رەسەي پرەزيدەنتى ۆلاديميروۆيچ پۋتين امەريكالىق ساياساتكەرلەردىڭ ءوزىن ايىپتاعانى جايلى مالىمدەدى. اقش-تىڭ دەمپارتياسى پرەزيدەنتتىك سايلاۋدا جەڭىلىس تاپقاندىقتارىن مويىنداي الماي، شەت جاقتان كىنالىلەردى ىزدەي باستاعان دەپ حابارلايدى www.bbc.com، مالىمەتتىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.
جىل سايىن بولاتىن پرەسس-كونفەرەنسيادا پۋتين «رەسەيلىك حاكەرلەردىڭ اقش-تاعى پرەزيدەنتتىك سايلاۋعا قاتىسى بار ما جانە ولارعا بۇيرىق بەرگەن راسىمەن دە ءسىز بە؟» دەگەن تىلشىلەردىڭ سۇراعىنا «جەڭىلگەن ادام ءارقاشان دا كىنانى شەتتەن ىزدەيدى» - دەپ جاۋاپ بەردى.
ءپۋتيننىڭ ايتۋىنا قاراعاندا، ول دەموكراتيالىق پارتيانىڭ سەرۆەرىنە حاكەرلەردىڭ بۇزىپ كىرگەنىن بىلگەن، الايدا ول حاكەرلەر ناقتى رەسەيدەن ەكەندىگىن ايعاقتايتىن ەشقانداي دا دالەلدىڭ جوق ەكەندىگىن ايتتى. «ولار قانداي حاكەرلەر ەكەنىن كىم بىلەدى؟ نەگە رەسەيلىك حاكەرلەر دەيسىڭدەر؟»، - دەپ مالىمدەدى رەسەي پرەزيدەنتى.
پۋتين وزىنە باراك وباما حاكەرلىك شابۋىلدى دوعارسىن دەپ تەلەفون ارقىلى حابارلاسقانى جايلى سۇراقتارعا جاۋاپ بەرۋدەن باس تارتتى.
ونىڭ ايتۋىنشا، تەلەفونمەن جەكە بولعان اڭگىمەنى جۇرتقا جاريا ەتپەيدى ەكەن. بىرنەشە كۇن بۇرىن پرەزيدەنتتىڭ پرەسس-حاتشىسى دميتريي پەسكوۆ پۋتين مەن وباما اراسىنداعى اڭگىمەنىڭ بولعاندىعىن جانە دە وعان ەلەكتروندى بايلانىس جۇيەسى قوسىلماعاندىعىن ايتقان بولاتىن.
ءپۋتيننىڭ: «اقش-تىڭ جاڭا پرەزيدەنتى دونالد ترامپ قوعامنىڭ كوڭىل كۇيىن تەز بايقاپ، سوعان سايكەس جۇمىس ىستەي باستادى. ونىڭ جەڭەتىنىنە بىزدەن باسقا ەشكىم دە سەنگەن جوق، الايدا ول سوڭىنا دەيىن باردى»، - دەپ مالىمدەدى.
ساياساتكەر كونستانتين كالاچيەۆ: «پۋتين مۇنداي سۇراقتاردى ۇناتادى دەپ ەسەپتەيدى. اسىرەسە، حالىقتىڭ 34% ونى قولدايتىنىنا ريزا. باراك وبامانىڭ جۇيەدەگى ماسەلەلەرى جايلى ايتقاندى جاقسى كورەدى. ول وبامادان وزىپ كەتتى»
سايلاۋ ءوتىپ جاتقان كەزدە حاكەرلەر اقش-تاعى دەمپارتيالىق كومپانيانىڭ سەرۆەرىن بۇزىپ، ىشىنە ەنگەن دە، قۇپيا حاتتارىن ينتەرنەتكە جاريالاعان. اقش-تىڭ ارنايى قىزمەتى بۇل حاكەرلىك شابۋىل رەسەي تاراپىنان جاسالعان دەگەن شەشىمگە كەلدى.
اۋدارعان: نازەركە لابيحان
