تاريحقا كوز سالساق، قازاق دالاسىندا العاش مەملەكەتتىك بانك بولىمشەسى 1867 جىلى ورال قالاسىندا اشىلىپتى. قازاقستانعا بانك كاپيتالىنىڭ ەنۋى جانە ونىڭ تەرريتورياسىندا كرەديت جەلىسىنىڭ جاسالۋى 19 عاسىردىڭ سوڭىنان باستالدى ەكەن، ياعني، شارۋالاردى قولداۋ ماقساتىندا سول تۇستاعى رەسەي بانكى قازاقستاننىڭ ءار جەرىنەن مەملەكەتتىك بانك بولىمشەلەرىن كوپتەپ اشقان.

بانكتىك جۇيە قازاقستاندا ەكىنشى دۇنيەجۇزىلىك سوعىس باستالعانعا دەيىن جانە تىڭ يگەرۋ جىلدارى ەكونوميكانىڭ كوتەرىلۋىنە كوبىرەك سەپتىگىن تيگىزگەن كورىنەدى. اۋىل-شارۋاشىلىعىن تەحنيكالاسترۋ مەن عىلىم ءوندىرىسىن دامىتۋ باعىتتارىندا ەل اۋماعىندا بانك قۇرىلىمدارى ءتيىستى دەڭگەيدە قىزمەتتەر اتقارعان. ال، قازاقستان تاۋەلسىز مەملەكەت بولعاننان كەيىن ەل اۋماعىندا ەكىنشى دەڭگەيلى بانكتەر سانى ارتقانى بايقالادى. اقشانىڭ اۋىسۋى تۇسىندا سۇرىپتالىپ، ۋاقىت وتە كەلە بىرىكتىرىلگەن جانە قايتا جاساقتالعانى بولىپ ءقازىر قازاقستاندا باس-اياعى 36 ەكىنشى دەڭگەيلى بانك جۇمىس ىستەيدى ەكەن. سولاردىڭ ىشىندە بارلىعىنىڭ اتاۋىنان وزگەشەلىگى ءبىلىنىپ تۇراتىن بانك بولسا، ول - Qazaq banki. ارينە قازىرگى قازاق ءالىپبيى قولدانىلماعان، الايدا اتى قازاقى، لاتىن ارىبىندە جازىلعان قازاق بانكى.

بۇرىنىراق تا «تۇران الەم بانكتىڭ» اتاۋى جاعىمدى ەدى، ول ءقازىر بتا بولىپ كەتتى. «حالىق بانك»، «تەمىر بانك»، «زامان بانك» سياقتى بانكتەر نەمەسە ءتۇرلى جيناقتاۋشى بانكتەر بولعانىمەن ولاردىڭ اتاۋى ەكى تىلدە قاتار جازىلىپ ءجۇر. حالىقتىڭ اۋزىندا ىستىق ىقىلاسقا بولەنىپ جۇرگەن بىردە-بىر بانك جوق ءقازىر، نەگىزىنەن جوعارى ءوسىمدى نەسيەلەر بەرۋ فۋنكسياسىن عانا اتقاراتىن ەكىنشى دەڭگەيلى بانكتەر ۇلتتىق وندىرىسكە جۇمىس ىستەي العان جوق، ولار تەك دەلدال رەتىندە عانا شەتەل كاپيتالىنىڭ قازاقستاندا اينالىمعا ءتۇسىپ، كوبەيە تۇسۋىنە جۇمىس ىستەيدى. بۇل رەتتە كرەديت الۋشى قازاقستاندىقتار سول العان اقشاسىن وندىرىسكە پايدالانۋشىلار ەمەس، بانك قاراجاتىن كوبەيتىپ بەرۋشىلەر عانا بولىپ وتىر. سەبەبى ءبىزدىڭ ەلدە كرەديتتىك ءوسىم تىم جوعارى. ەكىنشى دەڭگەيلى بانكتەر الىپ-ساتارلىق قىزمەتتەن اسا المادى دەسەك، «ۇلتتىق بانكىمىز» تەڭگە باعامىن قۇلدىراتۋدان وزگە جۇمىس ىستەي قويعان جوق. جەكە كاسىپكەرلىككە، شاعىن بيزنەسكە، ۇلتتىق وندىرىسكە كوپتەپ قارجى تۇسەتىن بولسا مەملەكەتتىك ونىمدەر كوپتەپ شىعارىلىپ، وتاندىق تاۋارلارمەن ءوز حالقىمىزدى قامدايتىن دەڭگەيگە جەتە الار ەدىك. وسىنداي ءبىر داعدارىس پەن اقشانى قۇنسىزدىق بيلەگەن ۋاقىتتا قاتارعا قوسىلعان «Qazaq banki» كوڭىل اۋدارارلىق اتاۋىمەن ەرەكشەلەنىپ تۇر، بيىلعى جىلى عانا، 17 شىلدە دە № 1.2.204/37 مەملەكەتتىڭ ليسەنزياسىنا يە بولعان بانك اتى-زاتىنا ساي بولسا ەكەن، قازاققا قىزمەت ەتسە ەكەن دەيمىز.

اقكىسى جانكەرىم