الماتىلىق جارناما اگەنتتىگى قۇرمانعازى ساعىرباي ۇلى مەن الەكساندر پۋشكيننىڭ ءسۇيىسىپ تۇرعانى بەينەلەنگەن پوستەر جاساپ شىعارعان.  Tengrinews.kzء-تىڭ جازۋىنشا سۋرەتتەگى جارناما پوستەر Havas Worldwide Kazakhstan كومپانياسىندا جاسالعان، تاپسىرىس بەرۋشى - قازاقستاننىڭ لگبت-قوعامداستىعى. جوبا الماتىداعى قۇرمانعازى جانە پۋشكين كوشەلەرىنىڭ قيىلىسىندا ورنالاسقان گەي-كلۋب - "ستۋديا 69" كوڭىل كوتەرۋ ورنىن جارنامالايدى ەكەن.

ازعىندىقتى ناسيحاتتايتىن جانە قازاقتىڭ ۇلى قايراتكەرى قۇرمانعازىنى قورلايتىن جارناما الەۋمەتتىك جەلىلەردە كوپشىلىكتىڭ نارازىلىعىن تۋعىزىپ جاتىر. قولدانۋشىلار بۇل جوبا ۇلى قايراتكەرلەردىڭ بەينەسىن قورلاپ، ءداستۇرلى ەمەس جىنىستىق وريەنتاسيانى ناسيحاتتايدى دەپ ەسەپتەيدى. ءبىراق كەيبىرەۋلەرگە اتىشۋلى پوستەر ءتىپتى ۇناعان - ولار "وتاندىق شىعارماشىلىقتىڭ بەدەۋ دالاسىنان قانداي دا ءبىر كرەاتيۆ كورگەندەي" بولعان. پوستەر اۆتورلارىنىڭ ءبىرى، كوپيرايتەر ۆالەريي ۆولودين جوباعا قاتىستى تۇسىنىك بەردى. "بۇل - باتىل جۇمىس، ۇنەمى تەپەرىش كورىپ جۇرەتىن گەي-قوزعالىس جاعدايىندا ول مەيلىنشە ءدال ءارى ءوزىن-وزى اقتايدى. #redjolbors فەستيۆالىنىڭ قازىلار القاسى ونى قولا جۇلدەگە لايىق دەپ شەشتى، ءبىز قازىلار القاسىن سىناي المايمىز. جادىگويلىك جويىلسىن!" - دەپ تۇسىنىك جازعان Facebook-تەگى پاراعىندا.

اتالعان جارناماعا قاتىستى تۇركىستان گازەتى «ۇلتتىڭ ۇلىنا اينالعان قۇرمانعازىنى عانا ەمەس، تۇتاس ءبىر ۇلتتى، قازاقتى قورلاعان جەتەسىزدەرگە قۇزىرلى ورگاندار تاراپىنان تىيىم سالىنۋى ءتيىس»، - دەپ جازدى. گازەتتىڭ جازۋىنشا  الەۋمەتتىك جەلىلەر ارقىلى ءبىر بىرىنە ۇندەۋ تاستاعان قانداستار قۇرمانعازىنىڭ ۇرپاقتارىن تابۋدى جانە قۇزىرلى ورگاندارعا شاعىمدانىپ، الگى گەي كلۋب پەن ونىڭ جارناماسىن جاساعانداردى سوتقا بەرۋگە بەكىنىپ وتىر. 

قامشى-اقپارات