بۇعان دەيىن «قامشى» پورتالىندا نۇردىن تۇرعىن اتتى جاس كاسىپكەردىڭ ىسكەرلىگى تۋرالى بىرنەشە ماقالا جاريالانعان بولاتىن. قىتايداعى قانداستار اراسىنان شىققان نۇردىن جاس تا بولسا بىرنەشە كاسىپتىڭ باسىن قايىرىپ، ءوز قاتارىنا ۇلگى بولىپ جۇرگەن ازامات. ول تاياۋدا عانا "ميللياردتار ەلىندە جيناعان تاجىريبەمدى قازاق ەلىندە قاجەتكە جاراتسام..." دەپ سۇحبات بەرگەن ەدى.

جاقىندا عانا نۇردىن تۇرعىننىڭ جۇرەكتى ەلجىرەتكەن حاتى ينتەرنەتتە تارالدى. بۇعان دەيىن رەداكسيامىزعا بىرنەشە رەت كەلگەن نۇردىن اڭگىمەسىندە «قازاق-قىتاي اراسىندا ىسساپارمەن جۇرگەندە ەكى شەكارانىڭ ورتاسىندا ۇلدى بولعانىمدى ەستىدىم. بالامنىڭ ەسىمىن ءبىر جاقىن اعام ىرىمداپ «نۇرجول» دەپ قويدى» دەگەن ەدى. سول نۇرجول ساناۋلى كۇندەردەن كەيىن ءبىر جاسقا تولادى.

نۇرجولدىڭ اكەسى حاتىندا،

«اسسالاۋماعالەيكۇم! قۇرمەتتى جاناشىر جاندار!

اۋرۋ ايتىپ كەلمەيدى دەيدى. قيىندىق باسقا تۇسكەندە ومىردەن تۇڭىلەتىن كەزدەرىڭىز بولاتىن شىعار. ءبىراق ءۇمىت بار جەردە بولاشاق تا بار. جاقىندا بالام تۇيىقسىز اۋىرىپ، قۇلجاداعى اۋرۋحانالاردىڭ بىرىنە اپارعانىمىزدا ولار بالامنىڭ دياگنوزى اققان اۋرۋى بولۋى مۇمكىن ەكەنىن ايتىپ، ناقتىلاۋ ءۇشىن ۇرىمجىگە جىبەرگەن بولاتىن. ۇرىمجىدەگى «مەديسينا 1» اۋرۋحاناسى بالاما «جەدەل حاراكتەرلى شەمىرشەك اققان اۋرۋى» دەپ دياگنوز قويدى. تەك قانا حيميالىق جولمەن ەمدەلەدى ەكەن. ناتيجەلى بولىپ جاتسا سۇيەك مايىن اۋىستىرماقشى. ءبىر جاس وتباسىنىڭ ماتەريالدىق جاعدايى ءقازىر قانشالىقتى بولاتىنى بەلگىلى. ەمدەۋ اقىسى وتە كوپ قارجىنى تالاپ ەتەدى.

حيميالىق ەمدەۋ 6 كەزەڭنەن تۇرادى. بۇل بارىستا دارىگەرلەر بالا تولىق ساۋىعىپ كەتۋى ءۇشىن قانشالىقتى قاراجات كەتەتىنىن ەسەپتەي الماي وتىر. ءقازىردىڭ وزىندە كۇنىنە 3000-5000 يۋان(150 مىڭ – 250 مىڭ تەڭگە اراسى. –رەد) قارجى جۇمساپ وتىرمىز.  

اينالامىزدا جاناشىر جاندار كوپ دەپ بىلەمىن. «كوپ تۇكىرسە كول بولادى» دەيدى. قولدارىڭىزدان كەلگەنشە كومەك كورسەتۋلەرىڭىزدى سۇرايمىن»، - دەيدى ەگىلە.

ول 2015-جىلعى قىتايداعى «ينتەرنەتتەن كاسىپتەنگەن جاس جۇلدىز كاسىپكەر بايقاۋىندا» جۇلدەگەر بولعان. سودان باستاپ كوپتەگەن باسەكەلەرگە قاتىسقان قانداسىمىز ايماقتىق «جاڭالىق جاراتۋ جانە كاسىپ اشۋ» باسەكەسىندە 600 نىساننىڭ ىشىندە 60 مىقتىنىڭ قاتارىندا كورىنگەن. سونداي-اق، بۇكىل قىتايلىق «جاس كاسىپكەرلەردىڭ جاڭالىق جاراتۋ» جانە كاسىپ اشۋ جارىسىندا 150 مىقتىنىڭ قاتارىنان بوي كورسەتكەن. سونىمەن قاتار 2016 جىلى شىڭجاڭ بويىنشا «جاستار بىرلەستىگىنىڭ مۇشەسى» بولىپ قۇرىلتايعا قاتىستى. ءارى، شىڭجاڭ دارەجەلى جاس كاسىپكەرلەر بىرلەستىگىنىڭ مۇشەسى بولىپ بەكىتىلگەن.

دەگەنمەن قانداسىمىز اۋرۋدى جەڭىپ، ۇلىمەن بىرگە امان-ساۋ ەلگە ورالۋدى قالايدى.

«قامشى» پورتالى نۇرجولدىڭ ساۋىعىپ كەتۋىنە كومەكتەسكىسى كەلەتىن وقىرماندار نازارىنا اكەسى نۇردىننىڭ جانە قازاقستانداعى جاقىن تۋىسى، نۇردىننىڭ تۋعان اپكەسى گۇلماريانىڭ كارتوچكالىق ەسەپتەرىن قوسا جاريالايدى.