رەسەي تاراپى شىعىس ۋكرايناعا جىبەرگەن جۇك كولىكتەردىڭ كييەۆتىڭ رۇقساتىنسىز ۋكراينا تەرريتورياسىنا كىرۋىن باتىس ەلدەرى: «ۋكراينا قاۋىپسىزدىگىنە تىكەلەي تونگەن ءقاۋىپتى ۇلعايتتى»،- دەپ ايىپتاپ وتىر.
«رەسەي « گۋمانيتارلىق كومەگىنىڭ» ۋكراينا بيلىگىنىڭ كەلىسىمىنسىز شەكارادان باسا كوكتەي كىرۋى ۋكراينانىڭ «اشىق شاپقىنشىلىققا ۇشىراۋى» بولماق»،- دەيدى ناتو تاراپى.
ناتو باس حاتشىسى اندەرس فوگ راسمۋسسەن رەسەيدىڭ ارتيللەريالىق قولداۋلارى شىعىس اۋماقتاعى سوعىسىپ جاتقان ۋكراين كۇشتەرىنە توتەپ بەرۋ ءۇشىن جاسالىپ وتىرعان شارۋا ەكەندىگىن ايتادى. ال، پەنتاگون وكىلى دجون كيربي رەسەيدىڭ مۇنىسىنىڭ زاڭسىز باسىپ كىرۋ دەپ سانايدى.
«بۇل ۋكراينا تاراپتىڭ رۇقساتىنسىز جانە قىزىل كرەستتىڭ ارالاسۋىنسىز جاسالعان اشىق زاڭ بۇزۋشىلىق ارەكەت»،- دەيدى راسمۋسسەن. ونىڭ ايتۋىنشا، رەسەيدىڭ بۇل قىلىعى ونىسىز دا ۋشىعىپ تۇرعان وڭىردەگى داعدارىستى ءتىپتى دە اسقىندىرىپ وتىر.
«رەسەي حالىقارالىق كەلىسىمدەردەگى ۋادەلەرىنە، اسىرەسە، جاقىندا عانا بەرليندەگى جانە جەنيەۆاداعى بەرگەن ۋادەلەرىنە اۋىر دارەجەدە قيعاشتىق جاساپ وتىر. وعان قوسا، ۋكراينانىڭ ەگەمەندىگىنە قول سۇعىپ وتىر... رەسەي ءوزى جاندىرىپ، ءوزى ۇرلەگەن شوقتى ءتىپتى دە قوزدىرۋدا. حالىقارالىق پرينسيپتەردى وسىلاي كوپە-كورنەۋ بۇزۋىنان-اق، رەسەي شىنىندا ونداعى حالىققا كومەك بەرگەلى ءجۇر مە، جوق الدە، ونداعى قارۋلى سەپاراتيستەرگە كومەگىن جالعاستىرعىسى كەپ ءجۇر مە دەگەن سۇراق تۋىندايدى»،- دەيدى ناتو حاتشىسى.
«ونىڭ ۇستىنە، ءبىز تانكتەردى، برونەترانسپورتەرلەردى جانە ارتيللەريالاردى قامتىعان جوعارى قۋاتتى قارۋلاردىڭ شىعىس ۋكرايناداعى سەپاراتيستىك توپتارعا جىبەرىلگەنىن كورىپ وتىرمىز»،- دەيدى اندەرس فوگ راسمۋسسەن.
دەرەككوز: رەيتەر اگەنتتىگى.
دايىنداعان: سانات ناققازاق.
