اتىراۋ وبلىستىق سوتىندا ماناربەك ۋتەۋوۆتىڭ حاتىنا قاتىستى ءتورت ەكس-پوليسەيدىڭ اپەلياسيالىق شاعىمى قارالدى. پوليسيا مەكەمەلەرىنىڭ بۇرىنعى جەدەل ۋاكىلدەرى ازامات دوستانوۆ، ءىلياس ستامعالييەۆ، ەكس-تەرگەۋشى ەرنار ىزدىبايەۆ جانە اعا انىقتاۋشى نۇرجان ورازعالييەۆ «وكىنىپ»، امنيستياعا ىلىگۋگە ءوتىنىش سۇرادى، دەپ حابارلايدى «اق جايىق» گازەتى.

سوتتالۋشىلاردىڭ وزدەرىن سوت پروسەسىنە اكەلمەدى. ادۆوكاتتار سوت ۇستىندە ءوز قورعالۋشىلارىنىڭ ءالى جاس ەكەنىن، قىزمەت ورىندارىنداعى ولارعا قاتىستى وڭ پىكىرلەردى جانە وتباسىنداعى جايسىز جاعدايلاردى ەسكەرۋىن سۇرادى. ماسەلەن، ءىلياس ستامعالييەۆتىڭ كامەلەت جاسقا تولماعان ەكى بالاسى بار، ال نۇرجان ورازعالييەۆ – ءوز وتباسىندا جالعىز بالا ەكەن.

اتىراۋ وبلىستىق سوتىنىڭ قىلمىستىق ىستەر جونىندەگى القاسى ءتورت سوتتالۋشىنىڭ باس بوستاندىعىنان ايىرۋ جازاسىن باس بوستاندىعىن شەكتەۋ جازاسىنا وزگەرتتى. قاۋلى جاريالانعان كۇننەن باستاپ كۇشىنە ەندى.

ەسكە سالا كەتەيىك، 2016 جىلدىڭ 28 جەلتوقسانىندا ەكس-پوليسەيلەردى 3 جىلعا باس بوستاندىعىنان ايىرعان بولاتىن. ولاردى "دالەلدى قولدان جاساۋ"، "كىناسىز ادامدى كوپە-كورىنەۋ قىلمىستىق جاۋاپقا تارتۋ"، "قىزمەت بابىن اسىرا پايدالانۋ" جانە "قىزمەت بابىندا جالعان قۇجات جاساۋ" باپتارى بويىنشا ايىپتى دەپ تاپقان.

پوليسيا قىزمەتكەرلەرى بۇرىنعى پوليسەي، جەرگىلىكتى تۇرعىن دميتريي كيمدى ۇرلاپ اكەتىپ، ءولتىردى دەگەن ايىپتارمەن سوتتالعان ماناربەك وتەۋوۆتىڭ "وكىنۋ حاتىنان" سوڭ ۇستالعان.

وتەۋوۆ حاتىندا بۇرىنعى باسشىلىعىن ءوزىنىڭ قىلمىسىنا جانە باسقا دا قىلمىستارعا قاتىسى بارىن ايتىپ، اتىراۋ پوليسياسىنىڭ جوعارى شەندى بىرنەشە شەنەۋنىگىنىڭ اتىن اتاعان. وتكەن جىلى مامىر ايىندا سوت ونى 22 جىلعا سوتتاعان.