«جالپى مەديسينا جانە عىلىمي بيولوگيا ماماندىقتارىن تاڭداعانمىن. بالكىم، ماماندىق تاڭداعاندا قاتەلەسكەن بولارمىن. ءبىراق 93 بالمەن گرانتقا تۇسە الماي قالعانىمدا قاتتى سوققى الدىم. ەسىمدى ءالى جيا الماي ءجۇرمىن. ءبىراق ءوزىم تانيتىن، 88 بالل جيناعان «التىن بەلگى» يەگەرى گرانت الىپ كەتتى. مەن تاپسىرعان ماماندىقتىڭ ورىس توبىنا تاپسىرعاندار 81 بالمەن گرانت ۇتىپ الدى» دەيدى سىمبات.

125 بالمەن تەگىن وقۋعا تۇسە الماۋ

شىعىس قازاقستاندىق اسەل شاحانتايەۆا 93 بالمەن جۋرناليستيكا فاكۋلتەتىنە قازاق توبىنا وقۋعا تۇسە الماي قالعان. تالاپكەر «جۋرناليستيكا» ماماندىعىنىڭ ورىس توبىنا 83 بالل جيناعاندار گرانت يەلەنگەن كورگەندە قاتتى وكىنگەنىن ايتادى.

مەملەكەتتىك وقۋ گرانتى تىزىمىندەگى قازاق جانە ورىس توبىنا تۇسكەن تالاپكەرلەردىڭ ۇپاي كورسەتكىشتەرى. 11 تامىز 2014 جىل.

ازاتتىق تىلشىسىنەن ءاتى-جونىن جاريالاماۋدى وتىنگەن الماتىلىق تالاپكەردىڭ سوزىنشە، ول 125 بالمەن گرانت يەلەنە الماعان، ويتكەنى ءوزى تاڭداعان ءتورت ماماندىق بويىنشا دا (مەملەكەتتىك باسقارۋ، الەمدىك ەكونوميكا، حالىقارالىق ەكونوميكالىق قاتىناستار، قارجى) بايقاۋ تىم كۇشتى بولىپ، تەك ۇزدىك بەلگى يەلەرىنىڭ اراسىندا وتكەن. تالاپكەر اتا-اناسىنىڭ ءوزىن ەندى شەتەلدە وقىتۋ مۇمكىندىگىن قاراستىرىپ جاتقانىن ايتتى.

الماتىلىق اسلان قاپارجانوۆ – «رەجيسسۋرا» ماماندىعى بويىنشا 96 بالمەن گرانتقا ىلىگە الماعان تالاپكەر. ول: «ورىس توبىنا تاپسىرعانىمدا وسى جيناعان ۇپايىممەن گرانتقا وڭاي تۇسەر ەدىم. ورىس توبىنا تۇسكەن تالاپكەرلەردىڭ ەڭ جوعارى كورسەتكىشى 84 بالل بولىپ تۇر» دەيدى.

بيىلعى مەملەكەتتىك گرانتتار تىزىمىندە «مۇراجاي ءىسى» ماماندىعى بويىنشا قازاق توبىنا 77 ۇپاي جيناعاندار ەڭ سوڭعى بولىپ تىزىمگە ءىلىنىپ تۇرسا، ورىس توبىنا تۇسكەندەردىڭ ەڭ جوعارى ناتيجەسى 74 بالل بولىپ تۇر. بۇل ماماندىققا 53 بالل جيناعاندار ورىس توبىنا گرانتقا ءتۇسىپ كەتكەن.

«مەتاللۋرگيا» ماماندىعى بويىنشا قازاق توبىنا 68 بالل جيناعاندار تۇسە الماسا، ورىس توبىنا 50 بالل جيناعاندار گرانت ۇتىپ العان.

«گرانت ءبولۋ جۇيەسىن وزگەرتسىن!»

بۇل جايت اتا-انالار مەن ۇستازداردىڭ دا نارازىلىعىن تۋدىرىپ جاتىر. ماسەلەن، وسكەمەندەگى مەكتەپتەردىڭ بىرىندە قىزمەت اتقاراتىن ۇستاز ساليما اسپانبەكوۆانىڭ جوعارى بالل جيناعان ەكى شاكىرتى گرانت الا الماي قالعان. ول ءبىلىم مينيسترلىگى گرانت ءبولۋ جۇيەسىن وزگەرتۋ كەرەك دەپ سانايدى.

مەملەكەتتىك وقۋ گرانتى تىزىمىندەگى قازاق جانە ورىس توبىنا تۇسكەن تالاپكەرلەردىڭ ۇپاي كورسەتكىشتەرى. 11 تامىز 2014 جىل.

«81 بالل جيناعان ەكى وقۋشىمىز قازاق توبىنا «مەحانيكا» ماماندىعى بويىنشا گرانتقا تۇسە الماي قالدى. ەسەسىنە ولار تاپسىرعان ماماندىقتىڭ ورىس توبىنا 51 بالمەن گرانتقا ءتۇسىپ كەتكەندەر بار. ءبىلىم جانە عىلىم مينيسترلىگى گرانت ءبولۋ ەرەجەسىن قايتا قاراپ، تالاپكەرلەردى قازاق جانە ورىس توپتارى دەپ بولمەي كونكۋرستى بىرگە ۇيىمداستىرۋ كەرەك. كەيىن وقۋعا تۇسكەننەن كەيىن قازاق جانە ورىس توبىنا بولگەن ءجون» دەيدى ءمۇعالىم.

ال 93 بالمەن قازاق توبىنا گرانتقا تۇسە الماعان وسكەمەندىك اسەل شاحانتايەۆانىڭ اناسى ايشانىڭ پايىمداۋىنشا، گرانت ءبولۋ ەرەجەسى كوپ تالاپكەرگە ءتيىمسىز.

«جىل بويى دايىندالادى. 93 بالل الادى دا، قازاق توبىنا گرانتقا تۇسپەي قالادى (اقىلى وقۋعا ءتۇسۋدىڭ ورتاشا كورسەتكىشى – 70 بالل). ال ورىس توبىنا 85 بالل جيناعاندار گرانت ۇتىپ الادى. بۇل ءبىلىمدى باعالاۋ دەپ ايتا المايمىن. امال جوق ەندى قىزىمىزدى اقىلى تۇردە وقىتامىز» دەيدى ول.

ال گرانتتاردى بولۋمەن اينالىسقان ءبىلىم جانە عىلىم مينيسترلىگىنىڭ ءاتى-جونىن جاريالاماعان وكىلى بۇل جايتقا بايلانىستى ازاتتىققا: «كونكۋرس قازاق جانە ورىس توپتارىنىڭ اراسىندا جەكە-جەكە وتكىزىلەدى. ال تالاپكەرلەر قاي تىلدە وقۋعا قۇجات تاپسىرسا دا ءوز ەرىكتەرى، ەش شەكتەۋ جوق» دەپ جاۋاپ بەردى.

بيىل تالاپكەرلەرگە 34 165 مەملەكەتتىك گرانت بولىنگەن. ونىڭ 2 530-ى جوعارى وقۋ ورىندارىنىڭ دايارلىق بولىمدەرىنە، 31 635ء-ى 1-كۋرسىنا تۇسۋگە بەرىلدى. بيىلعى ماۋسىم ايىندا وتكەن ۇبت-عا 92 مىڭنان استام مەكتەپ ءبىتىرۋشى قاتىسقان. ولاردىڭ 63 مىڭنان استامى سىناقتى قازاق تىلىندە، 28 مىڭنان استامى ورىس تىلىندە تاپسىرعان ەدى.

"ازاتتىق راديوسى"

(اۋەلگى تاقىرىپ: جوعارى بالمەن گرانتقا جەتپەگەندەر نارازى)