بۇگىن ق ر پارلامەنتى ءماجىلىسىنىڭ ءتورتىنشى سەسسياداعى العاشقى جالپى وتىرىسى بولىپ ءوتتى. وندا پالاتا ءتوراعاسى قابيبوللا جاقىپوۆ ەلباسى ايقىنداعان مىندەتتەردى جۇزەگە اسىرۋعا دەپۋتاتتىق كورپۋستى بارىنشا جاۋاپتىلىقپەن قاراۋعا شاقىردى. بۇل تۋرالى قازاقپارات جازدى.
«كەشە سەسسيانى اشۋ بارىسىندا مەملەكەت باسشىسى ءبىزدىڭ الدىمىزعا بۇگىنگى كۇننىڭ تالاپتارىنان تۋىندايتىن اۋقىمدى مىندەتتەر قويدى. ەلباسى ايقىنداپ، الدا ەل ومىرىنە ەنگىزىلەتىن زاڭ جوبالارىن مەن ءۇش توپقا بولەر ەدىم. بۇلار - قازاقستان ەكونوميكاسىنىڭ ورنىقتىلىعىنا باعىتتالعان زاڭ جوبالارى، ەكىنشىسى - ەلدىڭ تۇرمىسىن جاقسارتۋعا، ءۇشىنشى - ەل قاۋىپسىزدىگىن قامتاماسىز ەتۋگە باعىتتالعان قۇجاتتار. بۇنداي باسىمدىق بەرىلگەن قۇجاتتاردىڭ ءوزى الداعى سەسسيانىڭ زاڭ شىعارماشىلىق ۇدەرىسىنىڭ قاۋىرت بولاتىنىن كورسەتەدى»، - دەگەن ءماجىلىس سپيكەرى جاقىپوۆ.
سونىمەن قاتار، ءتوراعا بۇگىنگى كۇننىڭ وزىندە دەپۋتاتتار پرەزيدەنت شۇعىل دەپ جاريالاعان مەملەكەتتىك ورگاندار اراسىنداعى قۇزىرەتتىلىكتىڭ ارا جىگىن اجىراتۋعا باعىتتالعان ەكى زاڭ جوباسىن جۇمىسقا العانىن جەتكىزىپ: «اسىرەسە، ازاماتتاردىڭ تۇرمىسىن جاقسارتاتىن، كاسىپكەرلىكتى دامىتۋعا باعىتتالعان، اگروونەركاسىپ كەشەندى دامىتۋ، جەر قويناۋىن پايدالانۋ، ءبىلىم بەرۋ، كوشى-قون ماسەلەلەرىن قامتىعان قۇجاتتار اسا ماڭىزدى. سوندىقتان، الداعى جۇمىسىمىزدا شيراقتىق تالاپ ەتىلەتىن قاربالاستار كۇتىپ تۇر. سول ءۇشىن بارلىق دەپۋتاتتىق كورپۋستى، پارلامەنتتىك فراكسيالاردى الدىمىزعا قويىلعان مىندەتتەردى جوعارى كاسىبي دەڭگەيدە اتقارۋعا شاقىرامىن»، - دەدى ق. جاقىپوۆ.
قامشى-اقپارات
