الەمدە ءتۇرلى قىزىق بار. ماسەلەن، عالامنىڭ ءارتۇرلى بولىگىندە قۇقىق قورعاۋ ورگاندارىندا جان-جانۋارلار، ءتىپتى، قۇستار قىزمەت ەتەدى. قامشى اا ەرەكشە ءتارتىپ ساقشىلارىن نازارلاڭىزعا ۇسىنادى.

يت

ادام قولىنا ەڭ ءبىرىنشى ۇيرەنگەن يت بولاتىن. ەرتە زاماننان بەرى ول ادامنىڭ ادال دوسى. ال 1816 جىلدىڭ 8 ساۋىرىندە بۋلتەرەر تۇقىمدى يت شوتلانديادا ۆيسكيدى زاڭسىز ساتاتىن ادامدى ۇستاپ بەرگەن. وسى كەزدەن باستاپ ولار قۇقىق قورعاۋ ورگاندارىنا جۇمىسقا الىنعان.

ءقازىر يتتەر شەكارادا، پوليسيادا قىزمەت جاسايدى. سونىمەن قاتار، ۇلىبريتانيانىڭ كەركبري قالاسىندا كوللي تۇقىمدى يت اكىمشىلىك جۇمىستارىنا كومەك بەرىپ، كەڭسەدە قۇجاتتاردى رەتتەستىرەدى.

جىلقى

الەمنىڭ كوپتەگەن مەملەكەتەرىندە اتتى اسكەر بار. ولاردىڭ توزىمدىلىگى، جۇيرىكتىگى ارقاسىندا كەيبىر كولىك جۇرە بەرمەيتىن جەرلەردە ءتارتىپ ساقشىلارى وسى اتتاردىڭ كومەگىنە سۇيەنەدى. العاش اتتى اسكەر اعىلشىنداردا پايدا بولعان. انگليادا اتتى اسكەرگە، ونىڭ ىشىندە جىلقىلارعا اسا ۇلكەن قۇرمەتپەن قارايدى. ولار تۋرالى ءارتۇرلى فيلمدەر مەن سەريالدار تۇسىرىلگەن.

ءبىزدىڭ ەلىمىزدە شەكارا ايماقتاردا ونىڭ ىشىندە كاسپيي جاعالاۋىندا اتتى اسكەرلەر بار. استانا قالاسىندا دا قوعامدىق ءتارتىپتى قاداعالاۋشىلاردىڭ اتپەن جۇرگەندىگىن كورۋگە بولادى.

قاز

قىتايدىڭ سينسزيان پروۆينسياسىندا ءۇي قۇسى سانالاتىن قازداردى ايماقتاعى قىلمىستىق ىستەرمەن كۇرەس كەزىندە پايدالانادى. قۇقىق قورعاۋ ورگاندارىنىڭ ايتۋىنشا: «قازدار وتە اگرەسيۆتى، كوزدەرى جاقسى كورەدى. ولاردىڭ داۋىستارى دا اسا قاتتى. نەگىزىندە يتتەرگە قاراعاندا ءتيىمدى».

بۇل تىنىشتىق ساقتاۋداعى قازداردى العاشقى رەت قولدانۋ ەمەس. ب.ز.د. 390 جىلى ريمگە گاللداردىڭ باسىپ كىرەۋىنە وسى قازداردىڭ اششى داۋىسى مەن اگرەسيۆتىلىگى كەدەرگى بولعان دەسەدى. جانە 1986 جىلى امەريكاندىق اسكەريلەر وزدەرىنىڭ باتىس گەرمانياداعى اسكەري وبەكتەرىن قورعاۋ ءۇشىن 900 قازدى قولدانعان.

كورتىشقان

گوللانديا مەن ۋگاندانىڭ پوليسياسىندا ىزدەۋشى يتتەردىڭ ورنىنا كورتىشقانداردى جۇمىسقا العان.  ونىڭ ءبىرىنشى سەبەبى يتتەرگە كەتەتىن شىعىندار كوبەيىپ كەتكەن. ال تىشقانداردىڭ تالابى يتتەردىكىندەي جوعارى ەمەس. ەكىنشىدەن، ولاردى الىپ ءجۇرۋ دە اسا قولايلى.

كورتىشقاندار نەگىزىندە جەراستىنداعى مينالاردى تابۋ ءۇشىن قولدانادى. ولاردىڭ سالماعى جەڭىل بولعاندىقتان مينا ۇستىندە تۇرعان كۇننىڭ وزىندە جارىلىس بولمايدى.

كەسىركە

2017 جىلى اقش-تا اريزونا شتاتىنداعى ەيۆوندەيل قالاسىنىڭ دەپارتامەنتىندە پوليسەي وفيسەرى ەتىپ كەسىرتكە سايلاندى. ايرو لاقاپتى كەسىرتكە پوليسەي بەلگىسىن الىپ، اسكەري انت قابىلداعان. «زەرتتەۋلەردە بەلگىلى بولعانداي، كەسىرتكەلەردىڭ ءقاۋىپتى زاتتاردى سەزىپ، تابۋعا ەرەكشە يكەمى بار ەكەنى انىقتالعان»، - دەيدى ءوز سوزدەرىندە اقش قۇقىق قورعاۋ ورگاندارىنىڭ قىزمەتكەرلەرى.