بۇل وقيعا ءوزىمىزدىڭ كورشىلەس وزبەكستاندا بولعان. ومىردە بولعان، ەستىگەن وقيعامدى ايتىپ وتىرمىن. ەكى جاس نەكە قيىپ، ۇيلەنەدى. ولار كەيبىر وتباسىلار سەكىلدى ارالارىندا بالا بولماي، بىرنەشە جىل كۇتپەيدى، ءوز ۋاقىتىندا ايەلى ءبىر قىز بوسانادى. كەلەسىسىندە تاعى ءبىر قىز تۋادى. اقىماق كۇيەۋى قىز تۋا بەردىڭ دەگەن سىلتاۋمەن، ايەلىن ەكى قىزىمەن بىرگە كوشەگە قۋىپ شىعادى. اۋەل باستا ۇل بولادى دەپ، ءوزىن قاتتى سەندىرىپ قويعان-اۋ.

سودان ايەلى بايعۇس ءقايتسىن، ءبىرىن جەتەكتەپ، ءبىرىن قۇشاعىنا قىسىپ، ەكى قىزىن الىپ، باسى اۋعان جاققا كەتە بارادى. باسىندا ءوز جۇرتى از-كەم كومەكتەسكەن بولار، ءبىراق قىزدارى ەڭبەكتەي باستاعاننان-اق، انا بايعۇس ەكى قىزدىڭ قامىن ويلاپ، جۇمىس ىستەي باستايدى. جۇمىس تاڭداۋعا شاما جوق. تابىلعانىن ىستەيدى. نە كورمەدى دەيسىز؟ اۋىر بولسا دا، قانداي جۇمىس بولسا دا، بالا بولاشاعىنىڭ قامى ءۇشىن بارىنە دە كوندى. ءۇمىتىنىڭ اقتالعانى بولار، قىزدارى مەكتەپتى ۇزدىك ءبىتىرىپ، جوعارى وقۋ ورىندارىنا تەگىن ءتۇستى. ەكەۋى دە دارىگەرلىك ماماندىقتى تاڭدادى. وقۋىن اياقتاعان سوڭ، اۋرۋحاناعا جۇمىسقا تۇرىپ، ءوز سالاسىنىڭ ۇزدىگى رەتىندە كوزگە تۇسە باستادى. قىزمەتتەرى دە جوعارىلاي بەردى. بىرەۋى باس دارىگەرلىككە دەيىن كوتەرىلەدى.

ال، بۇل كەزدە اقىماق اكە باسقا بىرەۋگە ۇيلەنەدى. الگى بەيباققا ۇل بالا ءسۇيۋ بۇيىرماپتى. ەكىنشىسىنىڭ دە تاپقانى وڭشەڭ قىز بولادى. ءتورت رەت قۇرساق كوتەرىپ، تورتەۋىندە دە قىز بوسانادى.

ەكى قىزدىڭ اناسى كوپ قيىنشىلىق كوردى دەدىك. كوپ ۋاقىت كوشە سىپىرۋشى بولىپ جۇمىس ىستەدى. پاتەردەن پاتەرگە كوشىپ جۇرگەندە، ۋاقىتى كەلىپ ۇكىمەتتەن ءۇي الادى. قىزدارىن ادال، ارلى بولۋعا تاربيەلەيدى.

ەكى قىز بويجەتىپ، ءبىرشاما جاسقا كەلگەندە، قاتىگەز اكەلەرى دە ءبىرقالىپتا تۇرسىن با؟ ول دا قارتايادى. ءبىر كۇنى كەنەتتەن جۇرەك تالماسىنا ۇشىراپ اۋرۋحاناعا تۇسەدى. مۇنى ەستىگەن بۇرىنعى ايەلى ەكى قىزىنا ول كىسىنىڭ اكەلەرى ەكەنىن ەسكەرتەدى. «سەن ءبىزدى تاستاپ كەتكەنسىڭ» دەگەن ءسوز ايتپاي، قىزدارى الگى كىسىگە جاقسىلاپ قارايدى. سول كەزدەگى اكەلەرىنىڭ وكىنىشىن ايتساڭىزشى. ەڭىرەپ جىلاپ، قىزدارىنان ءالى كۇنگە دەيىن كەشىرىم سۇرايدى دەيدى.

ءيا، پەندە بۇل ومىردە نەنىڭ قايىرلى، نەنىڭ قايىرسىز ەكەنىن بىلمەي جاتادى. قىز دەگەن جاناشىر حالىق. جاقسىلىقتى كورگەندە قىزدان كورەسىڭ دەگەن ۇلكەن كىسىلەردىڭ ءسوزى تەگىن ەمەس-اۋ.

Muslim.kz سايتىنان الىندى

نۇرقانات بايزاق