19 جاستاعى نيگەريالىق راما حارۋن وتە سيرەك كەزدەسەتىن جانە اۋىر دەرتپەن دۇنيەگە كەلگەن. دارىگەرلەر قىز تۋىلعان كەزىندە-اق وعان اعزاسى وسىپ-جەتىلمەيدى دەگەن دياگنوز قويعان. قازىرگى تاڭدا قىز 6 ايلىق بالا سەكىلدى، اياق-قولدارى مۇلدەم جۇمىس ىستەمەيدى. ۇنەمى دەنەسىنەن اۋىرتپالىق سەزىنەتىن قىز بۇكىل ءومىرىن پلاستيكالىق ىدىستا وتكىزۋدە، ءتىپتى، مۇگەدەكتەرگە ارنالعان اربانىڭ ءوزى وعان قولايسىز، دەپ حابارلايدى «قامشى» اقپاراتتىق اگەنتتىگى شەتەلدىك باق-قا سىلتەمە جاساپ.

«6 ايلىعىنا دەيىن قىزىم ساپ-ساۋ بولاتىن. الايدا، ەڭبەكتەۋدى سول بويى ۇيرەنبەدى، كەيىننەن قىزىمنىڭ ءوسۋ پروسەسى توقتاپ قالدى. ونىڭ ءومىرىنىڭ ءمانىن كەلتىرۋگە بارىنشا تىرىسامىز، قاسىندا ۇنەمى ءبىر ادام وتىرۋى قاجەت. راما كۇنىگە تاڭەرتەڭ ويانعان كەزىندە ءبىر تاڭعاجايىپتىڭ بولاتىنىنا سەنەدى»، - دەيدى قىزدىڭ اناسى.

راماعا تۋعان ءىنىسى 10 جاستاعى فاحاد وتە جاقىن، اپكەسىن قاتتى جاقسى كورەدى. وعان قاتى جانى اشيدى، دەگەنمەن فاحاد رامانى ەرەكشە ادام دەپ ەسەپتەيدى.

«مەن وعان ۇنەمى كومەكتەسىپ جۇرەمىن جانە دە ءبىز كۇنىگە قىدىرامىز. باسقا ادامدار مەنىڭ اپكەمە كومەك كورسەتكەن كەزىندە مەن قاتتى قۋانامىن. راما تۋىستارىمىزعا قوناققا بارعاندى ۇناتادى، سوندىقتان دا ءبىز ولارعا ءجيى بارىپ تۇرامىز»، - دەيدى بالاقاي.

بۇل قىزدىڭ دەرتىن انىقتاۋ ءالى كۇنگە دەيىن مۇمكىن بولماي كەلەدى. اتا-اناسى 15 جىل بويى اۋىر دەرتكە شالدىققان قىزدارىنىڭ ناقتى نەمەن اۋىراتىنىن انىقتاپ بىلمەك بولدى، الايدا ەش ناتيجە شىقپادى. راما حارۋننىڭ جاعدايى نيگەريالىق دارىگەرلەردى تىعىرىققا تىرەدى. كەيبىر جەرگىلىكتى دارىگەرلەر وعان جىننىڭ قارعىسى تيگەن دەپ ايتادى.

راماعا كوپ ادامدار كومەكتەسۋگە كەلىپ تۇرادى ەكەن.

«ءبىر كۇنى قىزىممەن بىرگە دۇكەنگە ارالاۋعا بارعانىمدا راماعا مۇگەدەكتەر ارباسىن الىپ بەرگەن ادامدى كەزدەستىرىپ قالدىم. ول كىسى بىرنەشە رەت سۋرەتكە ءتۇسىرىپ، جەرگىلىكتى گازەتتەرگە بەردى. سول ساتتەن باستاپ كومەك قولىن سوزۋشى ادامدار كوپ كەلىپ تۇرادى»، - دەيدى اناسى. قازىرگى تاڭدا رامانىڭ تۋىستارى قايىرىمدىلىق قورلارى مەن حالىقارالىق دەڭگەيدەگى دارىگەرلەردىڭ نازارىن اۋدارعىسى كەلەدى.

رامانىڭ سوڭعى ءۇمىتى – تاڭعاجايىپ قۇبىلىستىڭ ورىن الۋى.

باتىل قىز ءبىر كۇنى باعى جاناتىنىنا سەنىمدى: «مەنىڭ ومىرىمدە بولىپ جاتقان ءتۇرلى جاعدايلار ءۇشىن قۇدايعا ريزاشىلىعىمدى بىلدىرەمىن. كەيىن ءوزىمنىڭ كوكەنىس ساتاتىن دۇكەنىمدى اشقىم كەلەدى جانە مۇقتاج ادامدار كەلىپ سول دۇكەننەن بار كەرەكتەرىن السا ەكەن دەيمىن. ومىردەن ءدال وسىنى قالايمىن»، - دەيدى راما.