بۇگىن الماتى قالاسىندا الاشوردانىڭ 100 جىلدىق مەرەيتويىنا وراي «100 اعاش ەگۋ» اكسياسى ءوتتى.

قامشى اگەنتتىگى باستاماسىمەن وتكەن اكسياعا قوعام قايراتكەرلەرى، ادەبي قاۋىم وكىلدەرى، جۋرناليستەر، ستۋدەنتتەر قاتىستى.

اعاش ەگۋگە قامشىنىڭ وقىرماندارى كوپتەپ قولداۋ ءبىلدىرىپ، اتىمتاي جومارتتىق تانىتتى. الاش رۋحىنا ارنالعان 100 اعاش الاششىل بەلسەندىلەردىڭ قىزۋ اتسالىسۋىمەن بايتۇرسىنوۆ جانە جامبىل كوشەلەرىنىڭ قيلىسىندا ورنالاسقان بايتۇرسىن ۇلى ساياباعىنا وتىرعىزىلدى. اتالعان جەردە اعاش ەگۋگە المالى اۋدانىنىڭ اكىمدىگى ۇلكەن قولداۋ جاسادى.

بيىل قازاقستان رەسپۋبليكاسىنىڭ ىرگەتاسى - «الاشوردانىڭ» قۇرىلعانىنا 100 جىل تولدى. بۇل تاريحي داتانى ويداعىداي اتاپ ءوتۋ - الاش ارىستارى اڭساعان ازات وتاندا ءومىر ءسۇرىپ جاتقان بىزدەر ءۇشىن ابىرويلى مىندەت ەكەنى داۋسىز. جينالعاندار وتكەن شارانىڭ الاش يدەياسىن، الاش مۇراسىن ناسيحاتتاۋدا ماڭىزى زور ەكەنىن اتادى.

الاش قايراتكەرلەرىن ارداقتاۋ تۋراسىندا 1 اقپاندا ۇكىمەت وتىرىسىندا سول كەزدەگى ۇكىمەت باسشىسى ورىنباسارى يمانعالي تاسماعامبەتوۆ «الاشتىڭ 100 جىلدىعىنا دۇرىستاپ دايىندالۋىمىز كەرەك. الاشتىڭ 100 جىلدىعى سول زامانمەن قالىپ قويماي، بۇگىنگى تاۋەلسىز مەملەكەتپەن بايلانىستىرۋ ورىندى بولادى»، - دەگەن ەدى. وعان قازاق ءتىلدى باق-تار مەن الاشتانۋشى، الاش قايراتكەرلەرىنىڭ ءومىر جولىن زەرتتەۋشى عالىمدار دا ءوز ۇلەستەرىن قوسىپ جاتىر.

الاش قايراتكەرلى قۇرعان الاش-وردا مەملەكەتىنىڭ 100 جىلدىق مەرەيتويىنا وراي ب ا ق وكىلى رەتىندە قامشى اقپاراتتىق اگەنتتىگى جىل باسىندا 5 ءىس-شارانى اتقارۋدى قولعا العان بولاتىن.

ۇلت كوسەمى ءاليحان بوكەيحاننىڭ تۋعان كۇنىندە، 5 ناۋرىزدا الماتىدا قامشى اگەنتتىگى الاش ارىستارىنا ارناپ اس بەرگەن ەدى.

الداعى ۋاقىتتا قامشى اقپاراتتىق اگەنتتىگى 100 جەتىم بالانىڭ مۇقتاجدىعىن قامتاماسىز ەتۋ، 100 ۇلگەرىمى جاقسى مۇقتاج ستۋدەنتكە ءبىر جولعى شاكىرتاقى بەرۋ جانە «الاشتىڭ 100 ءىزباسارى» دەگەن اتپەن ەلگە ەڭبەك ەتىپ جۇرگەن قايراتكەرلەر اراسىنان 10 ادامعا «الاشوردا – 100 جىل» مەرەكەلىك مەدالىن تابىستاۋ سىندى ءىس-شارالاردى اتقاراتىن بولادى.