قازاقستان ۇكىمەتىنىڭ باسىندا باقانداي التى جىل وتىرىپ، اۋىز تولتىرارلىقتاي ءىس اتقارا قويماعان ءماسىموۆ، قازاقستاننىڭ 9 پرەمەر-مينيسترى بولىپ قايتا تاعايىندالعان كوكتەمدە ونىمەن بىرگە قازاققا ءبىر قۋانىش كەلگەن. ول ورالماندارعا قىسقا ۋاقىت ىشىندە ازاماتتىق بەرۋ ماسەلەسى مەن ولاردىڭ ازاماتتىق الۋى ءۇشىن تالاپ ەتىلەتىن ارتىق شارتتاردىڭ جويىلاتىنى تۋرالى دۇيسەنوۆا حانىمنىڭ مالىمدەمەسى ەدى.

ءماسىموۆ العاش ۇكىمەت باسىندا وتىرعان تۇستا شەتتەن كەلگەن ەتنيكالىق قازاقتارعا جاسالاتىن كوپ جەڭىلدىك الىنىپ تاستالعان بولاتىن. ونىڭ ىشىندە ءتۇرلى قۇجاتتىق جەڭىلدىكتەرمەن قاتار ولارعا بەرىلەتىن قونىستاندىرۋ كومەك اقىسى كۆوتا دا جويىلعان. ال، بىلتىر ۇكىمەت باستاپ، دەپۋتاتتار قوستاپ، شەتەلدەردەن ەلگە ورالاتىن ەتنيكالىق قازاقتاردىڭ اتا زاڭداعى مارتەبەسىن اياققا تاپتايتىن، ولارعا تەك ءتورت جىلدان كەيىن عانا ازاماتتىق بەرۋ تۋرالى زاڭ قابىلداپ جىبەرگەن. سونداي-اق، ولار قازاقستان ازاماتى اتانۋ ءۇشىن بەلگىلى ايماقتاردا عانا تۇرۋى ءارى تولەم قابلەتىن دالەلدەۋى كەرەك ەدى.  ءساۋىر ايىندا ءماسىموۆتىڭ مينيسترلەر كابينەتى جاساقتالا سالا، تامارا دۇيسەنوۆا حانىم حابارلاعان جاڭالىق دۇنيەنىڭ ءار تۇكپىرىندەگى قازاقتى قۋانتقانىمەن، ول زاڭ جۇزىندە ءالى بەكىتىلگەن جوق.

ال، تامىزدىڭ 6-سى كۇنى، ۇكىمەتتىڭ كەڭەيتىلگەن وتىرىسىندا قازاقستان رەسپۋبليكاسىنىڭ پرەمەر-مينيسترىنىڭ ورىنباسارى گۇلشارا ءابدىحالىقوۆا ورالمانداردىڭ جاعدايى تۋرالى بايانداما جاساعان بولاتىن:  "جىل باسىنان بەرى ەلىمىزگە جەتى مىڭ وتباسى نەمەسە 135 مىڭ ورالمان كوشىپ كەلدى. ولارعا "جول كارتاسى" باعدارلاماسى اياسىندا جاعداي جاساپ جاتىرمىز. قازىرگى كۇنى جۇمىسقا ورنالاستىرۋ ماسەلەلەرى قاراستىرىلىپ شەشىلۋدە. كۇزدە پارلامەنتتىڭ سەسسياسىنا جاڭا زاڭ ۇسىنىپ، ولاردىڭ جاعدايىن كوتەرە تۇسەمىز"، - دەگەن مينيستر حانىم.  "قانداستارىمىزعا جول اشۋىمىز كەرەك. قازاقتىڭ جەرى كەڭ. ورنالاسامىن دەگەن جەرىن ءوزى تاڭداسىن. وڭتۇستىكتە حالىقتىڭ تىعىزدىعىن، ال سولتۇستىكتە ازدىعىن دا ەسكەرۋ قاجەت. كەلگەن جاستار ءوز بولاشاعىن جاساۋ ءۇشىن مۇمكىندىكتەردى پايدالانۋى ءتيىس. وسى ورايدا ۇكىمەت بارلىق جاعىنان قولداۋ ءبىلدىرۋى كەرەك"»، - دەپ ەدى سول وتىرىستا ەلباسى ءابدىحالىقوۆا حانىمنىڭ ءسوزىن تىڭداپ.  

ۇكىمەت وتىرىسىندا ەلباسى ايتقان ءسوزدىڭ ناتيجەسى كۇتىلەتىن كەز ەندى كەلدى.  ول ءۇشىن، 60 كۇن دەمالىپ، جۇمىسقا كەلە سالا ءوز كانيكۋلدەرىن قىسقارتۋ تۋرالى ويلانعان دەپۋتاتتاردان جاڭا پارمەندەر كۇتەمىز جانە ولاردىڭ ايتقان جۇمىسقا قاجەت شيراقتىعىن ۇكىمەتتەن دە كۇتەمىز. سەبەبى  ۇكىمەت تەزدەتىپ پارلامەنتكە وزدەرى ۋادە ەتكەن زاڭدى ۇسىنۋى كەرەك.

نۇرعالي نۇرتاي