سوڭعى ۋاقىتتا مينيستر ەرلان ساعادييەۆ تە، ول باسقاراتىن ءبىلىم جانە عىلىم مينيسترلىگى دە — اقپارات قۇرالدارىنىڭ باستى تاقىرىبىنا اينالعانى جاسىرىن ەمەس. ءمينيستردى جاقسى كورەتىن دە، جەك كورەتىن دە، قولدايتىن دا، قارسى شىعاتىن دا ەڭ نەگىزگى ەلەكتورات — مەكتەپ مۇعالىمدەرى. ول تۇسىنىكتى دە، دەپ جازادى "قاسىم"-اقپارات" پورتالى.
ءبىراق مينيستر نەلىكتەن ۇنەمى سۇستى بولىپ كورىنەدى؟ ارينە، ول باسقاراتىن ۆەدومستۆو بالاباقشا ەمەس ەكەنى تۇسىنىكتى. دەگەنمەن دە قانداي قاۋىرت بولسا دا، اۋديتوريا – باس ۇستازدىڭ رياسىز كۇلكىسىن كورگىسى كەلەدى ەمەس پە؟ مينيستر جۇرتشىلىقتان جارقىن كۇلكىسىن نەگە جاسىرادى؟ مۇمكىن ول مىنەزىنە بايلانىستى بولار؟ بۇل سۇراقتارعا جاۋاپتى فيزيوگنوميست-مامان، پسيحولوگ ايجان تولەندينادان سۇراپ كورگەن ەدىك. وقىپ كورىڭىز.

— ادامنىڭ مىنەز-قۇلقىن بەت-بەينەسىنەن وقۋ فيزيوگنوميست-ماماننىڭ جۇمىسى. ياعني، شيرىققان بۇلشىق ەتتەرىنەن باستاپ ەرنىنە دەيىن زەر سالساق، ادامنىڭ قانداي ەكەنىن، ءقازىر قانداي كوڭىل-كۇيدە جۇرگەنىن انىقتاۋعا بولادى. ءمينيستردىڭ بەت-جۇزى سۇر، سۇستى بولىپ كورىنگەنىمەن — ونى قاتىگەز دەپ ايتۋعا كەلمەيدى. مەن ءقازىر قولىمدا تۇرعان مىنا سۋرەتكە قاراپ، ادامنىڭ (ءمينيستردىڭ) قاس ۇشتارىنا، ۇزىندىعىنا، كوز ۇشى مەن فورماسىنا قاراپ ول كىسىنىڭ — وتە سەزىمتال، ۋايىمشىل، تەمپەرامەنتى سالماقتى ءارى كونسەرۆاتيۆتى ادامعا كەلەتىنىن ايتقىم كەلەدى. كوز — جاننىڭ ايناسى دەسەك، ىشكى بۇرىشتارىنا زەر سالساق، ونىڭ (ءمينيستردىڭ) ءوز پرينسيپتەرىنە بەرىك ەكەنىن كورسەتەدى. قاستاردىڭ ءبىر بولىگىنە جانە ءوسۋ باعىتىنا قاراپ، بۇل ادامدى اگرەسسياعا يتەرمەلەۋ وتە قيىن ەكەنىن ايتقىم كەلەدى.

ەندى ءمينيستردىڭ سويلەۋ مانەرىنە، جانە «بۋىن بولشەكتەۋىن»، ياعني مالىمدەمە جاساماس بۇرىن، پۋبليكاعا شىقپاس بۇرىن — توسىننان ەمەس، تىڭعىلىقتى دايىندالاتىن ادامعا ۇقسايدى. سويلەۋ كەزىندە س، ك، ج ارىپتەرىن تىڭداپ كورىڭىز، تەمبەردە سەكەم بار. دەمەك، «مىنانى ايتتىم، كەشەگى ويلاستىرىپ وتىرعان انا مالىمەتتى ايتۋعا ۇمىتپاۋىم كەرەك» دەگەندەي. ول كىسى ءوز پرينسيپتەرىنە قانشا بەرىك بولسا دا، كەيبىر يدەيالارى سىنعا ۇشىراسا، ارگۋمەنتتەردى زەردەلەپ شىعىپ، باس تارتۋى مۇمكىن. كوزدىڭ «اشىلىپ-جابىلۋ» جيىلىگىنە قاراپ، كونفليكت تۋدىراتىن ادامعا ۇقسامايدى. سويلەگەن كەزدە «داۋىس تولقىنىن» تىڭداپ كورىڭىز 0،004 دب-دەن اسپايدى. دەمەك، بۇل كىسى ءوز قول استىنداعى ادامدارعا داۋىس كوتەرمەيدى. ءتىپتى قىزمەتكەرى ءبىر نارسەنى 3 رەت سۇراسا دا، اشۋلانباي، جاۋاپ بەرۋدەن باس تارتۋى مۇمكىن، ءبىراق داۋىس كوتەرمەيدى.
ەندى نەگە كۇلمەيدى دەگەن سۇراققا كەلسەك — ونىڭ ءارتۇرلى سەبەپتەرى بولۋى مۇمكىن. مەن ونىڭ بارلىعىن تارقاتىپ، تاراتىپ ايتقىم كەلمەيدى. مينيستر دەگەن اتى بولماسا، ول دا ادام. ءبىراق، مىسالى ءۇشىن مەنەن ايىرماشىلىعى — ول ۇنەمى وبەكتيۆ نازارىندا. ونىڭ كوڭىل-كۇيى — قوعامنىڭ دا كوڭىل-كۇيىنە اسەر ەتەتىنى جاسىرىن ەمەس. سوندىقتان، سول تاراپتان دا نازار اۋدارعان دۇرىس بولار ەدى. مەنىڭ ويىمشا، ءمينيستردىڭ يميدجمەيكەرلەرى وتە ءالسىز. ءتىپتى ولار بولماۋى مۇمكىن.

مىنە، مينيستر مەكتەپتىڭ اشىلۋىنا قاتىسىپ وتىر — جىميعانى بولماسا، قۋانىشىن جاسىرىپ تۇر.

مىنە، مينيستر، كورمەنى ارالاپ وتىر — وقۋشىعا وسىلاي قاراسا، ارينە، انا شاكىرت ايتار ءسوزىن ۇمىتىپ قالماعاندا، قايدا بارادى.

البەتتە، مينيستر سيركتىڭ ديرەكتورى ەمەس، كۇندە ەلدى ماز-مەيرام قىلاتىن، تۇسىنەمىز. ءبىراق ول جۇزدەگەن رەكتورعا رەكتور، مىڭداعان ديرەكتورعا ديرەكتور، ميلليونداعان وقۋشى ءۇشىن باس ۇستاز ەكەنىن ەستەن شىعارماۋى ءتيىس.
سوندىقتان ءيميدجدىڭ كەي تۇستارىنا دا كوڭىل بولگەن دۇرىس بولار ەدى. يميدج دەگەن كيىم ەمەس، تۇر-الپەت. باياعىدا مىنا كىتاپ نەگە ەسىمدە قالدى، نەگە وقىعىم كەلدى — ويتكەنى مۇقاباداعى كەنجەعالي ساعادييەۆ سەنىم ۇيالاتىپ تۇردى. ءتىپتى سوڭعى رەت پرەزيدەنتپەن كەزدەسكەن كەزدە دە كۇلكىسىنەن تاماشا ەنەرگەتيكا ەسىپ تۇردى.

ءبىلىم ءمينيسترىنىڭ دە قولىنان كەلمەيدى ەمەس. قازاقستان ءوز ءمينيسترىنىڭ مىنا بەينەسىن كۇندە بولماسا دا، ءجيى كورگىسى كەلەدى.