بۇگىن مۇحتار قۇل-مۇحاممەد «نۇر وتان» پارتياسىنىڭ وبلىستىق فيليالدارى جانە دەپارتامەنت باسشىلارىمەن كەڭەيتىلگەن وتىرىس وتكىزدى. ول قازاقستانداعى جەتەكشى ساياسي بىرلەستىكتىڭ 2017 جىلعا ارنالعان جۇمىستارىنىڭ باسىم باعىتتارىنا ارنالدى.
كەزدەسۋ بارىسىندا كوكتەمگى سۋ تاسقىنىنان زارداپ شەككەن وڭىرلەردەگى احۋال دا نازاردان تىس قالعان جوق. وبلىستىق فيليالداردىڭ باسشىلارى پارتيا ءتوراعاسىنىڭ ءبىرىنشى ورىنباسارىنا كۇن جىلىنا باستاعان ەلدى مەكەندەردىڭ شىنايى احۋالى تۋرالى باياندادى.
مۇحتار قۇل-مۇحاممەد پارتيانىڭ بارلىق فيليالدارىنا تابيعي اپاتتىڭ سالدارىنان پايدا بولعان ماسەلەلەردى شەشۋگە بەلسەنە اتسالىسۋدى تاپسىردى.
«سۋ تاسقىنىنان زارداپ شەككەندەرگە قول ۇشىن سوزۋ – ءبىزدىڭ ازاماتتىق ابزال بورىشىمىز. سوندىقتان جەرگىلىكتى جەرلەردە وسى باعىتتاعى جۇمىستى جەدەل ءارى جۇيەلى ۇيىمداستىرۋىمىز كەرەك»، – دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى.
