بىرنەشە كۇننىڭ الدىندا ۋكراينا قورعانىس ءمينيسترى ۆالەريي گەلەتەي ءوزىنىڭ فەيسبۋك پاراقشاسىندا كييەۆ شىعىس ۋكرايناداعى بۇلىكشىلەرمەن اراداعى سوعىستى جالعاستىرعانىن توقتاتپاسا، رەسەي تاراپتىڭ يادرولىق شابۋىل جاسايتىندىعى تۋرالى قوقانلوقى جاساعانىن جاريا ەتكەن ەدى . «ماسكەۋ بىزگە ءدوڭايبات كورسەتۋدە. ەگەر، ءبىز بۇلىكشىلەرمەن سوعىستى توقتاتپاساق، ماسكەۋدىڭ بىزگە تەحنيكالىق يادرولىق قارۋ قولدانۋعا دايىن ەكەندىكتەرىن رەسەيدىڭ رەسمي ەمەس تەلەارنالارى ارقىلى بىزگە ەسكەرتىپ ۇرەي سالۋدا» ،-دەيدى ۋكراين ءمينيسترى.

ول تاعى كرەملدىڭ ۋكرايناداعى «گيبريدتىق سوعىسىنىڭ» اياقتالىپ، ەندى « تولىقتاي شابۋىلعا» وتكەنىن ايتقان. دۇيسەنبى كۇنى ۋكراينا قورعانىس ءمينيسترى ۆالەريي گەلەتەي فەيسبۋگىندە شىعىس ۋكرايناداعى قايشىلىقتىڭ سوڭى سۇراپىل سوعىسقا ۇلاسقانىن، ال، رەسەيدىڭ ۋكرايناعا شابۋىل جاسايتىن جاعدايعا تولقىتاي دايىن كۇيدە تۇرعانىن ايتقان ەدى. «ەكىنشى دۇنيەجۇزىلىك سوعىستان بەرى ەۋروپانىڭ ەسىگىن قاقپاي كەتكەن ءبىر جويقىن سوعىس تابالدىرىقتان اتتاعالى تۇر ... ءبىز رەسەيگە قارسى قۋاتتى قورعانىستى جۇرگىزۋىمىز كەرەك»،-دەيدى ول. ال، رەسەي قارۋلى كۇشتەرى قىركۇيەك ايىندا التاي وڭىرىندە، قازاقستان شەكاراسىنا جاقىن ايماقتا ۇلكەن اسكەري جاتتىعۋ وتكىزبەكشى ەكەندىگىن بىرنەشە كۇننىڭ الدىندا رەسەي ستراتەگيالىق ماقساتتاعى زىمىران كۇشتەرى قولباسشىلىعىنىڭ وكىلىنە سىلتەمە جاساعان رەسەيلىك "ريا نوۆوستي" اگەنتتىگى حابارلادى. ال، بۇل تۋرالى بريتاندىق «Voice of Russia» اقپاراتى « رەسەي نەگىزگى ستراتەگيالىق يادرولىق ارسەنال قورعانىسى جاتتىعۋىن وتكىزەتىنىن جاريا ەتتى» دەگەن تاقىرىپتا ماقالا جاريالاپ، بۇل ءىرى اسكەري جاتتىعۋدا يادرولىق ارسەنالداردىڭ دا بار ەكەندىكتەرىن ايتىپ، باتىسقا دابىل قاقتى. «ۋەلستەگى ناتو سامميتىنان ءبىر كۇن بۇرىن ماسكەۋدىڭ ءىرى اسكەري جاتتىعۋ وتكىزەتىنى تۋرالى رەسەيلىك "ريا نوۆوستي" حابارلادى»،- دەيدى «Voice of Russia». « ناتو مەن رەسەي تاراپتارى ۋكرايناداعى قايشىلىق باستالعالى بەرى جارىسىپ اسكەري جاتتىعۋلار وتكىزۋدە»،-دەيدى اتالعان بريتاندىق اقپارات كوزى. ال، ناتو-لىقتار شىعىس ەۋروپاداعى وداقتاستاراىمەن بىرگە رەسەي تاراپتان كەلەتىن بارلىق مۇمكىن بولعان اگرەسسياعا دايىن ەكەندىكتەرىن مالىمدەگەن ەدى. « بۇل دايىندىق جوسپارىمىز بويىنشا، ءبىز دۇرىس ورىندا دۇرىس اسكەري كۇش پەن دۇرىس قۇرىلىمداردى ورنالاستىردىق»،-دەيدى ناتو باس حاتشىسى اندرەس فوگ راسمۋسسەن. ءبىر قىزىعى رەسەيدىڭ قازاقستانمەن شەكارالاس ايماقتا وتكىزەتىن اسكەري جاتتىعۋىنا ەلىمىزدىڭ دە اسكەرلەرى قاتىساتىن كورىنەدى. ەستەرىڭىزدە بولسا رەسەيدىڭ سىرتقى ىستەر ءمينيسترى لاۆروۆ جاقىندا عانا شىعىس قازاقستانعا رەسمي ساپارمەن كەلگەن بولاتىن.

ت.شانشاربەك