«اپاتقا ۇشىراعان مالايزيا اۋە لاينەرىندەگى 17 جاستاعى جولاۋشى قىزدىڭ اكەسى رەسەي پرەزيدەنتى ۆلاديمير پۋتينگە جان جۇرەكتى اۋىرتاتىن اشىق حات جازدى»،-دەيدى «حاففينگتون پوست» اقپاراتتىق سايتى «Hart Van Nederland» گازەتىنە سىلتەمە جاساپ.

ماقالا الدىمەن قىزدىڭ اكەسى حانس دە بورستتىڭ فەيcبۋگىندە جارىق كورگەن. كەيىن «Hart Van Nederland» گازەتى جاريالاعان.

جانىن قايعى مۇجىگەن اكەنىڭ حاتى بىلاي باستالعان دەيدى «حاففينگتون پوست»: « سىزدەرگە وتە-وتە ۇلكەن راحمەت، پۋتين مىرزا، سەپاراتيستەردىڭ باسشىلارى نەمەسە ۋكراينا ۇكىمەتى. مەنىڭ سۇيىكتى دە جالعىز بالامدى ولتىرگەندەرىڭە راحمەت».

حانس دە بورستتىڭ قىزى Elsemiek بەيسەنبىدە امستەردامنان كۋالا-لۋمپۋرعا بەت الىپ، ۋكراينانىڭ شىعىسىنا جەتكەندە اتىپ تۇسىرىلگەن اۋە لاينەردەگى 298 جولاۋشىنىڭ ءبىرى. قىرشىنىنان قىيىلعان قىز سول ۇشاقپەن اعاسى، شەشەسى جانە وگەي اكەسىمەن بىرگە مالايزياعا ساياحاتتاۋعا بارا جاتقان ەكەن.

حانس دە بورستتىڭ جازباسىن «حاففينگتون پوست» گوللاند تىلىنەن بىلاي اۋدارعاندىعىن ايتىپتى: «مىرزالار، قىزىمدى ءبىر وقپەن كۇل-تالقان قىلىپ، وزدەرىن باقىتتى سەزىنگەن سەندەردىڭ تاڭەرتەڭ ورىندارىڭنان تۇرعاندا اينادان وزدەرىڭدى ءبىر كورۋلەرىڭدى تىلەيمىن!».

قايعىدان قان جۇتقان حانس دە بورس حاتىنىڭ سوڭىن ۆلاديمير ءپۋتيننىڭ جەكە وزىنە ارناعان ەكەن: ««پۋتين مىرزا: مەن ءسىزدىڭ كوزىڭىزدى اشىپ تۇرىپ، ءبىزدىڭ پرەمەر-مينيستر ريۋتتەمەن ادامشا سويلەسۋىڭىزدى تىلەيمىن!!!».

اتىپ تۇسىرىلگەن اۋە لاينەردەگى جولاۋشىلاردىڭ باسىم كوبى گوللاندتار.

«وقيعا ورنىنداعى نيدەرلاندى ماماندارى قازا تاپقانداردىڭ كىمدەر ەكەندىگى انىقتالا سالىسىمەن، تۋىسقاندارىنا حابارلايمىز دەپ وتىر»،-دەيدى CNN-دىقتار. «بۇل انقىتاۋلاردىڭ كەيبىرەۋى تەز بولعانىمەن، بىرنەشە اپتا نەمەسە بىرنەشە ايعا سوزىلاتىندارى دا بار»،-دەپ ەسكەرتكەن نيدەرلەندى پرەمەر-مينيسترى مارك ريۋتتە.

دەرەككوز: «حاففينگتون پوست» جانە CNN.

ازىرلەگەن تالعار دالەلعازى

"قامشى" سىلتەيدى - qamshy.kz