الايدا، «جۇلدىزدار وتباسى»، «اڭىز ادام» جۋرنالدارىنىڭ قۇرىلتايشىسى ءارى باس رەداكتورى جارىلقاپ قالىباي abai.kz كە بەرگەن سۇحباتىندا سوت شەشىمىمەن كەلىسپەيتىنىن ءارى بۇل ءىستىڭ ساياسي استارى بار ەكەنىن ايتادى.  

جارىلقاپ قالىباي (سۋرەتتە)، «جۇلدىزدار وتباسى»، «اڭىز ادام» جۋرنالدارىنىڭ قۇرىلتايشىسى ءارى باس رەداكتورى:

- مەن سوت شەشىمىمەن كەلىسپەيمىن. ءقازىر «اڭىز ادام» جۋرنالىنىڭ 100ء-نشى سانى دايىندالىپ جاتىر. جۋرنالدىڭ وسى ءجۇز سانىندا دا سوت ءبىزدى ايىپتى دەپ تاپقان اكىمشىلىك قۇقىق بۇزۋشىلىق كودەكسىنىڭ 334 بابى 2 تارماعىن بۇزاتىن ءبىر سويلەم دە جوق.

سوت شەشىمى قورتىندىسىنىڭ ءوزى قاراما-قايشىلىققا تولى. مىسالى، قورتىندىنىڭ ءبىرىنشى بولىمىندە ناعاشىباي ەسمىرزايەۆتىڭ «گيتلەر فاشيست ەمەس» دەگەن ماقالاسىندا ەكسترەميزمءدى اقتاۋ بەلگىلەرى بار دەيدى دە، ەكىنشى بولىمىندە رەداكسيادان قويىلعان سۇراقتارعا ناعاشىباي ەسمىرزايەۆتىڭ «گيتلەر فاشيست ەمەس» جانە مىرزاعالي حاسەننىڭ «ماين كامپفتا كوپ نارسە دۇرىس جازىلعان»  تاقىرىبىمەن بەرىلگەن جاۋابىنداەكسترەميزمدى اقتاۋ بەلگىلەرى بولۋى مۇمكىن دەيدى. مىنەكەي، ءبىرىنشى بولىمدە «بار» دەسە، ەكىنشىسىندە «مۇمكىن» دەيدى. جانە سوت ساۋالناما مەن ماقالانىڭ نە ەكەنىن اجىراتپاعان. بىرەسە «ماقالا» دەيدى، ەندى بىردە «رەداكسيادان قويىلعان سۇراقتار» دەيدى. ياعني، ساراپتاما دۇرىس جاسالماعان. ساراپتامانى قايتا جاساتۋدى تالاپ ەتىپ ەدىك، ولار بۇدان باس تارتتى. سوتتىڭ ەكىۇشتى ءدۇدامال ساراپتاماعا سۇيەنىپ، جۋرنالدى سوتتاۋى – زاڭسىز.

ەكىنشى دۇنيەجۇزىلىك سوعىس جانە گيتلەرگە ارنالعان جۋرنالدىڭ سانى 52 بەتتەن تۇرادى. ال، سوت جۋرنالدىڭ ءبىر بەتىن عانا الىپ، بىزگە ۇكىم شىعارىپ وتىر.

بىزدە ادىلدىك جوق، ءادىل سوت جوق. بىزدەگى سوت مەملەكەتتىك ماشينانىڭ ءبىر تەتىگى.

سۋرەتتە: سۋديا اسەت بورانبايەۆ. azattyq.org

سوتتىڭ جازبا قورتىندىسى قولىما تيگەن سوڭ، قالالىق سوتقا شاعىمدانامىن. قالالىق سوتتىڭ قانداي شەشىم شىعاراتىنىن بىلمەيمىن، ءبىراق، وسىعان دەيىن وتكەن ءۇش سوتتا دا مەنى ايىپتى دەپ ادىلەتسىز شەشىم شىعارعاندارىنا قاراعاندا، جوعارىدان ءبىر نۇسقاۋ بار سياقتى: ول – ساياسي تاپسىرما شاماسى.

جوعارى جاقتا وتىرعان ءبىر جىگىت كەزىندە مەنىمەن ارىپتەس بولعان. ەكەۋمىز دە وقىتۋشى بولدىق. ارالاسىپ جۇردىك. ءقازىر ول وتە ۇلكەن قىزمەتتە. سول جىگىت «جۇلدىزدار وتباسى»، «اڭىز ادام» جۋرنالدارى دۇرىلدەپ تۇرعان كەزدە، وسىدان ەكى جىل بۇرىن ماعان كەلىپ، ۇسىنىس ايتتى: «جاكە، ەكى جۋرنالدى مەنىمەن ءبولىس. مەنى قۇرىلتايشىنىڭ ءبىرى ەتىپ قوس» دەدى. بۇل ۇسىنىستان مەن باس تارتتىم. ول توعىز ايدان كەلىپ، تاعى ايتتى. مەن جانە باس تارتتىم. سودان كەيىن ول ماعان جاۋىعىپ كەتتى. ءدال وسى سەكىلدى جوعارعى بيلىكتە باسپا ءسوز سالاسىنا باس-كوز بولىپ وتىرعان ادامدار قوسىمشا ارەكەت جاساپ جاتقانعا ۇقسايدى. ارينە، قولىمدا دالەل-دايەك جوق، ءبىراق، ءىستىڭ قيسىنى سوعان سايادى. كۇدىگىم بار.

 مىنە، وسىنداي نارسەلەر تۇرعان كەزدە ادىلدىككە جەتۋىم قيىن. ءبىراق مەن تالماي كۇرەسە بەرەمىن.

Abai.kz

(اۋەلگى تاقىرىپ: ادىلەتسىز شەشىمنىڭ ارجاعىندا ساياسي تاپسىرما بار سياقتى)