ءبىلىم جانە عىلىم مينيسترلىگىنىڭ حابارلاۋىنشا، قازاقستان بيىل جوعارى وقۋ ورىندارىندا وقۋعا 34 مىڭ 165 گرانت ءبولدى.

ونىڭ ىشىندە كۇندىزگى وقۋ بولىمىنە - 31 مىڭ 135 گرانت، سىرتتاي وقۋعا - 500، دايىندىق بولىمىنە 2 مىڭ 530 گرانت بولىنگەن.

گرانت يەلەرى رەسپۋبليكالىق كونكۋرس ارقىلى انىقتالادى. گرانتقا ءوتىنىش پەن قۇجات قابىلداۋ 31 شىلدەگە دەيىن جالعاسادى.

ءبىلىم جانە عىلىم ءمينيسترىنىڭ ورىنباسارى تاحير بالىقبايەۆتىڭ ايتۋىنشا، بيىل تەحنيكالىق عىلىمدارعا 12 مىڭ گرانت بولىنگەن.

«سونىمەن قاتار، گرانتتاعى 5 مىڭ 864 ورىن - پەداگوگيكالىق ماماندىقتارعا، 2 مىڭ 650 ورىن اۋىل شارۋاشىلىعى جانە ۆەتەريناريا ماماندىقتارىنا ءبولىنىپ وتىر» دەدى ۆيسە-مينيستر.

قازاقستان بىلتىرعى وقۋ جىلىنا 34 مىڭ 115 گرانت بولگەن ەدى.

قازاقستاننىڭ "ءبىلىم تۋرالى" زاڭىندا "ءبىلىم بەرۋ گرانتى – كاسىپتىك ءبىلىم الۋعا تولەۋ ءۇشىن قازاقستان رەسپۋبليكاسىنىڭ زاڭناماسىمەن بەلگىلەنگەن شارتتارمەن ءبىلىم الۋشىعا بەرىلەتىن اقشانىڭ نىسانالى سوماسى" دەپ كورسەتىلگەن. گرانتقا قولى جەتكەن تالاپكەر وقۋىن بىتىرگەن سوڭ بۇل قاراجاتتى قايتارمايدى.

قازاقستاندا بيىلعى ۇبت-عا (ۇلتتىق ءبىرىڭعاي تەستىلەۋ) 87 مىڭ 593 (مەكتەپ بىتىرگەندەردىڭ 95 پايىزى – رەد.) تۇلەك قاتىستى.

Azattyq.org