«الاش رۋحتى اقىن» اتتى ايماقارالىق «تاڭجارىق وقۋلارى» ءوتتى

    Zhazira Baidaly
    «الاش رۋحتى اقىن» اتتى ايماقارالىق «تاڭجارىق وقۋلارى» ءوتتى

    تالدىقورعانداعى ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندە ايماقارالىق "تاڭجارىق وقۋلارى" ءوتتى.

    الاشوردانىڭ 100 جىلدىعىنا ورايلاسقان يگى شارا حالىقارالىق "تاڭجارىق زەرتتەۋ" قوعامدىق قورىنىڭ ۇيىمداستىرۋىمەن اتالعان وقۋ ورنىنىڭ قولداۋىمەن وتكىزىلدى. وعان الماتى مەن تالدىقورعانداعى 7 ۋنيۆەرسيتەت پەن كوللەدجدەن 30-عا جۋىق ۇمىتكەر نيەت ءبىلدىرىپ، ىرىكتەلگەن 19 ستۋدەنت جارىسقا قاتىستى. فيلولوگيا عىلىمدارىنىڭ دوكتورى، پروفەسسور، تاڭجارىقتانۋشى عالىم، قوردىڭ عىلىمي كەڭەسشىسى تەمىرحان تەبەگەنوۆ، قوعام قايراتكەرى، قور كەڭەسشىسى راحىم ايىپ ۇلى، بەلگىلى ايتىسكەر اقىندار سەرىك قالييەۆ، ءابدىعاني ءبازىلحان ۇلى، جۇماتاي وسپان ۇلى قازىلىق ەتكەن بايقاۋدا قاتىسۋشىلار تاڭجارىق ولەڭدەرىن مانەرلەپ جاتقا وقۋدان جانە اقىن ءومىرى مەن شىعارماشىلىعىنا قاتىستى سۇراقتارعا جاۋاپ بەرۋدەن جارىسقا ءتۇستى. جەڭىمپازدار اقشالاي سىيلىققا قول جەتكىزدى.

    باس جۇلدە مەن وعان بەلگىلەنگەن 50 000 تەڭگەنى(قور كەڭەسشىسى، ادەبيەت سىنشىسى ءومارالى ادىلبەك ۇلى تاعايىنداعان) قىزپۋ-دىڭ ستۋدەنتى اقگۇل ايداربەكوۆا السا، 1-ورىندى تالدىقورعان پوليتەحنيكالىق كوللەدجىنىڭ 1-كۋرس ستۋدەنتى جۇلدىز بەكمۇرات قىزى(40 000) يەلەندى. ال جۇلدەلى 2-ورىنداردى اباي اتىنداعى قازۇپۋ ستۋدەنتى سالتانات اناپيايەۆا مەن قىزپۋ-دىڭ ستۋدەنتى ايجان مەلدەبەك ەنشىلەدى. سونداي-اق، ءارقايسىسى 15 000 تەڭگەنى قۇرايتىن 3 جۇلدە جەتىسۋ ۋنيۆەرسيتەتىنەن قاتىسقان 3 ستۋدەنتكە بۇيىردى.

    جاستاردىڭ تاڭجارىقتانۋعا دەگەن ىقىلاسى مەن پەيىلى جوعارى، العان اسەرى مەن تۇيگەن ءبىلىمى مول بولدى. وعان دالەل، ماماندىعى باسقا تالدىقورعان پوليتەحنيكالىق كوللەدجىنەن 10-عا تارتا ستۋدەنتتىڭ اقىن ولەڭىن جاتتاپ، ومىرىنە ءۇڭىلىپ، اسا زور ىنتا تانىتۋى. تۇستەن كەيىن وتكەن ادەبي-سازدى كەشتە بەلگىلى ءانشى نۇرجان جانپەيىسوۆ، ساۋلەجان تاقزيا، "امانات" توبى، ت.ب. انشىلەر جانە الماتى مەن جەتىسۋلىق جاس اقىندار قاتىسىپ تاڭجارىقتىڭ اندەرىن ورىنداپ، اقىن رۋحىن اسقاقتاتىپ ايتىس جاسادى. وسىلايشا، جىل وتكەن سايىن تاڭجارىق اقىنعا دەگەن جاستاردىڭ تانىمى، قۇرمەتى مەن زەرتتەپ-زەردەلەۋگە دەگەن قۇلشىنىسى ارتىپ، دەڭگەيى دە جوعارلاپ كەلەدى. بۇعان دەيىن قاتارىنان 3 جىل بويى الماتىدا قالالىق دەڭگەيدە وتكەن " تاڭجارىق وقۋلارى" بيىل العاش رەت ايماقارالىق ادەبي باسەكەگە كوتەرىلدى.


    ەسكەرتە كەتەيىك، تاڭجارىق جولدى ۇلى – شەتەلدەگى قازاق ادەبيەتىنىڭ وكىلدەرى ىشىنىدەگى العاشقى ءارى بىردەن-بىر ارنايى شىعارماشىلىق وقۋى وتكىزىلگەن ادەبيەت پەن ونەردىڭ ءىرى تۇلعاسى رەتىندە تاريح ساحناسىندا، جاستار جادىندا جاڭعىرا ءتۇستى.

    جارقىن سالەن ۇلى، جۋرناليست

    قاتىستى ماقالالار