«ازىرەت سۇلتان» مەملەكەتتىك تاريحي-مادەني قورىق-مۋزەيى ءماجىلىس زالىندا قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىن تالقىلاۋعا ارنالعان جيىن ءوتتى. جينالىسقا «ازىرەت سۇلتان» قورىق-مۋزەيىنىڭ تولىق قۇرامدى قىزمەتكەرلەرى قاتىستى دەپ حابارلايدى قامشى اا «ازىرەت سۇلتان» قورىق-مۋزەيىنىڭ باسپا ءسوز قىزمەتىنە سىلتەمە جاساي وتىرىپ.

اتالعان جيىن بارىسىندا قورىق-مۋزەيدىڭ عىلىمي قىزمەتكەرى ب.بايبولوۆ «بولاشاققا باعدار: رۋحاني جاڭعىرۋ» اتتى ماقالاعا بايلانىستى بايانداما وقىدى. ەلباسى ماقالاسىنا جان-جاقتى توقتالىپ اتقارىلىپ جاتقان «قازاقستاننىڭ كيەلى جەرلەرىنىڭ، گەوگرافياسى» جوباسى ەلىمىزدى تانىتۋعا تىڭ سەرپىلىس بەرەتىنىن، سونىڭ ارقاسىندا ۇلى دالا ەلىنىڭ ۇلان-عايىر اتىرابىندا ورنالاسقان تۇركىستان، ۇلىتاۋ، ماڭعىستاۋ، جەتىسۋ، التاي سىندى كيەلى ورىنداردىڭ قايتا تۇلەۋىنە زور مۇمكىندىك بەرەتىنىن اتاپ ءوتتى. 

سونداي-اق، جيىن بارىسىندا ماقالادا كورسەتىلگەن «ۇلتتىق سانا»، «تۋعان جەر» باعدارلاماسى، «قازاق تىلىندەگى 100 جاڭا وقۋلىق»، «مادەني-گەوگرافيالىق بەلدەۋ»، «100 جاڭا ەسىم» جانە وزگە دە ماسەلەلەر كەڭ كولەمدە تالقىلانىپ، قورىق-مۋزەي قىزمەتكەرلەرى تاراپىنان ءبىر اۋىزدان قولداۋعا يە بولدى.

د.قوجامۇراتوۆ