ۋكراينا قارۋلى كۇشتەرىنىڭ وكىلى بۇلىكشىلەردىڭ تۋىن اسقان 10 تانكى مەن ەكى برونەترانسپورتەردىڭ رەسەيدىڭ وتڭتۇستىگىندەگى شەكارادان ۋكرايناعا وتكەندىگىن مالىمدەگەن.
بۇل تۋرالى سولتۇستىكتەن 120 كيلومەتر قاشىقتا جۇرگەن باتىس جۋرناليستەرى دە دونەسكتىڭ تەرىستىگىندە بولعان قيان-كەسكى ۇرىسقا كۋاگەر بولعانىن جازادى. ۇرىس مايدانىنىڭ جاعدايى جونىندە: «قالانىڭ سولتۇستىگىندەگى ەلدى مەكەندەردە جارىلىستار بولىپ، تۇتىندەر بۋداقتاپ جاتىر»،-دەيدى باتىس جۋرناليستەرى. ۋكراينا قارۋلى كۇشتەرىنىڭ اقپاراتىنشا، وتكەن 24 ساعاتتىق ۇرىستا 4 اسكەر قازا تاۋىپ، 31 اسكەر جارالانعان.
بۇل قاقتىعىس ۋكراينا پرەزيدەنتى پەتر پوروشەنكو مەن رەسەي باسشىسى ۆلاديمير ءپۋتيننىڭ بىرنەشە ايدان بەرى ءبىرىنشى رەت مينسكىدە كەزدەسۋىنە تۇسپا-تۇس كەلىپ جاتىر دەيدى ولار. كرەملدىڭ دۇيسەنبىدەگى تاعى ءبىر رەتكى گۋمانيتەرلىق كومەكتى ۇيىمداستىراتىنى تۋرالى مالىمدەمەسىنەن كەيىن، وسى جولعى كەزدەسۋدىڭ سالماعىنىڭ اۋىرلاعانىن جازادى AFP جۋرناليستەرى.
«رەسەي 230 جۇك كولىكتەرى 1800 توننالىق «گۋمانيتارلىق كومگىن» رەسەيشىل سەپاراتيستەردىڭ باقىلاۋىنداعى لۋگانسك قالاسىنا قىزىل كرەستتىڭ ەش ارالاسۋىنسىز جىبەردى. مۇنى كييەۆ جاعى «تىكەلەي شاپقىنشىلىق» دەپ ايىپتاعانىمەن، جۇك كولىكتەرى رەسەيگە ىڭ-جىڭسىز قايتىپ ۇلگەردى»،-دەيدى AFP.
دۇيسەنبىدەگى شاكارا ماڭىنداعى قاقتىعىس جايىندا قاراما-قارسى مىلىمدەمەلەر ايتىلۋدا. قالاشىققا جاقىن ماڭداعى ءبىر جەرگىلىكتى تۇرعىننىڭ AFP-عا تەلەفون ارقىلى بەرگەن اقپاراتى بويىنشا، شەكارالىق اۋماقتان جارىلىستاردىڭ داۋىسى انىق ەستىلىپ تۇرعان. الايدا، رەسەي سىرتقى ىستەر ءمينيسترى لاۆروۆ بۇل ايتىلىمدى تەرىستەپ: «مەن بۇل تۋرالى ەشتەڭە ەستىمەدىم، الايدا، وندا ءبىز تۋرالى جاڭساق اقپاراتتار جەتكىلىكتى. بۇل جايىندا شەتەلدىڭ باق-تاردىڭ وسى «جاڭالىقتى» ەرتەڭ جاريالايتىنىنا ەش كۇمانىم جوق»،-دەيدى. «ەگەر، بۇل قاقتىعىس ناقتىلانار بولسا، وندا بۇل سەرپىن العان بۇلىكشىلەردىڭ كييەۆتىڭ باقىلاۋىنداعى تەرريتوريالارعا جاڭا سوققىلار بەرە باستاعاندىعىنىڭ ايعاعى ەسەپتەلمەك»،-دەيدى AFP.
قاتىستى مالىمەتتەرگە نەگىزدەلگەندە، ءتورت ايدان ارتىق ۋاقىتتان بەرى جالعاسىپ كەلە جاتقان بۇل ۇرىستا 2،200 ادام قازا تاۋىپ، 400،000 ادام باسپاناسىن تاستاپ، بوسىپ كەتكەن، ال، بۇلىكشىلەر باقىلاۋىنداعى قالالاردا قالعان تۇرعىندار اپتالاپ سۋسىز، جارىقسىز قالعان.
تالعار دالەلعازى
