ەو رەسەيگە تاسىمالداۋعا تىيىم سالىنعان ازىق-تۇلىكتى تەگىن تاراتادى. بۇل تۋرالى ەو-نىڭ رەسمي سايتىنا سىلتەمە جاساپ Tengrinews.kz  جازدى. مۇنداي شارا رەسەيلىك سانكسيادان اۋىلشارۋاشىلىعى تاۋارى نارىعىن قورعاۋ ءۇشىن قولدانىلىپ وتىرعان كورىنەدى.  

"رەسەي ءبىزدىڭ اۋىلشارۋاشىلىعى ونىمدەرىن تاسىمالداۋعا تىيىم سالعاننان كەيىن نارىقتا ورىن العان جاعدايدى ەسكەرە وتىرىپ، مەن ەۋروپالىق نارىقتا جەمىس-جيدەك پەن كوكونىستەر ۇسىنىسىن قىسقارتۋعا مۇمكىندىك بەرەتىن توتەنشە شارالاردى قولدانۋدى ۇسىنامىن" دەپ مالىمدەگەن 18 تامىزدا ەو-نىڭ اۋىلشارۋاشىلىعى بويىنشا كوميسسارى داچيان چولوش. داعدارىسقا قارسى شارالاردى جۇزەگە اسىرۋ ءۇشىن شامامەن 125 ميلليون ەۆرو ءبولىنۋ كوزدەلگەن.

ەۋروپالىق وداق، نەگىزىنەن، جىلدام بۇلىنەتىن، ارتىعىمەن ۇسىنىلىپ جاتقان جەمىس-جيدەك پەن كوكونىستەردى ساتىپ الماقشى. رەسەي شەكتەۋىنەن زارداپ شەككەن ازىق-تۇلىكتى تاسىمالداۋشىلاردىڭ ىرىلەرىنە دە، سول سەكىلدى ۇساق فەرمەرلەرگە دە قولداۋ كورسەتىلەدى دەپ حابارلانادى. بۇل شاراعا ىلىنەتىن تاۋارلارعا قىزاناق، ءتۇرلى-تۇستى قىرىققابات، ساڭىراۋقۇلاق، ءجۇزىم، قيار جانە باسقا دا مەرزىمدى باۋ-باقشا داقىلدارى ەنەدى. كەيىننەن ۇكىمەت مۇنىڭ بارلىعىن ەو بويىنشا تەگىن تاراتاتىن بولادى.

ەسكە سالا كەتەلىك، تامىزدىڭ باسىندا رەسەي وزىنە قارسى سانكسيا قولدانعان باتىس ەلدەرىنە سيىر ەتىن، شوشقا ەتىن، قۇس ەتىن، بالىق، كوكونىستەر، جەمىس-جيدەك، ءسۇت ونىمدەرىن تاسىمالداۋعا تىيىم سالعان بولاتىن.

قامشى-اقپارات