2018 جىلدىڭ سوڭىندا كەدەندىك وداق (كو) ەلدەرى اراسىندا ءموبيلدى روۋمينگ جويىلۋى ىقتيمال، بۇل تۋرالى ەۋرازيالىق ەكونوميكالىق كوميسسيا ءمينيسترى نۇرلان الدابەرگەنوۆ ايتقان. ونىڭ مالىمدەۋىنشە، قازىرگى تاڭدا وسى ماسەلە بويىنشا زەرتتەۋ جۇمىستارى جۇرىگىزۋلۋدە. «بۇل ماسەلەنى شەشۋ ءبىرىنشى كەزەكتە نورماتيۆتىك-قۇقىقتىق قۇجاتتاردى زەرتتەۋدەن تۇرادى، سەبەبى ءار مەملەكەت ءوز ۇلتتىق زاڭدارى اياسىندا شەشىم قابىلداۋلارى ءتيىس. سونداي-اق، ەكىنشى كەزەڭ – زاڭنامالىق جوسپار بويىنشا تاسىلدەمەلەردى سايكەستەندىرۋ. ەسەپتەۋ بويىنشا، بۇل ماسەلە شامامەن ءۇش-تورت جىل ىشىندە شەشىمىن تابادى»، - دەدى الدابەرگەنوۆ.

روۋمينگ – ءبىر مەملەكەتتىڭ بايلانىس ابونەنتتەرى شەتەلگە شىققاندا SIM كارتاسىن اۋىستىرماي-اق قولدانا بەرۋىن قامتاماسىز ەتەتىن قىزمەت، ءبىراق بۇل اناعۇرلىم قىمباتقا تۇسەدى. ال، اتالعان حابارعا ساي كەدەن وداعى ەلدەرى اراسىندا روۋمينگ جويىلار بولسا، ەل اۋماعىنان ءجيى شەتەل اساتىن كاسىپكەرلەرگە ءتيىمدى بولاتىنى انىق.

قامشى-اقپارات