بۇگىندە ۋاقىتتىڭ تىم تەز وتەتىندىگى، ءتىپتى زىمىراپ جاتقاندىعى جايلى وتە كوپ ادام ايتادى دەپ جازادى ihsan.kz. اسىرەسە ۇلكەن مەگاپوليستەردە ەكى ادامنىڭ ءبىرى ۋاقىت تاپشىلىعىنا شاعىمدانادى. الەۋمەتتىك جەلىلەردەگى جازبالار مەن جازىلىپ جاتقان ماقالالارعا قاراساڭىز دا وسى تاقىرىپتىڭ وزەكتى ەكەنىن اڭعاراسىز. ۋاقىتتىڭ وسىلايشا زىمىراۋى ەل.كز رەداكسياسىن دا قىزىقتىردى، سول سەبەپتى ءبىز وسى تاقىرىپ اياسىندا ءوزىمىزدىڭ ماقالامىزدى ۇسىنعىمىز كەلەدى.

اقپارات الەمىندە وسى ماسەلەگە بايلانىستى جازىلعان كوپتەگەن ماتەريالداردى زەردەلەي كەلە، ۋاقىتتى تەز وتۋىنە بايلانىستى 3 نەگىزگى فاكتوردى ەرەكشەلەيمىز: 1) فيزيكالىق؛ 2) بيولوگيالىق نەمەسە پسيحيكالىق؛ 3) الەۋمەتتىك.

فيزيكالىق فاكتور دەيتىنىمىز، جەر ۋاقىت وتكەن سايىن كۇنگە جاقىنداۋدا جانە سول سەبەپتى ۋاقىت بىرتە-بىرتە جىلدامداي تۇسەدى دەگەن گيپوتەزالار بار. فيزيكالىق گيپوتەزالارعا كوپ توقتالماۋدى ءجون كوردىك، سەبەبى ولار ناقتى دالەلدەنبەگەن، ءتىپتى دالەلدەنگەن كۇننىڭ وزىندە ول جەردە سەكۋندىق نەمەسە ودان از مولشەردەگى ۋاقىت كولەمىندەگى وزگەرىستەر جايلى ايتىلادى. ماسەلە تەك سول سەكۋندتاردا بولسا، ادامزات وزگەرىستى قاتتى سەزىنە قويماس ەدى.

ءبىزدى بيولوگيالىق نەمەسە پسيحيكالىق فاكتورلار كوبىرەك قىزىقتىردى.

ۋاقىتتىڭ تەز نەمەسە ءجاي ءوتۋى ءبىزدىڭ ميىمىزدىڭ قورشاعان ورتانى قابىلداۋىنا بايلانىستى. كەيدە ۋاقىت مۇلدەم وتپەي قويادى، اسىرەسە ءسىز بىرەۋدى كۇتىپ تۇرساڭىز، ول 30 مينۋتتا كەلەم دەسە، جارتى ساعاتتىق ۋاقىت سىزگە 2 ساعاتتاي بولىپ كورىنۋى مۇمكىن. ال ەگەر، ءسىز 30 مينۋتتا قالانىڭ ءبىر جاعىنان ەكىنشى شەتىنە جەتۋىڭىز قاجەت بولسا جانە ءسىز كولىك كەپتەلىسىنە تۇرىپ قالساڭىز، جارتى ساعاتىڭىز سۋداي اعادى.

ءبىزدىڭ نازار قويۋىمىز دا ۋاقىتتىڭ وتۋىنە اسەر ەتەدى. ماسەلەن، جاڭا نارسەنى ۇيرەنۋ، سەزىنۋ ميىڭىزدى كوبىرەك جۇمىس ىستەتكەندىكتەن، مۇنداي جاعايدا ۋاقىت باياۋلاۋ وتەدى. سول سەبەپتى دە، ءبىر جاڭا جەرگە ساپار شەكسەڭىز، بارارداعى جول ۇزاق، قايتاردا جىلدامداۋ كورىنەدى.

ادەتتە ءبىز اعىمداعى جانە وتكەن شاقتاعى ۋاقىتتى باعالايمىز. ەكەۋى سايكەس كەلمەگەن جاعدايدا ۋاقىتتىڭ ءوتۋى وزگەرەدى. مىسالى، تۇماۋ كەزىندە ۋاقىت ۇزاققا سوزىلۋى مۇمكىن، ويتكەنى اۋرۋ ۋاقىتتى قابىلداۋىمىزدى بۇرمالايدى دا، مينۋتتار ساعاتتارعا سوزىلادى. الايدا جازىلعان شاقتا قاراساڭىز، اۋىرعان كەزىڭىزدەگى ۋاقىت تەز ءوتىپ كەتكەندەي كورىنەدى.

ادامنىڭ جاسى دا ءوز ءرولىن وينايدى. بۇل اراقاتىناس ەففەكتىسى ءوز كۇشىنە ەنەدى. ەگەر ءسىزدىڭ جاسىڭىز 5-تە بولسا، ءبىر جىل ءسىزدىڭ جاسىڭىزدىڭ 1/5 بولىگىن قۇرايدى. ەگەر جاسىڭىز 50 بولسا، سايكەسىنشە، ءسىز ءۇشىن ءبىر جىل ءومىرىڭىزدىڭ 1/50 قۇرايدى. وسىلايشا، وسكەن سايىن جىلدار وتە قىسقا بولىپ شىعادى.

مۇندا اراقاتىناس ەففەكتىسىنەن باسقا تاعى ءبىر فاكتور بار. ادام جاسى ۇلكەيگەن سايىن كورگەنى مەن بىلگەنى ارتا بەرەدى. وعان بەيتانىس قىزمەت پەن وقيعا ءتۇرى ازايا بەرەدى. بۇل دا ۋاقىتتىڭ تەز وتۋىنە اسەر ەتەدى.

جوعارىدا ايتىلعان فاكتورلار بويىنشا ۋاقىتتىڭ تەز ءوتۋى زاماننىڭ وزگەرۋىنە ەمەس، ادامنىڭ وسۋىنە عانا بايلانىستى. الايدا، ادام جاسىنان بولەك ۋاقىتتىڭ تەز وتۋىنە تاعى ءبىر فاكتور اسەر ەتەدى جانە الەۋمەتتىك فاكتور.

ۋاقىت وتكەن سايىن ادامدار اراسىندا باسەكە كۇشەيىپ، ادامعا قويىلاتىن ورتاشا تالاپ ارتىپ كەلەدى. بۇل ادامنان كوبىرەك ەڭبەك ەتۋدى، ىزدەنۋدى، ءبىلىم الۋدى قاجەت ەتەدى. مۇنىڭ ناتيجەسىندە ادامنىڭ بوس ۋاقىتى ازايا بەرەدى، ال بوس ۋاقىتتىڭ از بولۋى نەمەسە بولماۋى ۋاقىتتىڭ ءوتۋىن سەزبەۋگە اكەلەدى. ەگەر اتقاراىن شارۋاڭىز باستان اساتىن بولسا، ۋاقىتقا قاراپ ۇلگەرمەيسىز. دۇيسەنبى كۇنى باستالعان جۇمىس اپتاسى لەزدە جۇماعا اينالىپ جاتادى. مۇنى تەكسەرۋ ءۇشىن، قالاداعى قايناعان ومىردەن اۋىلعا بارىپ، ءبىر اي ءومىر ءسۇرۋ كەرەك جانە ەشنارسەمەن اينالىسپاي اۋىل ومىرىمەن راحاتتانىپ جاتۋ قاجەت. سوندا ءسىز ءبىر ايدىڭ ءار اپتاسىن، اپتانىڭ ءار كۇنىن، كۇننىڭ ءار ساعاتىن سەزىنەتىن بولاسىز. ۋاقىت ءجاي وتەدى.

داۋرەن وماروۆ