"بۇرىندارى ەلدىڭ جىلدىق بيۋدجەتىن بەكىتەردە، ءتۇن ۇيىقتاماي، كۇن ۇيىقتاماي، داۋلاسىپ، ءاربىر تيىندى ساناپ-ەسەپتەپ-ەكشەپ، اقشا بولىنەتىن سالانى-مەكەمەنى ابدەن زەرتتەپ، داۋلاسىپ، قىرىق-پىشاق بولۋشى ەدىك. كەيىنگى كەزدەرى "بيۋدجەت تۋرالى" زاڭدى بىردەن قابىلداي سالاتىن بولدى. جوعارىدان تۇسكەن بۇيرىق سونداي. نەگە بۇلاي دەۋگە ەشكىمدە نە جىگەر، نە قاۋقار جوق. سودان، مۇنداي نارسەگە شىداماي دەپۋتاتتىقتان ءوز ەركىممەن باس تارتىپ، كەتىپ قالدىم"، - دەپ ەدى بەلگىلى قارجىگەر ازامات. قىرىق جىل بويى ەلىمىزدىڭ قارجى سالاسىن باسقارعان ۇلكەن كىسى تەكتەن تەككە كۇيىنبەيتىنى انىق قوي. بيلىكتەگى دوكەيلەر نەبىر قارجىلىق قيتۇرقى وپەراسيالاردى "شىرعالاڭ ويىنعا" اينالدىرىپ العالى قاشان.

"مەگا"، "حان شاتىر"، "ەۋرازيا" تاعى دا باسقا الىپ ويىن-ساۋىق ورتالىقتارىندا ءبىر بۋتيكتىڭ ءبىر ايلىق ارەنداسى - بىرنەشە ميلليوننان باستالىپ، ادام وتە بەرمەيتىن جەردەگى 3-4 شارشى مەترلىك قۋىس بولمەلەر ەڭ ازى - 300 مىڭنان تولەيدى. ودان بولەك بيزنەسمەندەردىڭ سالىعىن، كوممۋنالدىق قىزمەت اقىسىنا كەتەتىن اقشالارىن ەسەپتەي بەرىڭىز. ءتىپتى "ەۋرازيا" ساۋدا ورتالىعىندا ساۋداگەرلەردى كادىمگىدەي قانايتىن كورىنەدى. 5 مينۋتقا كەشىگىپ قالساڭ دا اقشا، بولمە ىشىندە تيتتەي شاڭ تۇرسا دا ايىپپۇل تولەيسىڭ، بۋتيك ىشىندەگى ءبىز زات ءوز ورنىندا تۇرماسا دا اقشا بەرىپ ارەڭ قۇتىلادى ەكەنسىڭ. كاسىپكەرلەر ءبىر جەرگە ارىزدانىپ بارۋعا ءداتى جوق. بوسقا تىراشتانىپ نە كەرەك، ارىزدارى ەسكەرۋسىز قالاتىنىن ءاۋ باستان ءبىلىپ العان. سەبەبى، سەبەبى - ول جەردىڭ يەسى ايگىلى ماميندەر. وسى سياقتى الىپ ويىن-ساۋىق ورتالىقتارىنىڭ يەلەرىن انىقتاي تۇسسەڭىز، ار جاعىنان بيلىكتەگى اتاقتى ادامداردىڭ فاميليالارى اتىپ شىعادى. ايتپاعىم،سونداي ءىرى ورتالىقتارعا بيۋدجەتتەن نە ءۇشىن اقشا ءبولىنىپ كەلگەن؟ ءبىر ايدا ءبىر عانا بۋتيكتەن ميلليونداپ الىپ وتىرعان بولسا، ءبىر ايدا سانداعان بۋتيكتەن ميللياردتاعان قارجى جينالماي ما؟ قارجىعا ءزارۋ قانشاما الەۋمەتتىك سالالار بار؟ سول اقشاعا مەگا ميللياردەرلەرىنىڭ "بيزنەستىڭ الەۋمەتتىك جاۋاپكەرشىلىگى " اياسىندا جاساعان ءبىر مىقتى قامقورلىقتارىن كورمەپپىن. ءبىزدىڭ، سالىق تولەۋشىلەردىڭ اقشاسىنا قول جاياتىنداي ءمۇساپىر كۇيگە تۇسكەندەرىنە جول بولسىن... زاڭسىز بولىنگەن قارجى بيۋدجەتكە قايتارىلۋى ءتيىس! قۇزىرلى ورىندار تەكسەرۋ جۇرگىزۋى ءتيىس! ءاي قايدام، وسى كەزگە دەيىن بيۋدجەتتىڭ ءاربىر تيىنىن شىن جاناشىرلىقپەن ساناپ، ىزدەۋ سالاتىن، ماقساتتى-ماقساتسىز بولىنگەن قارجىنى باقىلاپ وتىرعان ءبىر ادامدى كورگەن جوقپىن. بۇعان - ءبىزدىڭ قارجىگەرلەر دە، ەكونوميستەر دە، ءتىپتى ءوزىمىز دە تىكەلەي كىنالىمىز. ويتكەنى - تالاپ ەتۋدى بىلمەيمىز!!!

دينا تۇلەكوۆا.