ەلىمىز تاۋەلسىزدىك العان كەزدە ەلگە ورالعان قانداستارىمىزدىڭ العاشقىلارىنىڭ ءبىرى - اقىن الماس احمەتبەك ۇلى. ەڭسەڭدى بيىكتەتىپ، ابىرويىڭدى اسقاقتاتىن «كوك تۋدىڭ جەلبىرەگەنى» ولەڭىنىڭ اۆتورى اقىن الماس احمەتبەك ۇلىنىڭ «كوك تۋدىڭ جەلبىرەگەنى» كىتابى حالىق سۇرانىسىنىڭ ارتۋىنا بايلانىستى ەكىنشى رەت باسپادان شىعىپ وتىر.
2017 جىلدىڭ 6-شى ناۋرىزىندا «اتاكەنت-ەحرو» كورمە ورتالىعىندا «ءىح حالىقارالىق كىتاپ جانە پوليگرافيا كورمە-جارمەڭكەسى» ءوتتى. كورمەگە ءار باسپا ءۇيى باسىپ شىعارعان كىتاپتارىن ۇسىنۋمەن قاتار، كورمە دەسە كورۋگە قۇمار كوپشىلىك تاريحي وقيعانىڭ كۋاگەرلەرى بولدى. تاۋەلسىزدىكتىڭ سيمۆولىنداي بولعان «كوك تۋدىڭ جەلبىرەگەنى» اتتى ءاننىڭ ءسوزىن جازعان، سوزىنە بۇكىل ەلگە، وتانعا دەگەن سان جىلدىق ساعىنىشىن جازعان الماس احمەتبەك ۇلىنىڭ «ساردار» باسپا ۇيىنەن 1000 دانا تارالىممەن جارىق كورگەن «كوك تۋدىڭ جەلبىرەگەنى» اتتى جىر جيناعىنىڭ تۇساۋى كەسىلدى دەپ حابارلاعان ەدىك.
قوس بىردەي قۋانىشتى جاڭالىق بارىسىندا الماس احمەتبەكۇلىمەن بۇگىنگى كەزدەگى ولەڭ، ادەبيەت جاڭالىقتارى جايىندا ويىن سۇراپ، سۇحباتتاسقان ەدىك.
قۇرمەتتى الماس احمەتبەك ۇلى، بۇگىنگى «كوك تۋدىڭ جەلبىرەگەنى» اتتى كىتابىڭىزدىڭ حالىقتىڭ سۇرانىسى بويىنشا ەكىنشى رەت باسپادان شىعۋى ۇلكەن قۋانىش. قۇتتى بولسىن! «ءىح حالىقارالىق كىتاپ جانە پوليگرافيا كورمە-جارمەڭكەسى» جايلى جانە بۇگىنگى كۇندەگى كىتاپتىڭ وقىلۋى جايىندا پىكىرىڭىز قانداي؟
كىتاپ كورمەسى جىل سايىن ءداستۇرلى تۇردە وتەتىن ءىس-شارا. بۇگىندە كىتاپ سۇيەر قاۋىمنىڭ باس قوساتىن مەكەنىنە اينالىپ وتىر. ال قازىرگى كۇندەگى كىتاپتىڭ وقىلۋىنا كەلەر بولساق، جاقسى كىتاپتار وقىلادى. ىزدەپ ءجۇرىپ وقيتىن كىتاپتار دا بار. كىتاپتىڭ وقىلۋى ونىڭ ساپاسى مەن سانىنا بايلانىستى.
«ءبىر ەل – ءبىر كىتاپ» رەسپۋبليكالىق اكسياسى اياسىندا جالپىحالىقتىق وقۋعا جىل كىتابىن تاڭداۋ وتىرىسىنىڭ ناتيجەسى بويىنشا الاشوردانىڭ 100 جىلدىعىنا بايلانىستى سۇلتانماحمۇت تورايعىروۆتىڭ شىعارماشىلىعى تاڭداپ الىندى. وسى جايىندا نە ايتا الاسىز؟
وتە جاقسى. سۇلتانماحمۇت الاشتىڭ العاشقى تۋىن كوتەرگەن اقىن. ول الاش يدەياسىن حالىققا جەتكىزە الادى.
ءوزىڭىز ۇلگى تۇتاتىن اقىن كىم؟
اباي ، دۋلات باباتاي ۇلى، ءمىرجاقىپ دۋلاتوۆ، جۇمەكەن ناجىمەدەنوۆ. وسى كىسىلەردىڭ پوەزياسى ماعان كەرەمەت ۇنايدى.
«كوك تۋدىڭ جەلبىرەگەنى» ءانىنىڭ ەڭ الدىمەن ءسوزى جازىلدى ما، الدە مۋزىكاسى جازىلدى ما؟
«كوك تۋدىڭ جەلبىرەگەنى» ولەڭىنە ەرمۇراتتان بۇرىن دا اندەر جازىلعان بولاتىن . الايدا ولار ۇناعان جوق. سوسىن ەرمۇراتقا ۇسىنىستى مەن جاسادىم. بۇرىنعى ءانۇراننىڭ قالىبىنان پايدالانىپ، ءانۇران دەڭگەيىندەگى دياپازونى كەڭ ءان جازىلۋ كەرەك دەگەن يدەيا بولدى.
الماس احمەتبەك ۇلى، ۋاقىتتىڭ تاپشىلىعىنا قاراماستان بەرگەن سۇحباتىڭىزعا راقمەت!
شىعارماشىلىعىڭىزعا تابىس، وتباسىڭىزعا بەرەكە تىلەيمىن!
سۇحباتتاسقان : ايگەرىم تاۋباي
