ق ر باس پروكۋرورى وتباسىندا داۋ تۋدىرۋشىلاردى وتە اۋىر جازاعا تارتۋ كەرەكتىگىن ايتتى. سونىمەن قاتار جاستاردى وتباسىلىق ومىرگە دايىنداپ، ۇلدارعا اكە بولۋدى ەرتە باستان ۇيرەتۋ قاجەت، دەپ حابارلايدى قامشى اقپاراتتىق اگەنتتىگى ينفورمبيۋرو باسىلىمىنا سىلتەمە جاساپ.

باس پروكۋرور جاقىپ اسانوۆ وتباسىلىق جانجالدارعا قاتىستى ءوز پىكىرىن ءبىلدىردى.

«ولارعا ەڭ لايىقتى جازا – قوعامدىق جۇمىسقا تارتۋ. ايەلىنە ءزابىر كورسەتەتىن ەركەكتەردى اياماي قوعامدىق جۇمىسقا سالعان ابزال. الايدا، ءبىزدىڭ كونستيتۋسيالىق زاڭىمىز بويىنشا مۇنداي ۇكىم شىعارۋعا بولادى ما؟  بۇل سۇراق توڭىرەگىندە زاڭگەرلەر انىق-قانىعىن انىقتاۋى قاجەت. ەكىنشىدەن، تاجىريبەدە جەتى-سەگىز رەت ەسكەرتىپ جاتامىز، ءبىراق ەش ناتيجە جوق. سوندىقتان دا مۇنداي ادامداردى اكىمشىلىك جازاعا  تارتۋ قاجەت. العاشىندا 10 كۇنگە قاماسا، ەكىنشى رەت تاعى قايتالاسا، 15 كۇنگە جاۋىپ تاستاۋ شارت. ەگەر ول باسقاشا ايتقاندى تۇسىنبەيتىن بولسا، قاتاڭ جازاعا تارتىلۋى قاجەت»، - دەپ مالىمدەدى جاقىپ اسانوۆ.

سونىمەن قاتار، اكىمشىلىك جازاعا قاتىستى ءبىرشاما وزگەرتۋلەر ەنگىزەتىنىن جانە قىلمىستىق كودەكستە دە ەداۋىر تولىقتىرۋلار بولاتىنىن ايتىپ ءوتتى.

«قۇقىق بۇزۋشىلىق پەن قىلمىس كىشكەنتاي بالالاردىڭ كوزىنشە بولسا، بۇل ءىس وتە اۋىر جاعداي رەتىندە قارالۋى ءتيىس. جاڭا زاڭنىڭ جوباسى ءبىز ءۇشىن وتە ماڭىزدى، ونى ءىىم بىرلەسىپ جاسايمىز. تۇزەتۋلەردى دايىنداپ بولعاننان سوڭ دەپۋتاتتارمەن بىرگە ەنگىزەمىز»، - دەدى باس پروكۋرور.

جاقىپ اسانوۆ مەكتەپتەردە كاسىپكەرلىك نەگىزدەردى ۇيرەتەتىن ارنايى كۋرس اشۋدى ۇسىندى. ونداعى نەگىزگى ماقسات – بالالاردىڭ قابىلەتىن ارتتىرۋ، ولاردى ۇلكەن ومىرگە دايىنداۋ جانە تاۋەلدىلىك پسيحولوگياسىن جويۋ.

«جاستار بىر-بىرىنە عاشىق بولىپ، كەيىننەن ۇيلەنەدى. وتباسىلىق ءومىردىڭ باستاپقى كەزەڭىندە ءبارى دە جاقسى، كەرەمەت ءوتىپ جاتقانمەن، ۋاقىت وتە كەلە ۇرىس-كەرىس، جانجالدار تۋىنداي باستايدى. جاستاردىڭ كوبىسى وتباسىلىق ءومىردىڭ ماڭىزىن تۇسىنبەيدى، ونداعى شىن باقىتتى كورە المايدى. سوندىقتان دا، وتباسىن قۇرعىسى كەلگەن جاستار ارنايى كۋرستان ءوتۋى قاجەت. ول كۋرساتن وتپەگەن جاعدايدا ۇيلەنۋگە رۇقسات بەرىلمەۋى ءتيىس. مۇنداي ەرەجەلەر ساۋد ارابياسى، مالايزيا، لاتۆيا سىندى الەمنىڭ بىرنەشە ەلدەرىندە قولدانىلادى»، - دەپ مالىمدەدى قاداعالاۋ ورگانىنىڭ باسشىسى.

جاقىپ اسانوۆتىڭ ايتۋىنشا، كەلەسى اپتادا «قالاي اكە بولۋ قاجەت؟» تاقىرىبىندا ءار جەرلەردە سەمينارلار وتەدى.

ول پارلامەنتكە اكىمشىلىك جازعا قاتىستى وزگەرتۋلەردىڭ جوباسىن ۇسىنىپ، وتباسىنداعى داۋ تۋدىرۋشىلاردى 3 ساعاتتان باستاپ 24 ساعاتقا دەيىن تۇرمەگە جابۋ كەرەكتىگىن ايتتى. جانجال تۋدىرۋشى ساباسىنا ءتۇسۋى ءۇشىن وسى ۋاقىت جەتكىلىكتى.

«اشۋلى ادامدار ىزالانعان كەزىندە تۇرعاندا ەشكىممەن دە بىتىمگە كەلە المايدى. مۇنداي ادامداردى ەمدەي قاجەت، سەبەبى بۇلار وزدەرىنىڭ اۋرۋ ەكەندىگىن مويىندامايدى. وسى سىندى جاندارعا ارنالعان پسيحوكوررەكسيالىق قىزمەت قاجەت. كەرەكتى قۇرالدار جوق دەيمىز، الايدا ءبىز جىل سايىن مەديسينالىق ايىقتىرعىشتارعا 5 ميللياردتان كوپ قاراجات جۇمسايمىز. سول اقشاعا ودان دا پسيحيكالىق اۋرۋعا شالدىققان ادامداردى ەمدەيتىن ورتالىق اشايىق»، - دەپ مالىمدەدى جاقىپ اسانوۆ.

ونىڭ ايتۋىنشا، قازاقستاندا كۇنىنە 12 ايەل زورلىق-زومبىلىققا ۇشىرايدى ەكەن. ءاربىر ءۇشىنشى قىلمىس وتباسىندا ولتىرىلگەن ادامدار بولىپ تابىلادى. 2016 جىلى وتباسىلىق زورلىق-زومبىلىقتىڭ سالدارىنان 36 ايەل مەن ءبىر ءبۇلدىرشىن قازا تاپقان. سەكسۋالدى زورلىقتان 2500 ايەل مەن 900 ءبۇلدىرشىن جاپا شەككەن. ال، وز-وزدەرىنە قول جۇمساعانداردىڭ 742ء-سى ايەلدەر بولسا، 175ء-ى كامەلەت جاسقا تولماعان جاسوسپىرىمدەر.

ەستەرىڭىزگە سالا كەتسەك، وتكەن جىلدىڭ قاراشا ايىندا باس پروكۋراتۋرا وتباسىلىق زورلىق-زومبىلىققا قاتىستى وزگەرتۋلەر ەنگىزەتىنىن حابارلاعان بولاتىن.

اۋدارعان: نازەركە لابيحان