شىمكەنتتە باس شىرشانىڭ شامى جاعىلدى. جاڭا جىلدىڭ باستى سيمۆولىن ورناتۋ مەن شاھاردى بەزەندىرۋگە بيىل دا قازىنادان ءبىر تيىن دا قاراستىرىلماعان. قالا اكىمدىگى ول قارجىنى الەۋمەتتىك جاعدايى تومەن وتباسىدان شىققان جانە جەتىم بالالارعا ۇلەستىرىپ بەردى، دەپ حابارلايدى nur.kz
بيىل شىمكەنتتەگى ءال-فارابي الاڭىنداعى باس شىرشانىڭ شامىن قالا باسشىسى ەمەس، وڭتۇستىك قازاقستان وبلىسىنىڭ اكىمى جانسەيىت تۇيمەبايەۆتىڭ ءوزى جاقتى. سالتاناتتى شارادا ءسوز سويلەگەن ايماق باسشىسى شيرەك عاسىردا تاۋەلسىزدىك جىلدار ىشىندە قازاقستان جەتكەن جەتىستىكتەردى دە ءسوز ەتۋدى ۇمىتپادى. ءتىپتى بۇكىل الەم قازاقستاندى مويىنداعانىن دا ماقتانىشپەن ءمالىم ەتتى.
«تاۋەلسىز ەلىمىزدەگى وسىنداي كەشتەر، مەرەكەلەر، ءتۇرلى شارالار كوپ بولا بەرسىن. مىنەكي، وزدەرىڭىزبەن دە دۇنيەنى اينالىپ، جاڭا جىلدى قارسى الۋعا ارالارىڭىزعا كەلىپ وتىرمىز. وزدەرىڭىزبەن بىرگە كەلەسى جىلى كوپتەگەن جۇمىستاردى اتقارامىز دەگەن جوسپارىمىز بار. ونىڭ شەت جاعىن ايتىپ جاتىرمىز، قالعان جاعىن وزدەرىڭىزبەن اقىلداسامىز... الەم – ءبىزدىڭ ورتاق ءۇيىمىز. شيرەك عاسىر ىشىندە قازاقستانىمىزدى الەم مويىندادى. مۇنىڭ ءبارى ەلباسىمىزدىڭ ارقاسىندا. جاڭا جىلدى قارسى الۋعا از عانا ۋاقىت قالدى. بارلىقتارىڭىزدىڭ وتباسىلارىڭىزعا، جاقىندارىڭىزعا باقىت، ساتتىلىك، دەنساۋلىق تىلەيمىن»، - دەدى قۇتتىقتاۋ سوزىندە تۇيمەبايەۆ.
مۇنان سوڭ وبلىس اكىمى باس شىرشانىڭ شامىن جاعىپ، شىمكەنت اكىمى عابيدوللا ءابدىراحىموۆ ەكەۋى شاراعا قاتىسۋشىلارمەن بىرگە شىرشانى اينالدى.
مەرەكەلىك شارا سالتاناتتى وتشاشۋعا ۇلاستى.
ەسكە سالساق، بىلتىر شىمكەنتتە قالانى جاڭا جىلدىق بەزەندىرۋگە 80 ملن تەڭگە قارالىپ، كەيىننەن ول قارجى الەۋمەتتىك جاعدايى تومەن جانە اتا-انا قامقورلىعىنسىز قالعان بالالارعا قىستىق كيىم الۋى ءۇشىن ەسەپشوتتارىنا اۋدارىلدى.
بيىل دا جەرگىلىكتى بيلىك بۇل قايىرىمدىلىق شاراسىن ۇمىتپادى. ياعني، الەۋمەتتىك تۇرعىدان از قامتىلعان وتباسىدان شىققان جانە جەتىم 804 بالا قارجىلاي سىيلىق الدى.
ولاردىڭ ءارقايسىسىنا 20 ايلىق-ەسەپتىك كورسەتكىش كولەمىندە، ياعني، 42 مىڭ تەڭگەدەن اۋدارىلدى. ال ءال-فارابي الاڭىنا وتكەن جىلدان قالعان بيىكتىگى 18 مەتردى قۇرايتىن شىرشا ورناتىلدى. قالانى بەزەندىرۋگە جەرگىلىكتى كاسىپكەرلەر دەمەۋشىلىك جاساعان.
