بوكستان وليمپيادا چەمپيونى باقتيار ارتايەۆتىڭ قاتىسۋىمەن بولعان وقيعا جونىندەگى قىلمىستىق ءىس توقتاتىلدى. Tengrinews.kz تىلشىسىنە بۇل اقپاراتتى سپورتشىنىڭ ادۆوكاتى جارقىنبەك جۇمىروۆ حابارلادى.
“قىلمىستىق ءىس قىلمىس قۇرامىنىڭ جوقتىعىنا بايلانىستى توقتاتىلدى”، – دەپ جاۋاپ بەردى ادۆوكات. الەۋمەتتىك جەلىلەردە Instagram قولدانۋشىلارىنىڭ ءبىرىنىڭ فوتوسۋرەتى جاريالاندى. وندا باقتياردىڭ اۋەجايدا وتىرعانى تۇسىرىلگەن. فوتونىڭ استىنا ءىستىڭ شەشىلگەنى جانە ارتايەۆتىڭ لوندونعا وقۋعا كەتىپ بارا جاتقانى تۋرالى جازىلعان. استانا قالالىق ىشكى ىستەر دەپارتامەنتى ازىرشە بۇل جونىندە تۇسىنىك بەرگەن جوق.
ەسكە سالا كەتەيىك، باقتيار ارتايەۆ استانا پوليسياسى قوزعاعان قىلمىستىق ءىستىڭفيگۋرانتى اتانعان بولاتىن. استانا قالالىق ىشكى ىستەر دەپارتامەنتىنە قالا تۇرعىنى ايسۇلۋ ىبراشيەۆا شاعىم ءتۇسىرىپ، 29 ماۋسىمعا قاراعان ءتۇنى ارتايەۆتىڭ مۇنى بەتىنەن ۇرعانىن ايتقان. وقيعا بولعان كوڭىل كوتەرۋ ورنىنىڭ كۇزەتشىلەرى قىزدىڭ ايتقاندارىنجوققا شىعاردى. ولار ارتايەۆتىڭ قىزدى ۇرعانىن كورمەگەن.
ارتايەۆتىڭ ءوزى قارسى مالىمدەمە جاساپ، ايسۇلۋدىڭ مۇنى ىشىنەن تەپكەنىن ايتتى. “بي الاڭىندا دوسىممەن بىرگە تار جولمەن ءوتىپ بارا جاتقانمىن، كەيىن ايقاي ەستىدىم دە ارتقا بۇرىلدىم. كىمنىڭ ايقايلاعانىن تۇسىنبەدىم. قاراسام، دوسىم قىزدى ۇستاپ تۇر، ول ايقايلاپ، بىرەۋدى ۇرعىسى كەلىپ جاتىر. ول مەنى تانىدى. دوسىم قىزدى سابىرعا شاقىردى. ول قىزدى بوساتقان كەزدە، قىز كەلىپ، مەنى ىشىمنەن ءبىر تەپتى. مەن ول تۋرالى ايتقىم كەلمەگەن، ءبىراق ءقازىر ساراپتامادان ءوتتىم، كوزىمنىڭ استىنا داق تۇسكەن”، – دەگەن بولاتىن ارتايەۆ.
