الماتى وبلىسىندا بۇتىندەي ءبىر اۋىلدىڭ مالى جاپپاي اۋرۋعا شالدىعىپ جاتىر. ارام ولگەن مالدىڭ سانى ءقازىردىڭ وزىندە ونعا جۋىقتاپ قالدى. ءبىراق سەبەبىن ەشكىم بىلمەيدى. ءىرى قاراعا جابىسقان دەرتتىڭ اتى بەلگىسىز ءالى. اۋىل جۇرتتى بولسا، ادامعا جۇعا ما دەپ قاۋىپتەنىپ وتىر، دەپ حابارلايدى قامشى اقپاراتتىق اگەنتتىگى www.31.kz عا سىلتەمە جاساي وتىرا.

4 كۇننىڭ ىشىندە 15 مىڭ تەڭگە كەتتى. ال قالعان قاراجاتتى قايدان تابامىز. ۆەدتەحنيكتار بۇگىن عانا كەلدى. وزدەرى مىنانى كورىپ، جيىركەنىپ، كەتىپ قالدى. ءتىپتى بولماسا مىنا مالدى ءولتىرىپ، كومىڭىزدەر.

ەسكەلدى اۋدانىنا قاراستى ءورقۋساق اۋىلىنىڭ تۇرعىندارىنان مازا قاشقان. ويتكەنى قوراداعى ءىرى قارا مالدىڭ اۋزىنان كوبىك اعىپ، تۇسىنىكسىز دەرتكە شالدىعىپتى. ءتىپتى بىرنەشە مال ورنىنان تۇرا الماي، ءولىپ قالعانى قۇپيا ىندەتتىڭ ءقاۋىپتى ەكەنىن ءبىلدىرۋى مۇمكىن دەپ حالىق ۇرەيلى.

 ءورقۋساق اۋىلىنىڭ تۇرعىنى:  "اۋىرعان كەزدە سىلەيىپ تۇرىپ قالادى. ودان اۋزىنان بولار - بولماس سىلەكەي اعادى. ءتىلدىڭ قابىقتارى ءتۇسىپ قالدى. تاڭدايى ول ءتۇسىپ جاتىر. شىنىمدى ايتسام مەن قورقامىن. مىناۋ جۇقپالى اۋرۋ بولادى ما دەپ".

ءساتاي جاڭىلسىننىڭ وسىمەن ەكىنشى مالى ءولىپتى. مالىنا ىندەت بولىپ كەلگەن دەرت «اۋسىل» بولۋى مۇمكىن دەپ جوبالايدى ءوزى. بۇل پىكىرمەن جۇزدەن استام مالى قورادا اۋىرىپ جاتقان وزگە دە اۋىل تۇرعىندارى كەلىسەدى.

ءورقۋساقتىقتار جيىرما كۇننەن بەرى قۇپيا جاعدايدا قىرىلىپ جاتقان مالدارىن امان الىپ قالۋعا بارىمىزدى سالىپ جاتىرمىز دەيدى. الايدا شاعىن عانا اۋىلعا كەلگەن دەرتتىڭ نەدەن شىققانىن ماماندار ءالى انىقتاي الماي جاتىر ەكەن.

 ەسكەلدى اۋداندىق ۆەتەريناريا ءبولىمىنىڭ باسشىسى بۇل تۋرالى بىلاي دەيدى:

"كەزەكتەن تىس سياقتى اۋرۋ كەلىپ تۇر. بۇنى ەندى انىقتاپ جاتىرمىز. بيوپروبا دەيدى عوي، زەتحاناعا جەتكىزىپ، انىقتالىپ جاتىر".