ناتو وكىلى كەشەندى تۇردە قارۋلانعان، از دەگەندە 1000 رەسەي اسكەرى ۋكراينا تەرريتورياسىنا كىرگەنى جانە ولاردىڭ ۋكراينا كۇشتەرىمەن تىكەلەي كەزىككەنى تۋرالى مالىمدەدى. ناتو تاراپتىڭ ايتۋىنشا، ءقازىردىڭ وزىندە ۋكراينا شەكەراسىندا 20،000-نان ارتىق رەسەي اسكەري كۇشتەرى ءجۇر. ال، كييەۆ بۇگىن 100 تانكتى، كەشەندى قارۋلانعان اسكەري كولىكتەردى جانە زىمىران كەشەندەرىن قامتىعان رەسەيدىڭ قارۋلى كەرۋەنى ۋكراينا تەرريتورياسىنا باسىپ كىرگەنىن جاريالادى. ۋكراينا پرەزيدەنتى وسىعان بايلانىستى تۇركياعا ساپارىن دا كۇشىنەن قالدىرعانى ءمالىم. وسىندان كەيىن، بۇۇ قاۋىپسىزدىك كەڭەسى دە رف-نىڭ ۋكرايناعا اسكەر كىرگىزۋىنە بايلانىستى شۇعىل وتىرىس وتكىزگەن. بۇل تۋرالى بريتان ەلشىسى مارك ليولل گرانت: « رەسەي نە ءۇشىن قارۋلى كۇشتەرىن ۋكراينا تەرريتورياسىنا كىرگىزگەنىن تۇسىندىرەتىن بولادى. ءقازىر رەسەي اسكەرلەرىنىڭ ۋكراينا تەرريتورياسىندا جۇرگەنى انىقتالىپ وتىر»،-دەيدى. «رەسەي ۋكراينا تەرريتورياسىنا جىبرەگەن SA-22 سياقتى ەڭ جاڭا اۋە قورعانىس جۇيەلەرى جانە ۋلترا-زاماناۋي جابدىقتارى قازىرگى ۇرىستا اشىق قولدانىلىپ جاتىر»،-دەگەن اقش جاعى رەسەيدىڭ وسى جولعى كوپە-كورنەۋ شاپقىنشىلىعىنا شارا قولدانۋ كەرەك ەكەندىگىن مالىمدەدى.

ال، ۋكراينا تاراپى وسى شۇعىل جاعداي تۋرالى ەۋرووداق ەلدەرىنەن «زور كولەمدى» اسكەري قولداۋ سۇراپ وتىر. ەۋرووداق ۋكراينا توپىراعىندا رەسەي كۇشتەرىنىڭ ءجۇرۋى تۋرالى « قاتتى الاڭداۋلى»  ەكەنىن مالىمدەدى. بريتانيا پرەمەر-مينيسترى ديەۆيد كەمەرون رەسەي تانكىلەرىنىڭ ۋكراينا شەكاراسىنان باسا كوكتەپ كىرۋى « مۇلدەم قابىلداۋعا كەلمەيتىن جانە زاڭسىز» شاپقىنشىلىق دەپ ايىپتادى.  بريتان پرەمەرى ۋلاديمير پۋتين قارۋلى كۇشتەرىن شەگىندىرىپ اكەتپەسە، «سالدارىنىڭ» قيىن بولاتىنىن ايتۋدا. ۋكراينا جاعدايىنا قاتىستى قاتتى الاڭداۋشىلىعىن بىلدىرگەن ول بۇل زاڭسىز ارەكەتتى جەدەل توقتاتۋ كەرەكتىگىن ايتادى. كەلەر اپتادا ۋەلستا وتەتىن ناتو-نىڭ سامميتىندا ءوزىنىڭ وداقتاستارىمەن وسى ماسەلە توڭىرەگىندە شەشىم قابىلدايتىنىن مالىمدەگەن. «رەسەيدىڭ وڭتۇستىك-شىعىس ۋكرايناعا زور كولەمدە باسىپ كىرگەنى تۋرالى ايعاقتامالار مەن دالەلدەمەلەر مەنى قاتتى الاڭداتىپ وتىر. بۇل كورشىلىك پەن ەگەنمەندىككە قاتەر توندىرگەندىك»،-دەيدى ول.