«ۋكراينا پرەزيدەنتى پەتر پوروشەنكو ۋكراينا تەرريتورياسىنا ءتۇن ورتاسىندا باسىپ كىرگەن رەسەي اسكەري كولىكتەرىنىڭ ۋكراين ارتيللەريالارى جاعىنان تالقاندالعانىن مالىمدەدى»،- دەپ حابارلايدى «حاففينگتون پوست» كەشەگى اقپاراتىندا.

ۋكراينا پرەزيدەنتى پەتر پوروشەنكو بريتانيا پرەمەر-مينيسترى ديەۆيد كەمەرونمەن تەلەفونداعى سويلەسۋدە ۋكراينا كۇشتەرىنىڭ شىعىس ۋكراينا شەكاراسىنان باسا كوكتەپ كىرگەن رەسەي اسكەري كولىكتەرىنىڭ كوزىن قۇرتقانىن ايتقان. «ۋكراينا پرەزيدەنتىنىڭ رەسمي سايتى دا بۇل دەرەكتى ناقتىلاپ وتىر. پرەزيدەنت سايتىنىڭ اقپاراتى بويىنشا، اقپارات سەنىمدى جانە ناقتىلانعان، سەبەبى، بۇل قاقتىعىستا اسكەري كولىكتەردىڭ دەنى ۋكراين ارتيللەريالارى جاعىنان تالقاندالعان»،- دەيدى ABC News. رەسەيدىڭ ۋكرايناعا باسقىنشىلىعىن ەرتەدەن-اق مولشەرلەگەنىن ايتقان ناتو باس حاتشىسى اندەرس فوگ راسمۋسسەن: « ءبىز كەشە تۇندە كۋا بولعان جاعداي - بۇرىننان-اق ءبىز كورىپ كەلە جاتقان ىستەردىڭ تابيعي جالعاسى»،-دەپ وتىر. وسىدان كەيىن، اق ءۇي دە وسى جايىندا ەسكەرتۋ جاساپ، جاقىننان بەرى ۋكرايناعا تونگەن ءقاۋىپتىڭ ۇلعايىپ بارا جاتقانىن جەتكىزدى. ال، بريتانيا رەسەي ەلشىسىن شاقىرىپ، رەسەيدىڭ ۋكرايناعا باسىپ كىرۋى تۋرالى تۇسىنىكتەمە بەرۋىن تالاپ ەتكەن. ەۋرووداقتىڭ سىرتقى ىستەر مينيسترلەرى دە رەسەيدىڭ ۋكرايناعا جاساعان اسكەري قيمىلدارى حالىقارالىق زاڭداردى كوپە-كورنەۋ بۇزعاندىق دەپ ەسكەرتىپ وتىر. اتالعان جاعدايدان كەيىن ۋكراينا جاعى رەسەي تاراپىنان كەلەتىن ءقاۋىپتىڭ اسقىنىپ كەلە جاتقانىن ايتىپ، الاڭداۋشىلىق بىلدىرگەنىن جازادى باتىس اقپارات قۇرالدارى. ال، رەسەي تاراپى بۇل قاقتىعىستى تەرىستەگەنىمەن، ۋكراينا اسكەري كۇشتەرىنىڭ وكلى اندرەي لىسەنكو جۋرناليستەرمەن بولعان بريفينگتە كييەۆ كۇشتەرنىڭ قاراڭعى تۇندە ۋكراينا شەكاراسىنان باسا كوكتەپ كىرگەن ءبىر رەسەيلىك اسكەري كولىكتى تۇتقىنداعانىن پاش ەتىپ وتىر. ۋكراينا شەكاراسىنداعى اتىستاردا رەسەيلىك قارۋلاردىڭ كوپتەپ قولدانىلعاندىعىن، قولدانىلعان قارۋلاردىڭ ىشىندە مالايزيالىق MH17 جولاۋشىلار ۇشاعىن اتىپ ءتۇسىردى دەلىنگەن «بۋك» زەنيتتى زىمىران كەشەنىنىڭ دە بار ەكەندىگىن جازادى بريتاندىق « The Guardian» اقپاراتى.

سانات ناققازاق