اقتوبەدە بەزبۇيرەك انا جاڭا تۋعان ءسابيىن 8800 دوللارعا ساتپاق بولدى، دەپ حابارلادى قازاقپارات وبلىستىق ىشكى ىستەر دەپارتامەنتىنىڭ باسپا ءسوز قىزمەتىنە سىلتەمە جاساپ.

«اعىمداعى جىلعى 29 شىلدەدە اقتوبە وبلىستىق ءىىد قىزمەتكەرلەرى 24 جاستاعى قىزىنىڭ جاڭا تۋعان بالاسىن جەكە كۇنكورىس ماقساتىندا ساتپاقشى بولعان 48 جاستاعى ايەلدى قولعا ءتۇسىردى. كەلىپ تۇسكەن جەدەل اقپارات بويىنشا كەلىسىمدى قىزدىڭ اناسى جۇرگىزگەن. قىزىنىڭ بوسانۋى الدىندا، ياعني 2014 جىلدىڭ مامىرىنان باستاپ بولاشاق بالانى الاتىن كليەنت ىزدەگەن جانە وتەماقى رەتىندە اقتوبە قالاسىنان 2 بولمەلى پاتەر تالاپ ەتكەن. بىرنەشە كەزدەسۋدەن جانە تەلەفون ارقىلى سويلەسكەننەن كەيىن كۇدىكتى بالانى 1 ملن.600 مىڭ تەڭگەگە ساتۋعا كەلىسكەن»، - دەلىنگەن ۆەدومستۆو حابارلاماسىندا.

ساتىلماق بولعان بالا 27 شىلدەدە اقتوبە قالاسى مججا بوسانۋ بولىمشەسىنە  ومىرگە كەلگەن. نارەستە قىز بالا بولىپتى. كەيىن قىزدىڭ اناسى بالانى اۋرۋحانادان شىعارعان كەزدە اقشانى بىردەن بەرۋدى تالاپ ەتكەن. ولار وسى «ساتىلىم» كەزىندە، 2014 جىلعى 29 شىلدەدە قولعا تۇسكەن. سانكسيالانعان ءتىنتۋ بارىسىندا اقشا جانە بوسانعان ايەلدىڭ اتىنا بەرىلگەن قۇجات تاركىلەنگەن. كۇدىكتىلەرگە قاتىستى قاماۋ تۇرىندەگى بۇلتارتپاۋ شاراسى قولدانىلدى جانە ق ر قك 133-بابى 2-تارماعى بويىنشا قىلمىستىق ءىس قوزعالدى. تەرگەۋ امالدارى جۇرگىزىلىپ جاتىر»، - دەپ حابارلانعان ۆەدومستۆو مالىمەتىندە.

قامشى-اقپارات