قازاقستان رەسپۋبليكاسى كونستيتۋسياسىنىڭ 58-بابى، 4-تارماعىنىڭ 2) تارماقشاسىنا سايكەس، بۇگىن  استانادا قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسى وتۋدە. جيىنعا ق ر پرەزيدەنتى نۇرسۇلتان نازاربايەۆ قاتىسىپ وتىر. 

ەلىمىزدىڭ ەڭ جوعارعى وكىلدى ورگانى بولىپ تابىلاتىن زاڭ شىعارۋشى پارلامەنت - تۇراقتى نەگىزدە جۇمىس ىستەيتىن ەكى پالاتادان، ياعني سەنات جانە ماجىلىستەن تۇرادى.

سەنات ءار وبلىستان، رەسپۋبليكالىق ماڭىزى بار قالادان جانە قازاقستان رەسپۋبليكاسىنىڭ استاناسىنان ەكى ادامنان، تيىسىنشە وبلىستىق، رەسپۋبليكالىق ماڭىزى بار قالانىڭ جانە رەسپۋبليكا استاناسىنىڭ بارلىق وكىلدى ورگاندارى دەپۋتاتتارىنىڭ بىرلەسكەن وتىرىسىندا سايلاناتىن دەپۋتاتتاردان قۇرالادى. سەناتتا قوعامنىڭ ۇلتتىق-مادەني جانە وزگە دە ەلەۋلى مۇددەلەرىنىڭ ءبىلدىرىلۋىن قامتاماسىز ەتۋ قاجەتتىلىگى ەسكەرىلىپ، ونىڭ ون بەس دەپۋتاتىن رەسپۋبليكا پرەزيدەنتى تاعايىندايدى. سايلانعان سەنات دەپۋتاتتارىنىڭ جارتىسى ءاربىر ءۇش جىل سايىن قايتا سايلانىپ وتىرادى. سەنات دەپۋتاتتارىنىڭ وكىلەتتىك مەرزىمى – التى جىل.

ءماجىلىس ءجۇز جەتى دەپۋتاتتان تۇرادى. ءماجىلىستىڭ توقسان سەگىز دەپۋتاتى ساياسي پارتيالاردان پارتيالىق تىزىمدەر بويىنشا جالپىعا بىردەي، تەڭ جانە توتە سايلاۋ قۇقىعى نەگىزىندە جاسىرىن داۋىس بەرۋ ارقىلى سايلانادى. ءماجىلىستىڭ توعىز دەپۋتاتىن قازاقستان حالقى اسسامبلەياسى سايلايدى. ءماجىلىس دەپۋتاتتارىنىڭ كەزەكتى سايلاۋى پارلامەنتتىڭ جۇمىس ىستەپ تۇرعان سايلانىمى وكىلەتتىگىنىڭ مەرزىمى اياقتالاردان كەمىندە ەكى اي بۇرىن وتكىزىلەدى. ءماجىلىس دەپۋتاتتارىنىڭ وكىلەتتىك مەرزىمى –بەس جىل.