ۋكراينا پرەزيدەنتى پەتر پوروشەنكو وسى ەلدىڭ پارلامەنتى - جوعارعى رادانى تاراتىپ، پارلامەنت سايلاۋىن 26 قازان كۇنى وتكىزۋگە جارلىق شىعاردى. بۇل شەشىمى جايلى ول Twitter-دە حابارلاعان.
زاڭ بويىنشا، سايلاۋ جارلىق شىققان سوڭ 60 كۇن ىشىندە ۇيىمداستىرىلۋى ءتيىس. ازاتتىق راديوسىنىڭ جازۋىنشا پوروشەنكو پارلامەنتتى تاراتۋدان بىرنەشە ساعات بۇرىن تەلەفونمەن ەۋروپا كەڭەسىنىڭ پرەزيدەنتى حەرمان ۆان رومپەيمەن سويلەسكەن. اڭگىمە بارىسىندا پوروشەنكو 25 تامىز كۇنى ەلدىڭ شىعىس بولىگىنە رەسەيلىك تانكىلەر كىرگەنىنە الاڭداۋشىلىق بىلدىرگەن.
بۇگىن، 26 تامىز مينسكىدە پوروشەنكو رەسەي پرەزيدەنتى ۆلاديمير پۋتينمەن جانە ەۋروپا وداعىنىڭ (ەو) سىرتقى ساياسات جونىندەگى جوعارعى كوميسسارى كەترين ەشتونمەن كەزدەسۋى ءتيىس. سونداي-اق بەلارۋس استاناسىندا "كەدەن وداعى-ەو-ۋكراينا" فورماتىنداعى وتىرىس بولاتىنى دا حابارلانعان. وعان قازاقستان پرەزيدەنتى نۇرسۇلتان نازاربايەۆ تا قاتىسادى. بۇل كەزدەسۋلەردە ۋكراينا داعدارىسىن شەشۋ جولدارى قاراستىرىلادى. كييەۆ پەن ماسكەۋ اراسىنداعى گاز پروبلەماسى دا تالقىلاناتىنى ايتىلدى.
قامشى-اقپارات
پىكىر قالدىرۋ