شاحانداعى وت جاعۋشى مەيرامبەك جيەنبايەۆتىڭ دەنەسى اۋىل ماڭىنداعى دالادان تابىلدى، - دەپ حابارلايدى Tengrinews.kz

شاحان تۇرعىندارى ەر ادامنىڭ دەنەسىن كەزدەيسوق كورىپ قالعان. دەنەسى اۋىلدان 700 مەتر جەردە قاراۋسىز قالعان ساياجايدان تابىلعان. ەر ادام بۇزىلعان ءۇيدىڭ شۇڭقىرىندا جاتقان.

"وعان ەشكىم زورلىق كورسەتپەگەن. ەر ادام كەيىن ءۇسىپ قالعان بولۋى مۇمكىن"، - دەدى شاحان ءىىب باسشىسى دۋمان كوجاحمەتوۆ. - ونىڭ ايەلى كۇيەۋىن تانىدى. ساراپتاما تاعايىندالدى، تەرگەۋ جۇرگىزىلىپ جاتىر".

ەسكە سالا كەتەيىك، 1 قاڭتاردا شاحتينسك قالاسىنداعى شاحان اۋىلىندا كەشكى ۋاقىتتا تۇرعىن ءۇيدىڭ ءبىر بولىگى وپىرىلىپ، 9 ادام قازا تاپقان بولاتىن. ولاردىڭ ۇشەۋى ەر ادام، ۇشەۋى ايەل، تاعى ۇشەۋى بالالار ەكەن. ال كەيىن اپاتتىڭ الدىن الا سەبەبى اتالعان ەدى. 

سونداي-اق، وسىعان دەيىن شاحان اۋىلىندا ءۇيدىڭ قۇلاۋىنان قازا تاپقانداردىڭ وتباسىنا ميلليون تەڭگەدەن بولىنەتىنى حابارلانعان بولاتىن. "وتباسىلارىنا قارجىلاي كومەك كورسەتۋ جايىندا. اكىمدىك قازا تاپقان ءار ادام ءۇشىن ميلليون تەڭگەدەن جانە 500 مىڭ تەڭگە اۋرۋحانادا جاتقان زارداپ شەككەندەرگە بولەدى. سونىمەن قاتار اكىمدىك قازا بولعانداردى جەرلەۋ ءراسىمىن جانە ەسكە الۋدى ءوز موينىنا الادى"، - دەگەن ەدى وبلىستىق اكىمدىكتىڭ باسپا ءسوز قىزمەتىندەگىلەر.

ال 4 قاڭتاردا شاحان كەنتىندە توتەنشە جاعدايدان قازا تاپقاندار جەر قوينىنا تاپسىرىلعان بولاتىن.