وسىعان دەيىن ق ر حالىق ءارتىسى روزا رىمبايەۆا «ديماشتىڭ ەلىمىزدە سۇيىكتى ءانشى اتانۋىنا مۇمكىندىگى از» دەگەن پىكىر ايتقان بولاتىن. ال ەلىمىزدەگى ەڭ تانىمال، جاستاردىڭ سۇيىكتى ءانشىسى قايرات نۇرتاس «ديماش ءوز ءانiن تاپپاعاندىقتان ەلدە باعالانبادى» دەگەن ويىن بىلدىرگەن. سودان سوڭ قازاق ەستراداسىنىڭ جارقىن جۇلدىزدارىنىڭ ايتقانى الەۋمەتتىك جەلىدە قىزۋ تالقىعا تۇسكەن بولاتىن. الايدا ق ر ۇلتتىق ونەر ۋنيۆەرسيتەتىنىڭ وقىتۋشىسى مايرا ءىلياس قىزى بۇل پىكىرلەرمەن كەلىسپەيتىندىگىن جەتكىزدى. ونىڭ پىكىرىنشە، ديماش قۇدايبەرگەنوۆتىڭ ونەرى ەلىمىزدە دە جوعارى باعالاناتىن بولادى.

«جوق، ول پىكىرگە قارسىمىن. روزانىڭ دا، قايراتتىڭ دا جاناشىرلىق ءبىلدىرىپ جاتقانى وتە دۇرىس. قازىرگى تاڭدا ءبىزدىڭ ەلباسى نۇرسۇلتان نازاربايەۆ «بالاعا قاراڭدار» دەپ ق ر ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆاعا، ءارى ق ر مادەنيەت جانە سپورت ءمينيسترى ارىستانبەك مۇحامەديۇلىنا ارنايى تاپسىرما بەرگەن بولاتىن. ولار بالانى قامقورلىعىنا الىپ وتىر. مەنىڭ ويىمشا، وسى جاعدايدى ەسكەرە كەلە، مۇنداي جاعداي بولمايدى. دۇنيەجۇزى ونى مويىنداپ، ۇلكەن مۋزىكا ماماندارى ءوز باعالارىن بەرىپ جاتقان كەزدە ءبىزدىڭ ديماشتىڭ ونەرى ەلىمىزدە باعالانادى»، - دەدى ول.

وسى ورايدا تانىمال ءانشى ديماشتىڭ تالانتى بۇرىننان ەلىمىزدە جوعارى باعالانعانىن اتاپ ءوتتى.

«حالىق بۇرىننان دا باعاسىن بەرىپ ءجۇر. ونىڭ وسى ءبىلىم ورداسىنا تۇسكەنىنىڭ ءوزى ەڭبەگىنىڭ جوعارى باعالانعانى. سونداي-اق، ەلىمىزدەگى ۇلكەن شوۋ باعدارلامالارعا ءبىزدىڭ ديماش قاتىسىپ جاتادى. ءتىپتى، ول مەملەكەتتىك دارەجەدەگى ماڭىزدى كونسەرتتەردە، ەلباسىنىڭ الدىندا اندەرىن ايتىپ ءجۇر. ارينە، ديماش وسىدان 1-2 جىل بۇرىن جاس بولدى. ءقازىر ول تاجىريبە جيناقتاپ جاتىر. ول جۇڭگو حالىق رەسپۋبليكاسىنداعى تاماشا باعدارلاماعا قاتىسىپ، «ازيانىڭ ەڭ ۇزدىك ءانشىسى» اتاندى. وسىنىڭ بارلىعى ونىڭ ەڭبەگىنىڭ باعالانۋى»، - دەدى ءانشى.

سونىمەن قاتار مايرا ءىلياس قىزى قىتايدى مويىنداتقان قازاق بالاسىنىڭ ءوز جەرىندە نەگە تانىمال بولا الماعاندىعىن بىلايشا ءتۇسىندىردى.

«ماسەلە مەملەكەتتە ەمەس. ماسەلەن جارنامادا. بىزدە تىرناق استىنان كىر ىزدەپ، وسىنداي اڭگىمە ايتىپ جۇرگەندەر بار. بەلگىلى ونەر قايراتكەرلەرىنىڭ جانە ازاماتتاردىڭ ايتقان پىكىرىن ەستىدىم. ول دۇرىس ەمەس. بۇل جەردە ۇلكەن ءرول ويناعانى جارنامانىڭ كەرەمەتتىگى. ەسىمدە مايكل دجەكسون قايتىس بولعان كەزدە جارتى ساعاتتىڭ ىشىندە دۇنيەجۇزى ونىڭ ومىردەن وزعاندىعىن ءبىلدى. سوندىقتان مۇنىڭ بارلىعى جارناماعا بايلانىستى. قازاق ەلى ءومىر بويى ونەرىن سىيلاعان»، - دەدى ول.

ءسوز سوڭىندا حالىق ءارتىسى كەزىندە وتاندىق پروديۋسەرلەردىڭ ديماش قۇدايبەرگەنوۆتى سىنعا العانىندىعىنا قاتىستى ويىن ءبىلدىردى.

«جوق، مەن ونى مەنسىبەگەن دەپ ايتا المايمىن. مەن ونى ەستىپ ءجۇرمىن. ول جەردە ءبىزدىڭ ديماش ءوزىنىڭ قازىرگى دەڭگەيىنە جەتپەۋى، ول كەزدەگى تاجىريبەسىنىڭ ازدىعى، جاستىعى اسەر ەتتى. مەنىڭ ويىمشا ايتىسكەر ايتىسكەردى، جۋرناليست ءجۋرناليستى، ءانشى ءانشىنى باعالاۋى كەرەك»، - دەپ تۇيىندەدى ءسوزىن مايرا ءىلياس قىزى.

ەستەرىڭىزگە سالا كەتەيىك، 15 ساۋىردە ديماش قۇدايبەرگەنوۆ «I’m singer» حالىقارالىق ءان بايقاۋىنىڭ ەڭ سوڭعى شەشۋشى سايىسىنا قاتىسادى.

اقتىق سايىستى «Hunan TV» جانە «حابار» تەلەارنالارى تىكەلەي ەفيردەن كورسەتەدى.