رەسەيدىڭ ايماقتارىندا ەرىكتىلەر «انتيمايدان» توپتارىن قۇرىپ جاتىر. ولاردىڭ ماقساتى بيلىككە كومەكتەسىپ، وپپوزيسيانىڭ حالىقتى ارانداتۋىنا قارسى تۇرماق ەكەن، بۇل تۋرالى ازاتتىق راديوسى جازدى. «انتيمايدان» قۇرۋشىلار رەسەيدە «مايدان» ۇيىمداستىرۋدى كوزدەگەندەرگە ساق بولۋ كەرەك ەكەنىن ايتادى. «حالىق جاساقتارى» بيلىككە جاردەمدەسىپ، ۋكراينادا بيلىكتىڭ اۋىسۋىنا ىقپال ەتكەن «مايدان سەناريىن» رەسەيدە بولدىرماۋعا تىرىسادى.

«انتيمايدان» ەرىكتىلەر توبى 10 ادامنان قۇرالادى جانە توپتى باسقاراتىن بريگاديرى بولادى. ەرىكتىلەر توپتارى جاڭادان قۇرىلعان «انتيمايدان كەڭەسى» جانىنان اشىلادى. بۇل كەڭەس رەسەي اسكەري جانە ارنايى كۇشتەرىنىڭ ارداگەرلەرى مەن بەلسەندىلەردىڭ، پراۆوسلاۆ ازاماتتار وداعى وكىلدەرىنىڭ باسىن بىرىكتىرگەن ۇيىم.  «يزۆەستيا» گازەتى ەرىكتىلەردى «قۇقىق قورعاۋ ورگاندارىمەن تىعىز بايلانىستا قىزمەت ەتەدى» دەپ جازعان. ولاردىڭ دەرەگى بويىنشا، كەڭەس ءتوراعاسى ەۆگەنيي شابايەۆ «انتيمايدان» توپتارىنىڭ ۋكراينامەن شەكتەسەتىن جانە ورتالىق ايماقتاردا جۇمىستارىن باستاي بەرەتىنىن، بولاشاقتا مۇنداي توپتاردىڭ رەسەيدىڭ بارلىق ايماقتارىندا قۇرىلاتىنىن ايتقان. شابايەۆ ەرىكتىلەردىڭ مىندەتىن ناقتى تۇسىندىرمەگەن. «كونستيتۋسيالىق قۇرىلىم مەن ۇكىمەتتى بيلىكتەن تايدىرۋدى كوزدەيتىن باتىس ىقپالىنا قارسى تۇرۋ ءۇشىن ورىس حالقىن اقپاراتتاندىرۋ» جولىندا قىزمەت ەتەمىز دەيتىن ​كەڭەس، ۇكىمەتكە قارسى بەلسەندىلەردىڭ قىركۇيەكتىڭ 14ء-ى كۇنى وتەتىن جالپىۇلتتىق ايماقتىق جانە جەرگىلىكتى سايلاۋلار كەزىندە ەل ىشىندە دۇربەلەڭ تۋدىرىپ، كوشە شەرۋلەرىن وتكىزۋى مۇمكىن ەكەنىن ەسكەرتتى. سوندىقتان ولار ۇكىمەتتىڭ مۇددەسىن قورعايتىن بالاما شەرۋلەر مەن شارالار وتكىزبەك. كەڭەس مۇشەلەرى – رەسەي بارلاۋ قىزمەتىنىڭ ارداگەرلەرى مەن رەسەي پراۆوسلاۆ ازاماتتارى وداعىنىڭ جەتەكشىلەرى، زاڭ شىعارۋشىلار، وڭتۇستىك كازاكتار ۇيىمى مەن «نوچنىە ۆولكي»  («تۇنگى قاسقىرلار») موتوكلۋبىنىڭ وكىلدەرى. 

قامشى-اقپارات