قازاقستاندىق دەپۋتاتتار رەسەيدىڭ لدپر جەتەكشىسى، دەپۋتات ۆلاديمير جيرينوۆسكييدىڭ ارانداتۋشى مالىمدەمەلەرىن نازاردان تىس قالدىرماۋى كەرەك دەپ ەسەپتەيدى، - دەپ حابارلادى Tengrinews.kz.

"جيرينوۆسكييدىڭ سىپايىلىقتىڭ عانا ەمەس، مەملەكەتتىك ساياساتتىڭ دا اياسىنان شىعىپ كەتەتىن سوڭعى مالىمدەمەسىنە قانداي دا ءبىر ارەكەت بولۋى كەرەك دەپ ويلايمىن. ول تارازىلانعان، سالماقتى بولۋى كەرەك جانە "ءوزىڭ اقىماق" دەگەن دارەجەدە بولماۋى ءتيىس"، - دەپ "اق جول" پارتياسى فراكسياسىنىڭ جەتەكشىسى ازات پەرۋاشيەۆ پارلامەنتتىڭ جاڭا سەسسياسىنىڭ اشىلۋىنان سوڭ ءوز پىكىرىن بىلدىرگەن. جيرينوۆسكيي سياقتى ساياسي فيگۋرانىڭ "سۋعا سالسا باتپايتىندىعىنىڭ" سەبەبىن پەرۋاشيەۆ بىلاي تۇسىندىرەدى: "نە جيرينوۆسكيي ءوز جانىنان قوسىپ ايتادى نەمەسە بۇل سانالى ارانداتۋ". "ونىڭ مالىمدەمەسىنە قاراڭىز: "ءبىز ۋكراينا ماسەلەسىن تالقىلاپ الايىق، سودان كەيىن قازاقستاندى قولعا الامىز. بۇل - تىكەلەي ارانداتۋ جانە ول قاراپايىم ادامنىڭ ەمەس، مەملەكەتتىك دۋما دەپۋتاتىنىڭ اۋزىنان شىعىپ وتىر. سوندىقتان بىزگە مۇنداي جايتتارعا ارەكەت قىلىپ، وعان دەر كەزىندە ساياسي باعاسىن بەرۋ قاجەت”. دەپۋتاتتىڭ ايتۋىنشا، بۇل - رەسەيدىڭ مەملەكەتتىك ەركى نە رەسەي مەملەكەتتىك ساياساتىنىڭ جەلىسى ەمەس، بۇل - رەسەي پرەزيدەنتى ۆلاديمير پۋتين جۇرگىزىپ وتىرعان ساياساتقا قىسىم كورسەتۋ ارەكەتى.

جيرينوۆسكييدىڭ مالىمدەمەلەرىن نازاردان تىس قالدىرماۋ كەرەكتىگىن "حالىقتىق كوممۋنيستەر" فراكسياسىنىڭ دەپۋتاتى تۇرسىنبەك ءومىرزاقوۆ تا قولداعان. "جيرينوۆسكيي مەملەكەتتە جوعارى لاۋازىمدا وتىرىپ جاۋاپسىز مالىمدەمەلەر جاسايدى، ول سول ءۇشىن ءتيىستى جاۋاپكەرشىلىككە تارتىلۋى ءتيىس. ءبىز ونىڭ كوپتەگەن اقىماق مالىمدەمە جاسايتىنىن كورىپ وتىرمىز. ءبىز ونى "پەرسونا نون-گراتا" دەپ تانيمىز جانە ونى بىزگە كىرگىزبەيمىز. مەن وعان قانداي دا ءبىر قوعامدىق ايىپتاۋ بولۋى كەرەك دەپ ويلايمىن. ونداي مالىمدەمەلەردىڭ جولىن كەسىپ، سول ەلگە نەمەسە ونىڭ ۇكىمەتىنە ءتيىستى نوتا تاپسىرۋ قاجەت. كەلەسىدە مۇنداي قادامعا بارماۋ كەرەكتىگىن ءبىلۋى ءۇشىن، ءوز وداقتاستارىنا قارسى اقىماق مالىمدەمەلەر جاساماۋى ءۇشىن ونداي مالىمدەمەلەرگە مىندەتتى تۇردە ءتيىستى دەڭگەيدە ارەكەت ەتۋ كەرەك"، - دەگەن  ءومىرزاقوۆ ءوز سوزىندە.

بۇرىنعى سەناتور عاني قاسىموۆ تا مۇنداي ارانداتۋلارعا ءتيىستى دەڭگەيدە جاۋاپ بەرۋ قاجەت دەپ ءوز پىكىرىن ءبىلدىردى: "ونىڭ قازاقستانعا قاتىستى ەكسترەميستىك مالىمدەمەسى دە بار. ءبىز وعان تويتارىس بەرمەي، "ونىڭ دەنى دۇرىس ەمەس ادام" دەپ جاتامىز. ەگەر ەسى دۇرىس ەمەس ادام ساياسي ارەكەتتەرگە جاۋاپتى بولسا، ول ەلدىڭ ساياسي جۇيەسىنە ارالاساتىن بولسا، ول بيلىكتىڭ وكىلى بولسا شە؟ مىنە، اڭگىمە قايدا جاتىر. قوعامدا شيەلەنىستى بولدىرماۋ ءۇشىن ءبىز كاسىبي، ساياسي دەڭگەيدە لايىقتى باعا بەرە الۋىمىز، وعان ارەكەت ەتە الۋىمىز قاجەت"، - دەيدى قاسىموۆ. ول سونداي-اق رەسەي پرەزيدەنتىنىڭ قازاق مەملەكەتتىلىگى تۋرالى پىكىرىنە قاتىستى دا ويلارىن ايتتى: "قازاقستاننىڭ مەملەكەتتىلىگى، قازاق مەملەكەتتىلىگى جالپى الەمگە بەلگىلى، ول - ءبىزدىڭ تۇتاس تاريحي ءداۋىرىمىز، ول - بارلىق تاريحي ەسكەرتكىشتەرگە جازىلعان تەرەڭ تامىرىمىز، ول تاريحتىڭ بارلىق قاباتىندا مويىندالعان، ونى الەم ەلدەرى تاريحشىلارى بەكىتكەن. سوندىقتان قازاقستان كەڭىستىگىندە بولعان مەملەكەتتىك قۇرىلىمداردى جوققا شىعارۋ، وعان كۇمان كەلتىرۋ اقىلعا سىيمايدى جانە جوعارى دەڭگەيدەگى ساياساتكەرلەر ءۇشىن كۇلكىلى جايت"، - دەيدى قاسىموۆ.

قامشى-اقپارات