استانادا 7 مامىر كۇنى اسكەري پارادقا قاتىساتىن پارادتىق ەسەپتوپتار مەن اسكەري تەحنيكانىڭ جاتتىعۋى وتكىزىلىپ جاتىر، دەپ حابارلايدى قامشى اقپاراتتىق اگەنتتىگى.

ق ر قورعانىس مينيسترلىگىنىڭ باسپا ءسوز قىزمەتىنىڭ مالىمەتىنشە، اسكەري پاراد قازاقستان قارۋلى كۇشتەرىنىڭ 25 جىلدىعىنا ارنالعان. اسكەريلەر كۇن سايىن دايىندىقتارىن پىسىقتاپ جاتىر، جاتتىعۋلارى دا كۇن سايىن وتكىزىلەدى. ەلىمىزدىڭ ءارتۇرلى وڭىرىنەن كەلگەن اسكەري قىزمەتشىلەر پالاتكالى قالاشىقتا تۇرىپ جاتىر. سونداي-اق، اسكەري تەحنيكانى جوسپارلى تەكسەرۋ جانە تەحنيكالىق قىزمەت كورسەتۋ دە ءجۇرىپ جاتىر.

دالالىق لاگەردە جەكە قۇرامعا ارنالعان بارلىق قاجەتتى جاعداي جاسالعان. اتاپ ايتقاندا، تۇرۋعا ارنالعان پالاتكالار، مەديسينالىق پۋنكتتەر، تاماقتانۋ پۋنكتتەرى جانە دالالىق مونشا. دالالىق قالاشىقتىڭ اۋماعىندا بوس ۋاقىتتى ۇيىمداستىرۋ ءۇشىن جىلجىمالى اقپاراتتىق كەشەن ورىستەتىلدى. استانادا وتەتىن پارادقا ءبىر ايدان از ۋاقىت الدى.

تارتىلاتىن جەكە قۇرام مەن اسكەري تەحنيكانىڭ رەكوردتىق سانىنان باسقا، الداعى وتەتىن پارادتىڭ ەرەكشەلىكتەرىنىڭ ءبىرى الاڭدا اسكەري-تەحنيكالىق مەكتەپتەردىڭ ءاۆتوموبيلدى تەحنيكاسىندا ءجۇرىپ وتەتىن قازاقستان قارۋلى كۇشتەرى ارداگەرلەرىنىڭ، «جاس ۇلان» ءتورت اسكەري مەكتەپ پەن اسكەري-پاتريوتتىق كلۋبتاردىڭ تاربيەلەنۋشىلەرى جانە قورعانىس مينيسترلىگى اسكەري-تەحنيكالىق مەكتەپتەرىنىڭ وقۋشىلارى، سونداي-اق، اۋماقتىق قورعانىس بريگادالارى قۇراما روتاسىنىڭ قاتىسۋى بولىپ تابىلادى.