الماتىدا قوعامدىق كولىكتەردە جول ءجۇرۋ ءۇشىن سارالانعان تاريف ەنگىزىلمەك. «كولىك تۋرالى» زاڭعا وزگەرىستەردى ەنگىزۋ ماسەلەسى پارلامەنت ماجىلىسىندە بەكىتىلگەن، دەپ جازادى قامشى اا «الماتى» تەلەارناسىنا سىلتەمە جاساپ.

 قۇجات سەناتورلاردىڭ قاراۋىنا جىبەرىلدى.

«وڭاي» كارتاسى بار ازاماتتارعا ۋايىمداۋدىڭ قاجەتى جوق، ولار ءۇشىن جول اقىسى سول باياعىشا 80 تەڭگە بولىپ قالا بەرمەك. ال قولما-قول اقشا تولەيتىندەر ءۇشىن بيلەت قۇنى 120 تەڭگەگە دەيىن ءوسۋى مۇمكىن. سونداي-اق، جاڭا تاريف ءبىر رەتتىك جول اقىسىن تولەپ، بىرنەشە باعىتقا تەگىن قاتىنايتىندارعا دا قاتىستى بولماق. 

«بىزدە ءقازىر 2-اق ءتۇرى بار. نە ءسىز 80 تەڭگەدەن كارتوچكانى الاسىز نەمەسە ءسىز پەنسيونەر، وقۋشى بولساڭىز، جەڭىلدەتىلگەن 1 ايلىق تەگىن قاتىناۋ بيلەتىن الاسىز. ەگەر دە ءسىز قوعامدىق كولىكپەن ءجيى جۇرمەيتىن بولساڭىز، ءسىز كورسەتىلگەن 10 ءجۇرىس، 50 ءجۇرىس دەگەندەي كارتوچكا الاسىز، 1 جىلدىڭ ىشىندە 10-اق رەت جۇرسەڭىز، بۇل كارتوچكا سىزگە 1 جىلعا جەتەدى»،- دەدى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ماقسۇت يساحوۆ.

تاعى ءبىر جاڭالىق - قوعامدىق كولىككە از مىنەتىندەر بىرنەشە رەت جول ءجۇرۋ كارتاسىنا قول جەتكىزە الادى. دەمەك، ايىنا 5-6 رەت اۆتوبۋسقا مىنەتىن بولساڭىز، سوعان سايكەس كارتا ساتىپ الاسىز. جولاۋشىلار مۇنداي وزگەرىستەردى جاقسى قابىلدادى. ولاردىڭ ايتۋىنشا، بۇل - قولما-قول اقشا تولەپ، جۇرگىزۋشىنى مازالايتىندار قاتارىن ازايتۋعا ىقپالداسادى. 

وسىلايشا، قالا بيلىگى تۇرعىندارىنىڭ «وڭاي» كارتاسىن كوپتەپ قولدانۋىنا سەپتىگىن تيگىزبەك. دەمەك، بۇل جۇيە ەكى تاراپقا دا ءتيىمدى – جولاۋشىلار قوسىمشا 40 تەڭگە تولەمەيدى، ال تاسىمالداۋشىلار كولەڭكەلى تابىستارىن جاسىرا المايدى. جاڭا ءتاريفتىڭ ناقتى قاشان ەنگىزىلەتىنى ازىرگە بەلگىسىز. قۇجات تولىق ماقۇلدانعاننان كەيىن، وزگەرتۋلەر مەن تولىقتىرۋلاردى جەرگىلىكتى ءماسليحات بەكىتەتىن بولادى.