الماتى قالاسىنىڭ № 2 مەدەۋ اۋداندىق سوتىندا تۇڭعىشباي جامانقۇلوۆتىڭ ءىسى بويىنشا سوت وتىرىسى ودان ءارى جالعاسۋدا. بۇگىنگى وتىرىستا سوتتالۋشىلار سوت الدىندا تۇسىنىك بەرۋدى باستادى. سوتتا ءبىرىنشى بولىپ تۇسىنىك بەرگەن «فەنيكس» كينوفيلمىنىڭ اتقارۋشى پروديۋسەرى ناتاليا يۋدينا 2 ملن. تەڭگەنى قايتارعان سوڭ، تولىقتاي ءوز كىناسىن مويىندادى.

          «2014 جىلدىڭ ماۋسىمىندا ت. جامانقۇلوۆ ماعان «فەنيكس» كينوفيلمىنىڭ وندىرىسىنە بولىنگەن قاراجاتتىڭ 6 ملن. تەڭگەسىن قولما-قول اقشاعا اينالدىرىپ، وزىنە جەتكىزۋگە نۇسقاۋ بەردى. مەن ول نۇسقاۋدى ورىنداپ، 5،3 ملن. تەڭگەنى قولما-قول اقشاعا اينالدىردىم»،- دەگەن سوتتالۋشى ناتاليا يۋدينا.

          ودان ءارى ناتاليا يۋدينا بيۋدجەت قاراجاتىن قالاي جانە كىمدەردىڭ كومەگىمەن قولما-قول اقشاعا اينالدىرعانىن اڭگىمەلەپ بەردى. ونىڭ ايتۋىنشا، 1 ملن. تەڭگەگە جۋىق قاراجات «AlmaStore» ءجشس-نىڭ ديرەكتورى مارلەن ابىشيەۆپەن كەلىسىم-شارت جاساۋ ارقىلى ۇرلانعان. كەلىسىمگە سايكەس، ابىشيەۆتىڭ فيرماسى «فەنيكس» كينوفيلمىن تۇسىرۋگە قاجەتتى بەينە اپپاراتۋرامەن، بايلانىس قۇرالدارىمەن جانە كولىكپەن قامتاماسىز ەتۋى كەرەك بولعان. الايدا تەرگەۋ بارىسىنان جانە سوتتاعى كۋاگەرلەردىڭ تۇسىنىگىنەن بەلگىلى بولعانىنداي، اتالعان فيرما ەشقانداي قىزمەت ءتۇرىن كورسەتپەگەن. بۇعان قوسا، تاعى دا 1،3 ملن. تەڭگە باسقا ءبىر فيرما – «الەكش» اتتى جالعان كاسىپورىننىڭ كومەگىمەن قولما-قول اقشاعا اينالدىرىلعان. ونىڭ قۇجاتتارىن مارلەن ابىشيەۆ ۇسىنعانى ءمالىم بولدى.

          سوتتا بۇدان باسقا دا قىلمىستىق ءىس-قيمىلدار اشكەرەلەندى. ماسەلەن، 2،3 ملن. تەڭگە سوتتالۋشى يليا كوروبەينيكوۆتىڭ «SKARABEISTUDIO» جەكە كاسىپكەرلىگىنىڭ كومەگىمەن قولما-قول اقشاعا اينالدىرىلىپتى. بۇدان بولەك، تاعى 300 مىڭ تەڭگە جۇرگىزۋشى ۆلاديمير رۋسناكوۆپەن جالعان كەلىسىم-شارت جاساۋ ارقىلى قولما-قول اقشاعا اينالدىرىلعان. اتاپ ايتارلىعى، ناتاليا يۋدينا قۇجاتتارعا ونىڭ جالعان قولىن ءوزى قويىپتى. تاعى دا 717 مىڭ تەڭگەنى تۇڭعىشباي جامانقۇلوۆتىڭ نۇسقاۋىمەن «T.K. TURAN UNIVERSAL BISINESS» ءجشس-نىڭ شوتىنان ەسەپشى نازگۇل ءجۇنىسوۆانىڭ ءمالىم بولدى.

          «ءجۇنىسوۆا ارقىلى قولما-قول اقشاعا اينالدىرىلعان قارجىنى مەن جامانقۇلوۆقا بەردىم. وسىلايشا، ونىڭ تاپسىرماسىن ورىندادىم»،- دەپ ءسوزىن اياقتادى ناتاليا يۋدينا.

          سونىمەن قاتار، تۇڭعىشباي جامانقۇلوۆ ناتاليا يۋديناعا كارتينانىڭ رەجيسسەرى تالعات جانىبەكوۆتىڭ جالعا العان پاتەرىنىڭ اقىسىن تولەۋدى تاپسىرادى. الايدا، بۇل ءفيلمدى ءتۇسىرۋ كەزىندەگى شىعىندار تىزىمىندە كورسەتىلمەگەن ەكەن. وسىلايشا، جالعان جەكە كاسىپورىندار ارقىلى ناتاليا يۋدينا 1،2 ملن. تەڭگەنى قولما-قول اقشاعا اينالدىرىپ، پاتەردىڭ جالىن تولەۋ ءۇشىن تالعات جانىبەكوۆكە بەرگەن.

          سايىپ كەلگەندە، جامانقۇلوۆتىڭ تىكەلەي نۇسقاۋىمەن «فەنيكس» كينوفيلمىن ءتۇسىرۋ كەزەڭىندە بيۋدجەتتەن بولىنگەن قاراجات  «T.K. TURAN UNIVERSAL BISINESS» ءجشس-نىڭ الەۋەتتى جەتكىزۋشىلەرىنەن قولما-قول اقشاعا اينالدىرىلىپ، كەيىنىرەك قوسىمشا تولەماقى ەسەبىندە رەجيسسەر تالعات جانىبەكوۆ پەن ءفيلمنىڭ رەداكتورى عيزات سۇلتانوۆقا تولەنگەن. بۇگىنگى سوت وتىرىسىندا سوتقا جاۋاپ بەرگەن مارلەن ابىشيەۆ ءوزىنىڭ 1 ملن. تەڭگەگە جۋىق قاراجاتتى قولما-قول اقشاعا اينالدىرعانىن اشىق ايتىپ، بۇعان دەيىنگى سوتتالۋشى ناتاليا يۋدينانىڭ سوتتاعى جاۋاپتارىن تولىعىمەن راستادى.

          ەرتەڭگى سوت وتىرىسىندا باسقا دا سوتتالۋشىلار سوتقا تۇسىنىك بەرەدى.