ديماش قۇدايبەرگەنوۆ «I am singer» بايقاۋىنىڭ فينالىندا 2ء-شى ورىنعا يە بولدى، دەپ حابارلايدى قامشى اقپاراتتىق اگەنتتىگى.

قىتايدىڭ چانشا قالاسىندا ءۇش ايعا سوزىلعان "مەن ءانشىمىن" بايقاۋى بۇگىن ءوز مارەسىنە جەتتى.

ديماش جوبا بارىسىندا ەكىنشى ورىندى يەلەنىپ، گونكونگ ءانشىسى Sandy Lam جەڭىسكە جەتتى دەگەن اقپارات عالامتور بەتىن شارلاپ ءجۇر. ديماشتىڭ ءوز ءسوزىن قايتالاپ وتكىمىز كەلەدى: "مەن قانداي ورىن السام دا، ءوزىمدى جەڭىمپاز سەزىنەمىن". قازاق ەلى ءۇشىن ديماش ءابسوليۋتتى جەڭىمپاز.

ايتا كەتەيىك، جەڭىمپازداردىڭ تاعدىرىن كورەرمەن زالىندا وتىرعان 500 ادام شەشكەن. 

فينالدىڭ ترانسلياسياسى استانا ۋاقىتىمەن ساعات 20.00-دە قىتايدا باستالدى. ال بايقاۋدىڭ قورىتىندىسى شىعىپ قويدى.

الەمدى اۋزىنا قاراتقان ءانشى ديماش قۇدايبەرگەنوۆ «مەن ءانشىمىن» جوباسىنا قاتىسىپ، بۇكىل الەمدى تاڭ قالدىرعان بولاتىن. بايقاۋدىڭ اقتىق سىنىندا ديماش تانىمال قىتايلىق ءانشى شان ۆەنسزەنمەن قوسىلىپ پوپ-مۋزىكا كورولى مايكل دجەكسوننىڭ Earth Song ءانىن ورىنداعان. 

ديماش قۇدايبەرگەنوۆ بىرگە ءان ايتاتىن جۇبىمەن كۇنى كەشە قىزىل كىلەممەن ءجۇرىپ وتكەن بولاتىن.

ديماشتىڭ "مەن ءانشىمىن" بايقاۋىنا قاتىسۋى قازاقستاننىڭ دا بەدەلىن كوتەرگەنى انىق. بايقاۋدىڭ باسىنان باستاپ تازا قازاق تىلىندە سويلەر جۇرگەن ول قازاق ەلىنىڭ ابىرويىن اسقاقتاتا ءبىلدى. ءار كەزەڭ سايىن  ەرەكشە قويىلىممەن، ەرەكشە انمەن سۇيسىندىرە بىلگەن ديماش - بۇگىندە الەم جۇلدىزى.

بايقاۋدىڭ باستاپقى كەزەڭىنەن جۇرتشىلىقتىڭ نازارىنا ىلىگىپ، الەمنىڭ نازارىن وزىنە اۋدارا العان ديماش  18،47%، جەڭىسكە جەتكەن گونكونگ ءانشىسى 22،6% داۋىس جيناعان. 

ديماشتىڭ فينالدا كورسەتكەن ونەرىن نازارلارىڭىزعا ۇسىنامىز.