەبەبى، ورىس ءتىلىن بىلمەيمىن. جانە مەن كەلىسىمشارت سۇراعام، ءتورت بالام بار"، - دەيدى ەلۆيرا قادىروۆا. ەلدەگى وزگە ۇلت وكىلدەرىنىڭ باسسىزدىق ارەكەتى اشىق تۇردە جۇزەگە اسا باستادى. ادىلەتتىڭ تۋىن كوتەرىپ جۇرگەن قۇقىقتىق ورىندار ءوز انا تىلىندە جەتىك سويلەۋدى بىلمەيدى. ەلۆيرانىڭ جانىنا باتقان ازاپ ءبىر ادامنىڭ ەمەس بۇكىل ءبىر ۇلتتىڭ ازابى بولىپ تۇر.