بۇگىن استانادا ءبىر توپ بەلسەندى قازاقستان پرەزيدەنتى نۇرسۇلتان نازاربايەۆقا ەنەرگەتيكا ءمينيسترى ۆلاديمير شكولنيكتى قىزمەتىنەن بوساتۋدى تالاپ ەتىپ، حات جولدادى. بۇل تۋرالى «ازاتتىق راديوسى» حابارلادى.

اتالعان سايتتىڭ حابارلاۋىنشا، حات اۆتورلارى نازاربايەۆتان قازاقستاندا اتوم ەلەكتر ستانسياسىن سالۋعا موراتوريي جاريالاۋدى، بايقوڭىر عارىش ايلاعىنان گەپتيل وتىنىن پايدالاناتىن «پروتون» زىمىراندارىن ۇشىرۋدى توقتاتۋدى، «باسقا مەملەكەتتەردى قازاقستاننىڭ ىشكى ىسىنە ارالاستىرماۋدى» جانە «وزگە مەملەكەتتىڭ مۇددەسىنە جۇمىس ىستەيتىن ادامداردى باسشىلىق قىزمەتكە قويماۋدى» تالاپ ەتكەن. اراسىندا «انتيگەپتيل» قوزعالىسىنىڭ مۇشەلەرى بار وننان اسا ادام پرەزيدەنتتىڭ اتىنا جازىلعان حاتتى اقوردا الدىنداعى حاتقا ارنالعان جاشىككە سالعان سوڭ تاراعان.

ەستەرىڭىزدە بولسا، 6 تامىزداعى ۇكىمەتتىڭ كەڭەيتىلگەن وتىرىسىندا مينيسترلىكتەر قىسقارتىلىپ، قايتا جاساقتالدى. وسى قايتا قۇرىلىمداۋدا 2009 جىلدان «قازاتومونەركاسىپتىڭ» تىزگىنىن ۇستاپ كەلە جاتقان، ماسكەۋدە تۋىلعان ۆلاديمير شكولنيك  قازاقستاننىڭ ەنەرگەتيكا ءمينيسترى بولىپ تاعايىندالعان ەدى. وسىدان كەيىن ونىڭ ساياسي قادامدارىن قازاقستانعا ءتيىمسىز سانايتىن ءبىر توپ ۇلتشىلدار اتالعان شەندىنى قىزمەتتەن الۋ تۋرلى بيلىككە مالىمدەمە جازعان بولاتىن. كوپ قازاق ءتىلدى سايتتارمەن بىرگە ءبىز دە بۇل حاتتى جاريالاعانبىز. ۇلتشىلدار شكولنيكتى رەسەي مۇددەسىنە جۇمىس ىستەيدى دەپ سانايدى.

ال، بۇعان دەيىن، 2012 جىلى Forbes Kazakhstan باسىلىمى قازاقستاننىڭ ەڭ باي 50 ادامىنىڭ ءتىزىمىن جاريالاعاندا، ونىڭ ىشىندە جوعارىدا اتى اتالعان شەندىنىڭ بالاسىنىڭ ەسىمى دە بار ەدى. تىزىمدە 40 ورىندا بولعان، يگور شكولنيك  $101 ملن قارجىنىڭ يەسى ەكەن. ول ءقازىر بار بولعانى 33-اق جاستا.

“قامشى” سىلتەيدى