بولاشاقتا استانا قالاسىندا سالىناتىن پانتەونعا ۇسىنىلعان جوبالاردىڭ ءبىرى. سۋرەت ازاتتىق راديوسىنان الىندى.
فاريزا وڭعارسىنوۆا اپايىمىزدىڭ باسىنا دۇعا قايىرا بارىپ ەدىك. ماڭايى قاربالاس ەكەن. جەر ولشەگەن، قاعاز سىزعان ءبىر توپ ادام ءجۇر. اپايىمىزدىڭ باسىنا ەسكەرتكىش قويۋعا كەلگەندەر سياقتى، قۋانىسىپ قالدىق. باسىن اينالدىرا گۇلمەن كومكەرىپ قويسا دا بيىلعى قاڭتاردان بەرى ەسكەرتكىش ورناتىلماعانى جانعا باتىپ جۇرگەن. ەسكەرتكىشتىڭ سۇلباسىن كورمەك نيەتپەن قاعازدارىنا ۇڭىلدىك. سويتسەك بۇلار قالالىق اكىمشىلىكتىڭ جەر كارتاسىن ءتۇسىرۋشىسى، توپىراقتىڭ قۇرامىن انىقتاۋشىلار، ارحيتەكتورلار بولىپ شىقتى. قولدارىنداعى قاعازدا پانتەون دەپ اتالاتىن جاڭا قۇرىلىستىڭ سىزباسى. مۇندا قازاقتىڭ يگى-جاقسىلارى قويىلاتىن ورىن اشىلاتىنىن وقىعانبىز. بۇل دا دۇرىس تىرلىك. ءبىراق سول پانتەوننىڭ ءتۇرىن كورىپ شوشىپ قالدىق. بارلىعى ءبىر مىڭ گەكتار جەر ءبولىنىپتى. سونىڭ ناق ورتاسىندا شالقاسىنان ءتۇسىپ، الەمدە جوق الىپ كرەست جاتىر. ءيا، كادۋىلگى حريستيانداردى شوقىندىراتىن كرەست. ۇزىنى بەس شاقىرىم، ەنى ەكى شاقىرىم. ءمانىسىن اكىمشىلىكتەن كەلگەندەردەن سۇراپ ەدىك، ەشقايسىسى ادام ۇعار جاۋاپ قاتپادى. ءارقايسىسى ءوز مىندەتىن عانا بىلەدى ەكەن.
قابانباي باتىر ساعاناسىنىڭ شىراقشىسى، وسى كيەلى ورىنعا باس-كوز كامال ابدراحمان دەگەن اعاعا جولىقتىق. ول كىسى كرەستىڭ جاعدايىن بىلاي ءتۇسىندىردى: «بۇل جوبالار ءالى تولىق بىتپەگەن، بار-جوعى جوسپار عانا. مۇنداعى كرەست بولىپ كورىنىپ تۇرعان ءار ءتۇرلى نىسانداردىڭ اراسىن اجىراتۋ ءۇشىن ۋاقىتشا تۇسىرىلگەن سىزىقتار. ول سىزىقتار جەر بەدەرىندە بولمايدى. كوزدەرىڭىزدى جەتكىزگىلەرىڭىز كەلسە قالالىق ارحيتەكتۋرا باسقارماسىنا بارىڭىزدار. كومپيۋتەردەن سىزىقتاردى ءوشىرىپ، قايتا ءبىر قاراڭىزدار. مەملەكەتتىك قورىمداعى جۇمىس بارىسى اپتا سايىن، ءار سەيسەنبىدە قالالىق اكىمشىلىكتە ارنايى قارالادى. وتكەن جەتىدە مەن دە قاتىستىم. بار شارۋا ەلدىڭ كوز الدىندا اتقارىلىپ جاتىر. پانتەون جونىندە ارنايى كوميسسيا قۇرىلعان. ونىڭ مۇشەلەرى كرەست سالعىزا قويماس.
اعاتاي وسىلاي دەگەنىمەن دە ىشىمىزدەگى كۇدىك شىقپاي قالدى، ءبىزدى يلاندىرا المادى. ال «بار شارۋا ەلدىڭ كوز الدىندا» دەگەنى شىندىقتان تىم الىس جاتقانداي. عالامتوردى شارلاپ پانتەوننىڭ ماكەتىن نەمەسە جوبا سىزباسىن تابا المادىم. ەندەشە كوپشىلىك قايدان ءبىلسىن. پانتەون جۇرتشىلىققا تانىستىرىلۋى قاجەت.
اسقار امانگەلدى
