ريم قالاسىندا اقان ساتايەۆ پەن ءاليا نازاربايەۆانىڭ تاريحي دراماسىنىڭ كورسەتىلىمى بولدى، دەپ حابارلايدى قامشى اقپاراتتىق اگەنتتىگى.

ريمدە رەجيسسەر اقان ساتايەۆ پەن باس پروديۋسسەر ءاليا نازاربايەۆانىڭ «اناعا اپارار جول» ءفيلمىنىڭ گالا كورسەتىلىمى بولىپ ءوتتى. يتالياندىقتار قازاقستاننىڭ اۋقىمدى تاريحي كينو جاباسىنا ءوز باعالارىن بەردى. قازاقستاندىق كورەرمەن سىندى يتالياندىقتار دا كوز جاسىنا ەرىك بەردى. بۇگىن، 17ءساۋىر كۇنى، فيلم ميلاندا كورسەتىلمەك.

ءفيلمنىڭ كورسەتىلىمى «Casa del cinema» كينوتەاترىندا يتاليانشا سۋبتيرتلارمەن قازاقستاننىڭ يتالياداعى ەلشىلىگىنىڭ قولداۋىمەن ءوتتى. فيلم ريمدىكتەر مەن قالا قوناقتارىنىڭ قازاق حالقىنا دەگەن قىزىعۋشىلىعىن وياتتى. كورەرمەن ءفيلمدى جىلى قابىلداپ، كوز جاسىنا ەرىك بەردى.

پرەسس-كونفەرەنسياعا جانە كورەرمەندەرمەن كەزدەسۋگە ءفيلمنىڭ باس كەيىپكەرلەرى ارۋجان جازىلبەكوۆا مەن التىناي نوگەربەك قاتىستى.

«اناعا اپارار جول» ءفيلمى باس كەيىپكەرگە ءومىردىڭ قيىندىقتارىن جەڭۋگە كومەكتەسكەن انانىڭ شەكسىز ماحابباتىنىڭ كۇشى تۋرالى. فيلمدە 1930 جىلدان باستاپ، ءبىزدىڭ بۇگىنگى كەزەڭگە دەيىنگى اۋقىمدى ۋاقىت قامتىلعان. نەگىزگى وقيعا قازاق حالقىنىڭ باسىنداعى اۋىر كەزەڭدەر: ۇجىمداستىرۋ، جۇت، سوعىس جانە سوعىستان كەيىنگى كەزەڭدەر تۋرالى. فيلم رۋحاني قۇندىلىقتار تۋرالى ويلانۋعا جانە ومىرگە دەگەن كوزقاراستى وزگەرتۋگە سەپتىگىن تيگىزەدى.

تاريحي دراما قازاقستان، بەلورۋسسيا مەن ءازىربايجاندا ءتۇسىرىلدى. مينسكتە سوعىس كەزەڭى تاسپالانعان بولاتىن. «دنەپردى الۋ» كورىنىسىندە 500-گە جۋىق اداممەن، 300 اسكەري تەحنيكا ءتۇسىرىلدى. فيلم تۇسىرىلىمىنە 2 مىڭنان استام ادام قاتىسقان بولاتىن.

فيلم يالتاداعى «ەۆرازييسكيي موست» كينو فەستيۆالىندە گران-پريگە يە بولدى. جانە دە فيلم يتاليادا كورسەتىلىپ جاتقان كەزەڭدە رەجيسسەر اقان ساتايەۆ وسى ءفيلمى ءۇشىن بىشكەكتە ورتالىق ازيانىڭ «اق بارس» VI ۇلتتىق كينو جۇلدەسىندە جىلدىڭ ۇزدىك ءفيلمى جۇلدەسىن الدى.

«La strada verso la madre» «اناعا اپارار جول» يتاليان تىلىنە وسىلاي اۋدارىلادى. وتە قاتتى قوبالجىدىق. «Casa del Cinema» كينوتەاترىندا ءبىزدىڭ «اناعا اپارار جول» ءفيلمىن يتالياندىقتارعا كورسەتتىك. يتاليانىڭ مىقتى اكتەرلەر مەن رەجيسسەرلەردىڭ وتانى ەكەنىن وزدەرىڭىزدەر دە بىلەسىزدەر... قاتتى قورىقتىق. ال سوسىن: «Bravissimo، Grazie، Molto bene»! تاماشا تولقىنىس سەزىم»، - دەپ جاريالادى ءوزىنىڭ ينستاگرام پاراقشاسىندا ارۋجان جازىلبەكوۆا.

«ارينە انا بولۋ – تاماشا ءارى جارقىن سەزىم، انا قاي جەردە بولماسىن انا. مەنىڭشە، الەمدەگى بار انانىڭ ىشكى سەزىمى بىردەي. كەز كەلگەن ەلدەگى انا بۇل ءفيلمدى جاقسى تۇسىنەدى»، - دەپ ءبولىستى التىناي نوگەربەك.

ەستەرىڭىزگە سالا كەتەيىك، ءفيلمدى ش.ايمانوۆ اتىنداعى «قازاقفيلم» اق مەن «جاڭا الەم» ج ش س قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا تۇسىرگەن.

«ءبىز كۇللى الەمدى ءوز تاريحىمىزبەن، مادەنيەتىمىزبەن، جالپى ەلىمىزبەن تانىستىرعىمىز كەلەدى. سوندىقتان ءفيلمدى ءارتۇرلى ەلدەردە كورسەتۋگە تىرىسامىز. وسىعان دەيىن فيلم لوس-اندجەلەس پەن ماسكەۋدە كورسەتىلگەن بولاتىن. جانە وسى ءفيلمدى باسقا فەستيۆالدەردە كورسەتسەك دەگەن ويىمىز بار»، - دەپ مالىمدەدى «جاڭا الەم» ج ش س پروديۋسەرى يكرام كاريموۆ.