قازاقستاندىق زاڭگەر اسقار قايماقوۆ رەسەيدىڭ باس پروكۋراتۋراسىنا ءوزىنىڭ لدپر فراكسياسىنىڭ جەتەكشىسى ۆلاديمير جيرينوۆسكييدى اتىشۋلى مالىمدەمەلەرى ءۇشىن قىلمىستىق جاۋاپكەرشىلىككە تارتۋ تۋرالى ارىزىن بەيجاي قالدىرماۋدى سۇراپ، حات جولداعان. بۇل تۋرالى  Tengrinews.kz جازدى.  2014 جىلدىڭ اقپانىندا جيرينوۆسكيي قازاقستانعا قاتىستى بىرنەشە ورىنسىز مالىمدەمە جاساپ، "ورتا ازيادا ەشقانداي رەسپۋبليكا بولعان جوق. ورتاازيالىق فەدەرالدىق وكرۋگ - باستى قالاسى ۆەرنىي! بۇگىندە ونىڭ باسقا اتاۋى بار، الما-اتا - مەنىڭ تۋعان قالام. ول اتاۋدى وزبەكستان، قىرعىزستان، تاجىكستان، تۇرىكمەنستان جانە قازاقستان ويلاپ تاپتى. ورتاازيالىق فەدەرالدىق وكرۋگ!" – دەگەن بولاتىن. وتكەن ايدىڭ سوڭىندا دا «قازاق دالاسىن ورىس اسكەرى قورعادى » دەگەن ەدى.

زاڭگەر رف باس پروكۋراتۋراسىنا 2014 جىلدىڭ ناۋرىزىندا شاعىم جولداعانىن ەسكە سالدى. وندا قايماقوۆ جيرينوۆسكييدى رەسەي قىلمىستىق كودەكسىنىڭ ءۇش بابى بويىنشا جازالاۋ كەرەكتىگىن اتاپ كورسەتكەن: "جەككورىنىشتى نەمەسە دۇشپاندىقتى قوزدىرۋ جانە ادامنىڭ ار-نامىسىن قورلاۋ"، "كوپشىلىك الدىندا ەكسترەميستىك قىزمەتكە ۇندەۋ" جانە "كوپشىلىك الدىندا باسقىنشىلىق سوعىستى تۋعىزۋعا ۇندەۋ". قايماقوۆ مامىر ايىندا رف باس پروكۋراتۋراسىنان جاۋاپ الدى. وندا زاڭگەرگە ونىڭ حاتى تەرگەۋالدى تەكسەرۋ جۇرگىزۋ ءۇشىن رەسەيدىڭ تەرگەۋ كوميتەتىنە جولدانعانى جازىلعان. قايماقوۆ بۇدان كەيىن ەشقانداي حات-حابار الماعان.رەسەيدىڭ باس پروكۋراتۋراسىنا جازعان كەلەسى حاتىندا زاڭگەر قىلمىستىق ءىس جۇرگىزۋ زاڭناماسىنىڭ تالاپتارىن بۇزعان رف تەرگەۋ كوميتەتىنىڭ لاۋازىمدى تۇلعالارىنا قاتىستى شارا قولدانۋدى جانە ولاردى قابىلدانعان پروسەسسۋالدىق شەشىم تۋرالى قاۋلىنىڭ كوشىرمەسىن شاعىمدانۋشىنىڭ مەكەنجايىنا جىبەرۋگە مىندەتتەۋدى سۇرايدى قامشى-اقپارات