رەسەي مەملەكەتتىك دۋماسى گوموسەكسۋاليزمدى ناسيحاتتاۋعا قارسى زاڭدى وتكەن جىلى ماقۇلداپ جىبەردى. سول سەبەپتى ءبىرقاتار ايماقتاردا ءبىرجىنىستىلاردىڭ تاراپىنان قارسىلىق اكسيالارى ءوتتى. دەسە دە ءقازىر ءتارتىپ رەتتەلىپ كەلەدى، سەبەبى زاڭ بار. ۋكراينا ۇكىمەتى اتالمىش زاڭدى 2012 جىلى قابىلداپ قويعان ەدى. بەلورۋسسيا ۇكىمەتى دە ايانىپ قالايىن دەپ وتىرعان جوق. قازىرگى ۋاقىتتا تالقىلاۋ جۇمىستارى جۇرۋدە. وزبەكستان زاڭى دا قاتال. ەندىگى كەزەكتە قازاقستان باتىل ارەكەت ەتە ءبىلۋى كەرەك.

قاراپ وتىرساق، بۇل تاقىرىپ ۋاقىت وتكەن سايىن ءبىزدىڭ ەلدە دە وزەكتى بولىپ بارادى. جاعداي بۇرىنعىداي ەمەس، وزگەردى. وزگەرگەندە قالاي وزگەردى. جارناما جۇمىستارىنان بولەك، بالالارعا كۇش كورسەتۋ ارقىلى ارام ويىنا جەتۋ وقيعالارى بەلەڭ الدى. مۇنىڭ ءبارى دە شەكتەن شىققاندىقتان بولىپ وتىر. ەندى وندايلار وزدەرىنىڭ لاس ساياساتىن جانداندىرا ءتۇسۋ ماقساتىندا تۇلعالارىمىزدىڭ ەسىمدەرىن پايدالانا باستادى. وسى سەبەپتى بىزدەگى پارلامەنت دەپۋتاتتارى مەن ۇكىمەت مۇشەلەرى ەلدىڭ ىشىندەگى احۋالعا نازار اۋدارىپ، ناقتى ءارى باتىل ارەكەتتەرگە كوشۋ كەرەك دەپ ويلايمىن.

وسى رەتتە ايتا كەتكەن ءجون، ءماجىلىس دەپۋتاتى الدان سمايىل بۇل ماسەلەنى بىرنەشە جىلدان بەرى بەكەردەن-بەكەر كوتەرىپ جۇرگەن جوق. ءبىراق جالعىزدىڭ ءۇنى قايدان شىقسىن. مىنەكي، ءبىر ۋاقىت نازار سالىڭىزشى:

- «ەركەك پەن ەركەكتىڭ، ايەل مەن ايەلدىڭ ۇيلەنۋى، بىر-بىرىمەن جىنىستىق قاتىناس جاساۋى – ونىڭ قۇقى دەگەنگە قالاي كونەسىڭ؟! فرانسيادا، سول سياقتى الەمنىڭ 11 ەلىندە بۇل سوراقىلىق زاڭداستىرىلىپ كەتتى. سونىڭ اسەرى بىزگە دە جەتتى. الماتىدا بىرنەشە گەيكلۋبتار بار. استانادا 4 گەيكلۋب اشىقتان-اشىق جۇمىس ىستەپ جاتىر. وبلىس ورتالىقتارىندا اشىلۋدا. وكىنىشتىسى، سوعان كىرىپ كەتكەن قازاق جاستارى دا بار. وسىنىڭ الدىن الۋ ءۇشىن «تەلەراديو حابارلارىن تاراتۋ تۋرالى» زاڭعا ءداستۇرلى ەمەس سەكسۋالدىق باعداردى ناسيحاتتايتىن اقپاراتقا تىيىم سالۋ تۋرالى نورمانى ەنگىزىپ وتىرمىز ازىرگە. ءبىراق بۇل جەتكىلىكسىز.

تاياۋدا ماجىلىستە قىلمىستىق كودەكستىڭ جاڭا رەداكسياسى قارالدى جانە ماقۇلداندى. مەن سول كودەكس جوباسىنا ەكى ۇسىنىس بەردىم. ءبىرىنشىسى – گەيكلۋبتاردىڭ قىزمەتىن بۇكىل قازاقستان اۋماعىندا زاڭسىز دەپ تانىپ، جابۋ، ەكىنشىسى – ءبىر جىنىستى قاتىناستارعا باراتىن ادامداردىڭ بۇل ارەكەتىن قىلمىس دەپ قاراۋ، سوعان بايلانىستى جازا قولدانۋ. ەكەۋى دە وتكەن جوق. نەگە دەسەڭىز، «حالىقارالىق قاۋىمداستىق سولاي دەيدى، ەقىۇ بۇلاي دەيدى» دەگەن سىلتاۋلار ايتىلدى. ءبىراق تۇبىندە ءبىز بۇلاردى جابۋىمىز كەرەك! ەكونوميكا سەنىڭ ارىڭنان، ۇياتىڭنان، حالقىڭنىڭ داستۇرىنەن، كەلەشەك ۇرپاقتىڭ يماندىلىعىنان قىمبات ەمەس! ويلاڭىزشى، ەر بالاڭىز ەرتەڭ ءبىر جىگىتتى ۇيگە الىپ كەلىپ: «مىناعان ۇيلەنەم»،- دەپ تۇرسا، ماسقارا ەمەس پە؟!

مەنى قىنجىلتاتىنى – قازاق قوعامىنىڭ سالعىرتتىعى. وسى ماسەلەنى ەل بولىپ، جۇرت بولىپ كوتەرۋ كەرەك قوي. زيالى قاۋىم ناقتى تالاپتار قويىپ، مالىمدەمە جاساسا، «ءبىز ۇرپاعىمىز ءۇشىن الاڭدايمىز»،- دەپ ايقايلاپ تۇرىپ ايتسا عوي. ونىڭ ورنىنا، «بۇل ماسەلەنى سىزدەر كوتەرگەن ەكەنسىزدەر، جارايسىزدار، قوستايمىز» دەيدى دە، قامسىز جۇرە بەرەدى. رۋحاني تازالىق جولىندا ىمىراسىز كۇرەس كەرەك!»

توقسان اۋىز ءسوزدىڭ توبىقتاي ءتۇيىنى – ادام بالاسىنىڭ بولمىسىنا جات مۇنداي ارەكەتتەرگە دەر كەزىندە توسقاۋىل قويىلماسا بەرەكە-بىرلىگىمىز ىدىراپ، سالاماتتى، باي-قۋاتتى ەل بولۋدان قالامىز. ولاي بولماسىن دەسەك زاڭ كەرەك. قۇر ءسوز ەمەس، ناقتى ارەكەتتەردىڭ ۋاقىتى كەلدى، اعايىندار!

 ازامات بيتان (جەكە بلوگىنان)